Փաստ ինֆո

Մի շարք ՀԿ-ներ հանդես են եկել հայտարարությամբ, որով կառավարությանն ու պարետ Տիգրան Ավինյանին առաջարկում են երկշաբաթյա կարանտին սահմանել կորոնավիրուսային վարակի տարածումը նվազեցնելու համար։ «Փաստինֆո»-ի հետ զրույցում «Իրազեկ քաղաքացիների միավորում» ՀԿ  համակարգող Դանիել Իոաննիսյանն ասաց, որ նման պահանջով հանդես գալու պատճառն այն  տխուր վիճակագրությունն է,  որը կա եւ որում Հայաստանը բացասական առումով արդեն առաջատար  հորիզոնականներում է՝  օրական նոր դեպքերով: Իոանննիսյանի խոսքով, երեկվա դրությամբ  այդ ցուցանիշով  Հայաստանից վատ վիճակում ընդամենը 4 երկիր էր եւ երկրորդ,  պատճառը, նրա խոսքով, այն է, որ ըստ էության, արդեն պարզ է դառնում, որ  անհատական պաշտպանության միջոցների քաղաքականությունը գործնականում չի օգնում:

-Արդյո՞ք այն քաղաքականություն եւ մասնավորապես այն արշավը, որը հիմա անում է իշխանությունը, մասնավորապես անհատական պաշտպանիչ միջոցների խրախուսման նպատակով ուշացած չէ, եւ արդյո՞ք այս կեցվածքն իշխանությունը չպետք է ընդուներ ի սկզբանե՝ վարակի տարածման սկզբնական փուլում, երբ մասնագետներն ահազանգում ու զգուշացնում էին հնարավոր  վտանգների մասին, ինչին իշխանությունը թեթեւամիտ եւ անգամ հեգնանքով էր վերաբերվում:

-Դե, հիմա, տարբեր փուլերում տարբեր ռեակցիաներ են եղել, որոշ ռեակցիաներ հիմնավոր են եղել, որոշները՝ ոչ, բայց , ըստ էության, կարեւորը հետեւյալն է, որ  կառավարության այս պահի քաղաքականությունը մենք համարում ենք սխալ եւ պետք է վերադառնալ կարանտինի եւ շատ ավելի խիստ կարանտինի, քան եղել է մարտի վերջին կամ ապրիլի սկզբին:

-Այս պարագայում  սոցիալ-տնտեսական ռիսկեր եւ առողջապահական խնդիրներ բալանսը կառավարությունն ի վիճակի՞ է լինելու պահել: Առանց այն էլ իմ նշած խնդիրները սրված են:

-Ինձ  թվում է, որ երկու շաբաթ ժամանակահատվածում՝ այո, ավելի երկարը՝ չգիտեմ:Առողջապահական համակարգը հիմա ուղղակի գերծանրաբեռնվում է, շատերը մեղադրում են առողջապահության ոլորտի պատասխանատուներին, բայց  կարանտինային միջոցառումներն  իրենց լիազորություններում չէ, իրենց լիազորություններում է մարդկանց բուժելը եւ իրենք ֆիզիկապես ուղղակի չեն հասցնում: Եթե այսպես շարունակվի, ռեանիմացիաները շուտով լիքը կլինեն եւ չեն կարողանա սպասարկել բոլորին:

-Կարանտինային ռեժիմի ձախողման պատճառը ո՞րն է եւ ովքե՞ր են պատասխանատուները:

-Պատասխանատուները շատ են՝ սկսած հասարակությունից վերջացրած ոստիկանությունով, որովհետեւ որոշ երկրներում հասարակությունն է այնքան խելոք, որ դա անում է, որոշ երկրներում ոստիկանությունն է այնքան ունակ, որ կարող է ապահովել: Հայաստանում, փաստորեն, համ հասարակությունը  թերացավ, համ ոստիկանությունը:

-Իսկ իշխանությո՞ւնը, ուշացած չէ՞ին որոշումները:

-Դե, որոշ որոշումներ ուշացած էին, որոշ  որոշումներ լավն էին, բայց մնացին թղթի վրա: Տարբեր… այո, կային որոշումներ, որոնք ուշացած էին:

-Պարետի  փոփոխության խնդիր դնո՞ւմ եք:

-Գիտեք, այս հարցերը, ինձ թվում է բավականին լայն են քննարկվում իշխանությունում եւ  միայն պարետն անձամբ չէ, որ դա որոշում է: Այնպես, որ ես նաեւ հակված չեմ միայն իր վրա դնել պատասխանատվությունը, ավելի լայն է:

-Ի՞նչ արձագանք եք ակնկալում իշխանությունից:

-Նիկոլ Փաշինյանն ասել է, որ այդ հարցը օրակարգում կա, ակնկալում ենք, որ իշխանությունը կգնա այդ քայլին եւ կվերադառնա շատ ավելի խիստ ու լուրջ կարանտինի, քան եղել է մարտ-ապրիլ ամիսներին:

-Ստեղծված իրավիճակում երկշաբաթյա կարանտինի արդյունավետության տեսանկյունից ինչ- որ ուսումնասիրություն, հաշվարկ կա՞  պահանջի հիմքում:

- Երկու շաբաթը հիմնականում պայմանավորված է  նրանով, որ գաղտնի շրջանը երկու շաբաթից քիչ է, որպես կանոն եւ երկու շաբաթ հետո արդեն հստակ կլինի, թե քանի հոգի է հիվանդ մի կողմից եւ մյուս կողմից երկու շաբաթում առողջապահական համակարգը  կբեռնաթափվի, ռեանիմացիաները խելքի կգան  կարծում եմ եւ երրորդը, երկու շաբաթը այն –ժամանակահատված է, որը առողջապահության նախարարը նշեց,  որ եթե երկու շաբաթով կարանտին մտցվի, վիճակը շեշտակի կլավանա: Ինքը կարծեմ այլ բառեր էր օգտագործել, բայց էությունը դա էր, հիշեցնեմ, Հանրային խորհրդի նիստին էր այդ մասին խոսել:

-Իսկ ստեղծված իրավիճակի համար պատասխանատվության խնդիր  դնելու անհրաժեշտություն չե՞ք տեսնում, որովհետեւ ի սկզբանե հասարակությունը  իշխանությունից՝ սկսած  առողջապահության նախարարից մինչեւ վարչապետ, սխալ ազդակներ ստացավ եւ , ըստ էության , նաեւ այդ  ազդակներից ելնելով, կարծես թե մարդիկ այդպես էլ լուրջ չվերաբերվեցին վիրուսին:

-Ինձ թվում է այս ամենը կանցնի եւ դրանից  հետո կարիք կլինի գնահատել իշխանության բոլոր գործողությունների արդյունավետությունը եւ իհարկե, իրենք քաղաքական  պատասխանատվություն են կրում իրենց սխալների համար, ցանկացած ոլորտում իրենց սխալների համար ու նաեւ քաղաքական դիվիդենտներ են ստանում ճիշտ  քայլերի համար: Սա , բնականաբար, արվելու է:

Աղբյուր` Փաստինֆո