Փաստ ինֆո

ՀՀ Վարչապետ Նիկոլ Փաշինյանը «այո»-ի քարոզարշավ է իրականացնում Ագարակում։ Նրան ուղեկցում են Տարածքային կառավարման ենթակառուցվածքների նախարար Սուրեն Պապիկյանը, ԱԺ «Իմ քայլը» խմբակցության ղեկավար Լիլիթ Մակունցը, «Իմ քայլը» խմբակցության պատգամավոր Սասուն Միքայելյանը, վարչապետի տիկին Աննա Հակոբյանն ու մի շարք այլ բարձրաստիճան պաշտոնյաներ։

Նա քարոզարշավի ընթացքում կրկին խոսել է 2018թ-ին տեղի ունեցած հեղափոխության մասին։

«Շատերը պատկերացնում են, որ դա մարտի 31-ին սկսվեց մայիսի 8-ին ավարտվեց, սակայն դա շատ ավելի շուտ է սկսվել։ Ասում են՝ դա ես եմ սկսել, բայց դա ես չեմ սկսել, դա մենք ենք սկսել, ամեն մեկս, մեր մտածածով, մեր տեսածով, մեր ներսում մեզ ուտելով ու եռալով»,-ասել է Փաշինյանը։

Նա ընդգծել է, որ մարտի 31-ին տեղի ունեցածը ժողովուրդը ներսում սկսված հեղափոխության կուլմինացիան է եղել. «Շատ կարևոր է արձանագրել, որ այդ հեղափոխությունը հաղթանակել է, բայց չի ավարտվել։ Այո, մայիսի 9-ին մենք ուրիշ Հայաստանում արթնանանք, իրար հետ ուրիշ Հայաստան ստեղծեցինք, բայց այս ուրիշ Հայաստանի շենքերի խնդիրը չլուծվեց մայիսի 9-ին, գործազրկության, աղքատության խնդիրները չլուծվեցին մայիսի 9-ին։ Մայիսի 9-ին լուծվեց համակարգային կոռուպցիայի հարցը, բայց կաշառակերության հարցը չլուծվեց մայիսի 9-ին»։

Վարչապետը՝ ցույց տալով բուկլետները, նշել է, որ դրանում անուն-ազգանունը գրելու համար բաց թողնված հատված կա և քաղաքացիները կարող են գրել իրենց անունն ու պահել որպես հուշանվել։

«Պահեք, որպես հիշողություն, որ ամեն անգամ այս փաստաթղթին նայելիս հիշեք մեր պայմանավորվածությունը,մեր պայմանագիրը, որ չենք շեղվելու հեղափոխության արժեքներից, հիշեք, որ ձեզնից յուրաքանչյուրը հեղափոխության առաջնորդ է»,-ասել է Փաշինյանը։

Վարչապետի խոսքով, բոլորը նույնքան կարևոր ու իրավատեր են, սակայն բազմաթիվ առաջնորդներով երկիրը կառավարելու համար խնդիր կա. «Դրա համար ասում ենք՝ պետք է ունենանք սահմանադրական իրականություն ու սահմանադրական ինստիտուտներ։ Այսօր ՀՀ յուրաքանչյուր քաղաքացի կարող է հավակնել և՛ պատգամավորի կարգավիճակին, և՛ քաղաքապետի կարգավիճակին, և՛ ավագանու անդամի կարգավիճակին, և՛ վարչապետի կարգավիճակին։ Ով ուզում է դուրս գալ ժողովրդի առաջ, իր ասելիքն ասել, այո՛, նրա իրավունքներն ապահոված են»։

Նրա խոսքով, ՀՀ-ում բոլոր խնդիրները սկսվել են, այդ թվում ընտրությունների կեղծումներով, և ՍԴ-ն, ըստ էության, դարձել է տանիք բոլոր ընտրակեղծիքների համար։

«Մենք ասում ենք, որ այս Սահմանադրական դատարանը պետք է փոխվի և Հայաստանում  լինի գործող Սահմանադրության համապատասխան ՍԴ, բայց այս թեմայով ավելի մանրամասն ես կխոսեմ Մեղրիի հանրահավաքում։ Այսօր ժողովրդի կողմից մերժված մարդիկ կան, մտածում են, որ իրենց շահերը պաշտպանելու համար ՍԴ են ստեղծել, դրան տվել են անսահմանափակ լիազորություններ, որպեսզի այն կայացնի իրենց համար բարենպաստ որոշումներ։ Չի՛ կարող լինել այդպիսի բան, որովհետև չի կարող լինել որևէ մարմին, որը վեր է ժողովրդից։ Հանրաքվեի շնորհիվ ևս մեկ անգամ վերահաստատելու ենք դա»,-ասել է Փաշինյանը։

Նա ընդգծել է, որ բոլոր ժամանակների համար մեկընդմիշտ պետք է պարզ լինի, որ ՀՀ-ում բարձրագույն իշխանությունը պատկանում է ժողովրդին և որևէ մեկն իշխանությունը ժողովրդից ոչ միայն չի կարող վերցնել, այլև չի կարող թակարդ կառուցել ինչ-որ հարմար պահի համար։

«Ժողովրդի իշխանությունը Հայաստանում այլևս որևէ մեկը չի կարող խլել, և ես չեմ ուզում ասել ու չեմ էլ ասի, որ ես դա թույլ չեմ տա, ուզում եմ ասել՝ համոզված եմ դուք դա թույլ չեք տա։ Ես ո՞վ եմ, ես ընդամենը ՀՀ-ի հպարտ քաղաքացի եմ։ Ամեն անհատ ունի իրավունք, բայց մեր ուժը մեր միասնության մեջ է, քաղաքացիների համախմբի, որը կոչվում է ժողովուրդ»,-շեշտել է վարչապետը։

Նրա գնահատմամբ, Հայաստանում չի կարող լինել որևէ մարմին, որը չի ներկայացնում ժողովրդին, իսկ ՍԴ-ն այսօր ժողովրդի ներկայացուցիչը չէ ու պետք է հեռանա. «Ինքը քոչարյանասերժական ժառանգության վերջին մնացորդն է Հայաստանում և ՍԴ-ն պետք է հեռանա»։

Աղբյուր` Փաստինֆո