Փաստ ինֆո

ԱԺ «Բարգավաճ Հայաստան» խմբակցության պատգամավոր, Մարդու իրավունքների պաշտպանության հանձնաժողովի նախագահ Նաիրա Զոհրաբյանը «Varks.am» վարկային կազմակերպության վերաբերյալ քաղաքացիներից բազմաթիվ դժգոհություններ է ստանում, սակայն ոչ մի կերպ չի կարողանում կապ հաստատել ղեկավարության հետ, չեն պատասխանում ո՛չ նամակներին, ո՛չ զանգերին։

«Ես էլ չգիտեմ ինչ կերպ խոսեմ դրանց հետ։ Կազմակերպության ղեկավարի հետ մի քանի օր է փորձում եմ կապվել, սակայն որևէ կերպ նրա դուխը չի հերիքում ինձ զանգել»,- «Փաստինֆո»-ի հետ զրույցում ասաց Զոհրաբյանը։

Նա նշեց, որ եթե «Varks.am»-ի ղեկավարությունը շարունակի «փախչել իրենից», որպեսզի չպատասխանի քաղաքացիների տրամաբանական հարցերին, ապա հարցը հասնելու է դատարան։

«Փախչելը քեզ չի փրկելու, այ տղա, դու պատասխան ես տալու ժողովրդին տարիներ շարունակ թալանելու, տարեկան 200-250 %-ով ժողովրդի վրա վարկեր դնելու համար։ Դու չես մարսելու կուտակած գումարդ, և եթե հիմա չգաս համագործակցության դաշտ ու չփորձենք քննարկել ստեղծված իրավիճակը, ապա, կարծում եմ, քրեական օրենսգրքի առաջ խստագույնս պատասխանատվության ես ենթարկվելու, այ տղա»,-ասաց Զոհրաբյանը՝ դիմելով «Varks.am»-ի ղեկավարին։
Խոսելով վարկերի վճարումը ժամանակավորապես սառեցնելու հարցում կառավարության մոտեցման մասին՝ տիկին Զոհրաբյանը նշեց, որ նրանք, ովքեր ի վիճակի են փակել վարկերը, անպայմանորեն պետք է փակեն, իսկ ովքեր այս պահին անգամ հաց գնել չեն կարող, նրանց համար վարկային արձակուրդ պետք է սահմանվի։
«Մենք չենք ասում բոլորին տրվի արձակուրդ, այլ միայն նրանց, ովքեր ի վիճակի չեն վարկերը մուծել, իսկ այսօր նրանց թիվը զգալի մեծ է։ Պետք է կարողանանք այս խնդիրներն օպերատիվ լուծել, այլապես, ես խուճապ չեմ ուզում տարածել, բայց սոցիալական խիստ լարված իրավիճակ կլինի, որը որևէ կերպ լավ չի լինի»,-ավարտելով խոսքն ասաց Զոհրաբյանը։

Աղբյուր` Փաստինֆո