Փաստ ինֆո

Օրեր առաջ Գավառում տեղի ունեցած աղմկահարույց սպանությունը տեղի է ունեցել երկու պատանիների՝ 15-16 տարեկան տղաների միջև ակումբում ծագած վիճաբանության պատճառով։ Դեռահասները չեն կարողացել վիճաբանությունը հարթել ու դրան արդեն միջամտել են մեծահասակները՝ որոշելով հանդիպել, քննարկել և լուծել խնդիրը: Այս մասին «Փաստինֆո»-ի հետ զրույցում ասաց փաստաբան Ալեքսանդր Կոչուբաևը, ով սույն գործով՝ զանգվածային անկարգության մեջ մեղադրվող երեք անձանց պաշտպանն է:

Հիշեցնենք, ապրիլի 28-ին Գավառում տեղի է ունեցել փոխհրաձգություն, որի ժամանակ սպանվել է երկու երիտասարդ՝ Նորատուսի բնակիչ Վ. Ավետիսյանը և Գավառի բնակիչ՝ ՔԿ Զինվորական քննչական գլխավոր վարչության քննիչ Զ. Պարոնիկյանը, 6 հոգի տեղափոխվել բժշկական կենտրոն: Սակայն դեպքն այդքանով չի ավարտվել և դարձել է վենդետայի պատճառ: Դանակով ու մահակներով զինված անձինք մտել են Գավառի հիվանդանոց, որտեղ այդ պահին հսկողություն էին իրականացնում ոստիկանության ծառայողները, այն ամբողջությամբ տակնուվրա արել, փորձել սպանել միջադեպի մասնակիցներից 3-ին՝ նրանց մեղադրելով իրենց հարազատների սպանության մեջ։

Կողմերը՝ նորատուսցիներն ու Գավառի բնակիչները. փաստաբանի փոխանցմամբ՝ կողմերը պայմանավորվել էին հանդիպել՝ քննարկելու ու հանգուցալուծելու վեճը, սակայն «Գավառի թևը» անմիջապես սկսել է կրակել ու որևէ քննարկում տեղի չի ունեցել:

«Համացանցում տարածված տեսանյութում էլ երևում է, որ առանց որևէ բան ասելու մեքենայով մոտենում են և կրակահերթ են բացում: Իրենց հերթին էլ «Նորատուսի թևից» կրակոցներ են լինում, վիրավորվում է երկու անձ՝ Գավառի թևից: Նորատուսի բնակիչները տեղեկանալով, որ այդ երկու անձինք են հավանաբար սպանել «Նորատուսցի արջին» և մյուսին, իրենց ասելով՝ Վահեին և Զորոյին, շտապում են Գավառի Բկ՝ հաշվեհարդար տեսնելու»,- ասաց փաստաբանը։ Նշենք, որ հիվանդանոցում տեղի ունեցածը որակվել են զանգվածային անկարգություններ՝ կոտրվել են հիվանդանոցի գույքը՝ դռներն ու պատուհանները, երկու հոսպիտալացված անձի ծանր վնասվածքներ են պատճառվել:
Կոչուբաևը կարծում է, որ նախաքննական մարմինը, չկարողանալով պարզել իրական մասնակիցների շրջանակը, մեկ ոստիկանի ցուցմունքով այսօր մարդկանց է կալանավորում:

Փաստաբանն իր պաշտպանյալներին առաջադրված մեղադրանքն արդեն իսկ այս փուլում որակում է որպես անհեթեթություն, սակայն նշում, որ նրանց ազատ արձակելու հարցը բարձրացնում հենց նրանց անվտանգությունից ելնելով:

«Ես իրենց էլ եմ դա բացատրել, իրենց հարազատներին էլ, որ այս պահին առնվազն մեկ ամիս նպատակահարմար է, որ պաշտպանյալներս լինեն ՔԿՀ-ում, քանի որ, ըստ Գավառի թևի ներկայացուցիչների՝ այս կալանավորված անձինք են իրենց հարազատներին ծանր մարմնական վնասվածքներ պատճառել և, ընդհանուր առմամբ վիճակը շարունակում է մնալ հրավտանգ, երկու կողմերի կրքերը չեն հանդարտվում: Երեկ՝ Երևան քաղաքի դատարանների դիմաց, որտեղ քննվում էին կալանավորման միջնորդությունները, նկատվում էին և Նորատուսի, և՛ Գավառի բնակիչների բավականին ագրեսիվ կուտակումներ»,- ասաց փաստաբանը:

Կոչուբաևը վստահ է, որ դատարաններն էլ ունեին ներքին համոզմունք, որ այս անձինք անմեղ էին, սակայն դատավորներից անկեղծ գտնվեց միայն Մնացական Մարտիրոսյանը և բացահայտ հայտարարեց, որ կալանավորումն անհրաժեշտ է՝ հենց իր պաշտպանյալի անվտանգության նկատառումներից ելնելով:

Նա նշեց, որ վերաքննիչ բողոք կներկայացնեն, քանի որ մինչ այդ կքննարկվի՝ մեկ ամիսը կանցնի, և իր պաշտպանյալներ կլինեն ազատության մեջ, քանի որ մեղադրանքը թույլ է, չկա պացուցողական բազա։ «Փաստացի ունենք իրավիճակ, երբ երկու համայնքի բնակիչները պատերազմ են հայտարարել պետությանը:

Ես ունեմ պաշտպանյալներ այդ նույն քրեական գործով, բացարձակ չեմ կիսում իրեն գործողությունների տրամաբանությունը, քանի որ դրանք հակապետական քայլեր են: Եթե այսպիսի դեպքերը լինեն շարունակական, մենք շատ արագ կվերածվենք քրեածին պետության, որտեղ սպանությունները սովորական դեպքերի կվերածվեն: Այս առումով ես ամբողջովին պետության մտահոգությունները կիսում եմ, այս դեպքերը պետք է լրջագույնս քննվեն, սակայն դա չպետք է լինեն անմեղ անձանց հաշվին: Իմ պաշտպանյալներից առնվազն երկուսն այդ զանգվածային անկարգությունների ժամանակ եղել են Երևան քաղաքում, Առաջին համալսարանական հիվանդանոցում, կան փաստական տվյալներ, սակայն նախաքննական մարմինը դա անտեսեց»,- նշեց Կոչուբաևը:

Աղբյուր` Փաստինֆո