Փաստ ինֆո

Ազգային ժողովի անկախ պատգամավոր Արման Բաբաջանյանը հայտարարել է, որ պատրաստվում է վեթինգի դիմադրական շարժում ստեղծել։ «Փաստինֆո»-ն զրուցել է պատգամավորի հետ ու փորձել ճշտել, թե ովքեր են շարժման անդամները և ինչպես են պատրաստվում դատական համակարգի ներկայացուցիչների մասին տեղեկատվություն հավաքագրել։

-Պարոն Բաբաջանյան, հայտարարեցիք, որ դատական համակարգի նվիրյալ ներկայացուցիչների հետ պատրաստվում եք վեթինգի դիմադրական շարժում ստեղծել, ովքե՞ր են Ձեր նախաձեռնած շարժման անդամները, կարո՞ղ եք թվել նրանցից մի քանիսի անունները։

- Այդ նախաձեռնության մասին իմ հայտարարությունից հետո ինձ դիմել են բազմաթիվ իրավապաշտպաններ, փաստաբաններ, այո, նաև դատական համակարգի ներկայացուցիչներ։ Քանի որ դեռևս չունեմ նրանց անունները հրապարակելու համաձայնություն, այս պահին չեմ կարող կոնկրետ մարդկանց նշել։ Բայց ասեմ, որ վստահ եմ՝ նախաձեռնությունը կլինի բազմամարդ ու բազմաշերտ, քանի որ դրա առջև դրված նպատակներն առնչվում են թավշյա հեղափոխության ամենահիմնական հռչակումներից մեկին՝ երկրում արդարության ու արդարադատության վերականգմանը և հաստատմանը։ Իսկ հեղափոխությանը մասնակցել են մեր հարյուր հազարավոր քաղաքացիներ։ Հետևաբար, կարծում եմ, որ մենք մեր նախաձեռնությամբ, ըստ էության, ներկայացնում ենք մեր քաղաքացիների մեծամասնության պահանջը, քանի որ հեղափոխությունը մեծ չափով տեղի է ունեցել առաջին հերթին երկրում խարխլված, ոտնահարված արդարությունը վերականգնելու համար։ Այնպես, որ մոտ ապագայում հանրությունը կտեղեկացվի մեր նախաձեռնության բոլոր անդամների մասին։

-Նշել էիք, որ նախաձեռնության շրջանակներում պատրաստվում եք դատական համակարգի «արատավորված ներկայացուցիչների» մասին ամբողջական տեղեկատվություն հավաքագրել և հրապարակել։ Ի՞նչպես եք զտելու դատական համակարգի արատավորված ներկայացուցիչներին և արդյոք մտավախություն չունեք, որ այս կերպ կխախտվի անձի անմեղության կանխավարկածը։

- Անցած ավելի քան քսան տարիներին մեր դատական համակարգի կողմից կայացվել են հարյուրավոր, եթե ոչ հազարավոր ապօրինի, անօրինական վճիռներ, որոնք ես կբաժանեի երկու մեծ խմբի՝ քաղաքական իշխանության պատվերով կայացված վճիռներ և կոռուպցիոն գործարքների արդյունքում կայացված վճիռներ։ Վճիռների երկու խումբն էլ առնչվել է հարյուրավոր, հազարավոր քաղաքացիների ճակատագրերին, որոնց մի մասը հետապնդվել է քաղաքական պատճառներով, մյուսները ունեզրկվել են այս կամ այն օլիգարխի շահերի սպասարկման համար։ Կրկնում եմ, այդպիսի վճիռները շատ- շատ են և մենք փորձելու ենք հատիկ առ հատիկ գնալ նման վճիռների հետքերով, բացահայտել դրանց կայացման հարցում դատավորների ունեցած շահերն ու դրդապատճառները, այդ վճիռներին հաջորդած շրջանում նրանց ունեցվածքի ու եկամուտների ավելացումները։ Բնականաբար, մենք դա չենք անելու՝ խախտելով անմեղության կանխավարկածը, քանի որ քաջ գիտակցում ենք խնդրի լրջությունը։ Ինչպես նշեցի, մեր թիմում կան բազմաթիվ իրավաբաններ, փաստաբաններ և մենք ինքներս ենք առաջին հերթին շահագրգիռ, որպեսզի ամեն ինչ արվի օրենքի տառին ու ոգուն համապատասխան։

-Ըստ էության, Կոռուպցիայի կանխարգելման հանձնաժողովին է վերապահված իրականացնել այն գործառույթները, որոնք պատրաստվում է իրականացնել Ձեր նախաձեռնած շարժումը։ Արդյո՞ք հանձնաժողովի աշխատանքներից դժգոհությունն է պատճառ հանդիսացել, որ ինքներդ եք որոշել ստեղծել համանման գործառույթներ իրականացնող շարժում։

- Ոչ միայն Կոռուպցիայի կանխարգելման հանձնաժողովը, այլ նաև բազմաթիվ այլ պետական կառավարման մարմիններ, գերատեսչություններ անցած երկու տարիներին պետք է զբաղվեին նրանով, ինչով ցանկանում ենք զբաղվել մենք։ Եվ այդ իմաստով, այո, պետական կառավարման մարմինները, իրավապահ կառույցները տապալել են այդ խնդիրը։ Հիշեցնեմ, որ ուղիղ մեկ տարի առաջ այս օրերին վարչապետ Նիկոլ Փաշինյանը հանդես եկավ դատաիրավական համակարգում համալիր բարեփոխումներ իրականացնելու նախաձեռնությամբ՝ նշելով, որ դրա շրջանակներում պետք է տեղի ունենա դատավորների համատարած վեթինգ։ Սակայն անցած շաբաթ վարչապետի մոտ կայացած քննարկման ժամանակ արդարադատության նախարար Ռուստամ Բադասյանը երկրի ղեկավարին այդ հանձնարարականի կատարման մասին զեկուցելու փոխարեն, նրան ներկայացրեց այն հիմքերը, թե ինչու հնարավոր չէ վեթինգ իրականացնել առանց սահմանադրական փոփոխությունների։

Դա վերջին կաթիլն էր, որը հօդս ցնդեցրեց դատաիրավական համակարգում արմատական փոփոխությունների սպասող մարդկանց հույսերն ու ակնկալիքները։ Բայց եթե իշխանությունը չի ցանկանում կատարել այդ բարեփոխումները, չի նշանակում, որ պետք է համակերպվել դրա հետ։ Հակառակը՝ պետք է ձևակերպել ու ներկայացնել հանրության մեծամասնության այդ պահանջը ու իշխանություններին բոլոր հնարավոր միջոցներով դրդել կատարել իրենց իսկ տված խոստումները։ Այլապես, ինչպես առիթ եմ ունեցել ասելու, մենք վերջնականապես տանուլ կտանք հեղափոխությունը, որովհետև դրա ամենամեծ դիմադրությունը գտնվում է հենց դատական համակարգում։

Հեղինակ՝ Սոնա Գեւորգյան

Աղբյուր` Փաստինֆո