Փաստ ինֆո

Երբ Նիկոլ Փաշինյանը նման հայտարարություններ է անում, իսկ նման հայտարարություններ շատ են եղել՝ դրանք դառնում են անհետևանքային հայտարարություններ: Այս մասին ԱԺ ճեպազրույցի ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Պատգամավորը նշեց, որ երբ հայտարարություն էր եղել այն մասին, որ մարդիկ ծրարներով փող են ստացել կառավարությունում, հարցը տվեցին, բայց «պինգ պոնգի» պես հարցը հետ ուղարկվեց և այդպես էլ չպարզվեց՝ վարչապետը ՀՀ երրորդ նախագահ Սերժ Սարգսյանի կադրերին հարցրե՞լ է արդյոք՝ ծրարով փող ստացել են, թե ոչ. «Հարցը փակվեց, գնաց: Հիմա էլ Սերժ Սարգսյանի մնացորդներից է խոսում: Ես հարցեր ունեմ, օրինակ Ջանջուղազյանը կարող է համարվել Սերժ Սարգսյանի մնացորդ, թե ոչ: Կարող եմ թվարկել բոլոր նրանց, ովքեր այդ ժամանակ աշխատել են: «Լուսավոր Հայաստան»-ը անվստահություն է հայտնել ֆինանսների նախարար Ատոմ Ջանջուղազյանին և շրջակա միջավայրի նախարար Էրիկ Գրիգորյանին: Հիմա այդ մարդիկ, ում հետ վարչապետն ամեն օր աշխատում է, համարվում են Սերժ Սարգսյանի մնացորդներ, թե ոչ: Իսկ այդ մարդիկ չեն վիրավորվում, որ իրենց մասին նման հայտարարություններ են անում: Այդ ինչ մթնոլորտ է, հնարավոր է այդ մթնոլորտում արդյունավետ աշխատանք տանել: Միգուցե վիրավորվել են և այնպիսի փաթեթներ են հաստատում, որով ձախողման են տանում այս կառավարությանը: Կարող է Նիկոլ Փաշինյանի հայտարարություններից վիրավորվեն Սերժ Սարգսյանի մնացորդ կադրերը և աբսուրդ փաթեթներ հաստատեն, որ մարդկանց մոտ դժգոհությունն աճի և դա ուղղվի Նիկոլ Փաշինյանի դեմ»,-ասաց Էդմոն Մարուքյանը:

Նա նշեց, որ երկրում կան բազմաթիվ խելացի, հմուտ մարդիկ, ովքեր կարող է չեն քայլել, բայց լավ մասնագետներ են և այդ մարդկանց կարող են ներգրավել. «Եկել են, մի քանի նախարարի փոխել են, Սերժ Սարգսյանի երկրորդ էշելոնի կադրերին առաջ են քաշել առաջին էշելոն` դարձրել նախարարներ ու այս երկու տարի է աշխատում են: Արդյունքն այն է, ինչ ունենք և ամեն օր բողոքում են Սերժ Սարգսյանից: Ժողովուրդ ջան ձեր մոտ են այդ կադրերը, ազատվեք, ում վրա եք մուննաթ գալիս: Հրամանի թուղթն էլ է ձեր ձեռքը, գրիչն էլ, ստորագրեք, ազատեք»,-հավելեց Էդմոն Մարուքյանը:

Աղբյուր` Փաստինֆո