Փաստ ինֆո

Երեկ տեղի ունեցած «ոչ»-ի «հուղարկավորությունը» ԱԺ «Բարգավաճ Հայաստան» խմբակցության պատգամավոր, Մարդու իրավունքների պաշտպանության եւ հանրային հարցերի մշտական հանձնաժողովի նախագահ Նաիրա Զոհրաբյանն համարում է շարքային գռեհկություն։

Հիշեցնենք, որ սա «ոչ»-ի քարոզչական կողմի «հուղարկավորության» կազմակերպման արդեն երկրորդ դեպքն է։ Առաջինն Էջմիածնում էր, քաղաքացիները գերեզմանաթումբ էին պատրաստել և «ոչ»-ի «հուղարկավորությունն» էին իրականացնում։ Տեղի ունեցածին «Փաստինֆո»-ի հետ զրույցում Էջմիածնի քաղաքապետ Դիանա Գասպարյանը պնդել էր, թե «Այո»-ի շտաբը դրա հետ որեւէ առնչություն չի ունեցել եւ վստահեցրել, որ քաղաքապետարանն արագ արձագանքել է և աշխատակիցները վերացրել են «ոչ»-ի «հուղարկավորության» համար պատրաստված գերեզմանաթումբը։

Այսօր գրանցվել է երկրորդ դեպքը։ «Երբ մենք խոսում ենք ատելության մթնոլորտի մասին, հասարակության մեջ նեգատիվն անընդհատ սրելու մասին, հանրության ամենաստորին բնազդները հետևողականորեն ջրի երես հանելու մասին, սրա հետևանքներն այսպիսին պետք է լինեին»,-այս մասին «Փաստինֆո»-ի հետ զրույցում ասաց Զոհրաբյանը։

Նրա խոսքով, ոմանց այս ամենը ծիծաղելի է թվում, սակայն ուրախանալու ոչինչ չկա. «Մենք արդեն վաղուց անցել են անհանդուրժողականության բոլոր կարմիր գծերը, անվտանգության որևէ բարձիկ այլևս չի աշխատում»։

ԲՀԿ խմբակցության պատգամավորը պատմեց, որ վերջին 2,5 ամսում իրեն հայտնի է առնվազն 3 հարսանիքի դեպք, որը քաղաքական հողի վրա ավարտվել է դանակահարությամբ։

«Փոխանակ այդ ամենը կանգնեցնեն, փոխանակ դադարեցնեն սոցիալական մեդիայում այդ խայտառակ գրոհները, այդ ֆեյքագրոհները, փոխանակ հանդուրժողականություն քարոզեն, որովհետև իշխանությունն այսօր կարող է կոչ անել դադարեցնել այս ամենը և գործուն մեխանիզմներ մտածել»,-ասաց Մարդու իրավունքների պաշտպանության եւ հանրային հարցերի մշտական հանձնաժողովի նախագահը։

Զոհրաբյանի գնահատմամբ ստեղծված իրավիճակը շատերին հարմար է, քանի որ եթե անմիջապես իրենց չեն հայհոյում, այլ հայհոյում են իրենց հակառակորդին, իրենք ուրախանում ու ոգևորվում են։

«Ատելությունը, թշնամանքը բումերանգ է և այն նույն մարդիկ, այդ ցածրակարգ, ստորին, ստորագույն բնազդներով առաջնորդվող մարդիկ, այդ թվում կանայք, ովքեր ինքնամոռաց, էքստազի հասնելով սոցիալական ցանցերում այսօր հայհոյում են օրինակ ընդդիմությանը կամ իշխանությանը, վաղն այդ նույն մարդիկ նույն ինքնամոռացությամբ հայհոյելու են հակառակ թևին»,-ասաց Մարդու իրավունքների պաշտպանության եւ հանրային հարցերի մշտական հանձնաժողովի նախագահը։

Նա ընդգծեց, որ այս տեսակի մարդիկ հանրության մեջ բավականին մեծ թափ են հավաքում և ձնագնդի էֆեկտով մեծանում են։

«Այս տեսակի համար որևէ տաբու չկա։ Նրանք հատակի մակարդակին հայտնված մարդիկ են՝ չկայացած, տգետ, տգեղ, անբարո, անպարկեշտ։ Միայն բարոյականությունից զուրկ, կյանքում չկայացած, տգեղ ու տգետ կինն ու տղամարդը կարող են այդպես ինքնամոռաց հայհոյել։ Ես չեմ հավատում, որ տգեղ արտաքինի մեջ կարող է լինել բարի հոգի։ Չի՛ լինում այդպիսի բան»,-ասաց Զոհրաբյանը։

Նրա խոսքով, այս ցածրակարգ բնազդներով ապրող մարդիկ, որոնց ինքը «հոմոս ափիենս» չի համարում, վաղը նույն էքստազով հայհոյելու են նրանց, ովքեր իրենց հրահանգում են հայհոյել։

«Սա ուղղակի աղետ է։ Եթե ինձ հարցնեք, որն է այս աղետը կասեցնելու ճանապարհը, ես կասեմ, որ այլևս այս ամենը կասեցնելու որևէ ռացիոնալ ճանապարհ չեմ տեսնում»,-ասաց Զոհրաբյանը։

ԲՀԿ խմբակցության պատգամավորն ասաց, որ ստեղծված իրավիճակը հարթել իշխանությունները կարող էին և արդեն իսկ ուշացել են։

«Ես չգիտեմ, այլևս հնարավոր է իրավիճակը կասեցնել, բայց երբեք ուշ չէ ինչ-որ քայլ անել, որովհետև սա բումերանգ է և այն ամենադաժան, ջախջախիչ ձևով հարվածելու է իշխանություններին։ Կապ չունի իրենք կապ ունեն այս ամենի հետ, կազմակերպում են թե ոչ, իրենք են այսօր պատասխանատու և իրենք ունեն լեգիտիմության մեծ տոկոս, կարող են այս ամենը կասեցնելու փորձ անել»,-ընդգծեց Նաիրա Զոհրաբյանը։

Հեղինակ՝ Սոնա Գեւորգյան

Լուսանկարը՝ Ռոբերտ Հայրապետյանի ֆեյսբուքյան էջից։

Աղբյուր` Փաստինֆո