Փաստ ինֆո

Մինչ Հայաստանում «Հանրաքվե» խորագրի ներքո նոր թատրոն-թամաշա է նախաձեռնել իշխանությունը, Արցախից ամեն օր ծանր ու ողբերգական լուրեր են ստացվում: Ազգի ամենաթանկ ու նվիրական էությունները, ազգի ապագան հնձվում է կասկածելի ու չպարզված հանգամանքներում, իսկ պահի իշխանությունը ապագայի մասին լոլոներ է կարդում՝ մարդկանց ուղեղները լվանալու նոր մանիպուլյացիաներ հնարելով:

Երբևէ չի եղել այնպես, որ 13 օրում 7 զոհ ունենանք բանակում, ընդ որում, ոչ պատերազմական պայմաններում: Ի՞նչ է սա նշանակում: Եվ արդյո՞ք սրա պատճառներից մեկն այն չէ, որ երկրի առաջ ծառացած ներքին և արտաքին մարտահրավերները, պաշտպանության և պաշտպանունակության հարցերը թողած, ՀՀ իշխանությունը դեպի Արցախ՝ Սորոսի զինվորյալ հ/կ-ներ է գործուղում, զուգահեռաբար էլ՝ Արցախի գեներալներին անվանարկելու՝ վաղօրոք սկսած կուրսին նոր թափ է հաղորդում:

ՈՒնենք անլուրջ ու ջրիկ իշխանություն, խորովածից մինչև հանրաքվեի թեմայով անտաղանդ հանգաթուխ վարչապետ, որի ուշքն ու միտքը հրապարակներում ներքին թշնամիների, սատանաների որոնումներում՝ հիշոցներով հագեցած ելույթներն են:

ՈՒ մեկ բան էլ՝ որտեղից գումար քամել, ինչպես լցնել բյուջեն, որ հետո որպես աշխատավարձ և պարգևավճար հոսեն ու հոսեն իր և իր շրջապատի գրպանները:

Ահավասիկ, հերթական աղբյուրն է գտել Փաշինյանը և հայտարարում է այդ մասին. « Արտերկրում գտնվող ՀՀ բազմաթիվ քաղաքացիներ պատրաստվում են հանրաքվեի ընթացքում գալ Հայաստան՝ քվեարկելու համար: Եվ մենք ոնց որ թե ստեղծում ենք տուրիզմի մի նոր տեսակ, որը կոչվում է ընտրական տուրիզմ»: Դե, իհարկե, մատչելի ուղղություններն էլ դրա համար էին՝ սուբսիդիոն կարգավիճակով:

Իսկ ժողովրդին Փաշինյանը թողնում է անշոշափելի ու վերացական աղբյուր, օրինակ՝ ապագայի նկատմամբ վստահությունը՝ որպես տնտեսության վրա ազդող հիմնական գործոն:

Ազգի ապագան՝ հայ զինվորները զոհվում են կասկածելի հանգամանքներում, դուք ի՞նչ ապագայից եք խոսում, պարոն Փաշինյան:

Ահավոր անլուրջ վիճակ է: Խրախճանք՝ ժանտախտի ժամին:

Մարինե Մինասյան

Աղբյուր` Փաստինֆո