Փաստ ինֆո

«Այս պահին զերծ կմնամ մեկնաբանել հրաժարականի տեքստը։ «Հրաժարականի տեքստը հրապարակվել է, բոլորը կարդացել են, ծանոթացել են և գնահատականները տվել են: Առաջիկայում, եթե անհրաժեշտություն առաջանա մեկնաբանել, անպայման կմեկնաբանեմ»,- այսօր լրագրողների հետ ճեպազրույցում ասել է ԱԱԾ արդեն նախկին տնօրեն Արթուր Վանեցյանը:

Նա հայտարարեց, որ իր բոլոր քայլերն անում է շատ գիտակցված և մտածված: «Ուզում եմ կոչ անել բոլորին՝ առհասարակ չփորձել, այսպես կոչված, պղտոր ջրում ձուկ որսալ, չփորձեն ինձ ներքաշել իրենց խաղերի մեջ: Ես այս մեկուկես տարիների ընթացքում, երբ եղել եմ ԱԱԾ տնօրեն, իրականացրել եմ իմ աշխատանքը պատվով, մեծ պատասխանատվությամբ, և դրական արդյունքները եղել են բոլորի համար ակնհայտ»,-հայտարարել է Վանեցյանը:

Ըստ նրա, ԱԱԾ-ի ձեռք բերած հեղինակությունն ու վարկանիշն իր համար ամենակարևոր արժեքն է:

«Նախկինների խանդավառությունը, որ նկատվում է երեկվանից, ուզում եմ ասել՝ մնան իրենց քաղաքական անցյալում և չփորձեն խառնվել իմ և գործող իշխանությունների ներկայիս հարաբերությունների մեջ: Այդ հարաբերությունները մենք գիտենք՝ ոնց են և ոնց կշարունակենք»,- հայտարարել է ԱԱԾ նախկին տնօրենը։

Անդրադառնալով վարչապետի խոսնակի հայտարարությանը, թե հայտարարության տեքստը գրել են «թյուրիմացաբար պատասխանատվությունից խուսափած փիար գրասենյակի պատասխանատուները», Վանեցյանն արձագանքել է. «Պաշտոնապես հայտարարում եմ, որ այդ տեքստը գրվել է իմ կողմից և խմբագրվել է իմ խորհրդական Արմեն Դավթյանի կողմից: Մենք միասին աշխատանք ենք կատարել այդ տեքստի վրա: Որևէ մեկը չփորձի ինձ կապել Միքայել Մինասյանի հետ, որովհետև Միքայել Մինասյանն ինձ համար մարդ է, որ պետք է շատ հարցերի պատասխան տա ՀՀ օրենքների առջև։ Կլինի քննություն, վարչապետը երեկ հայտարարեց, որ ընթանում է քննություն, և քննությունը պատասխան կտա՝ արդյո՞ք Միքայել Մինասյանը պետք է կանգնի օրենքի առջև, թե ոչ»:

Անդրադառնալով իր եւ վարչապետի հայտարարություններին, Վանեցյանն ասել է. «Վարչապետի հետ եղել են շատ լավ հարաբերություններ, մենք աշխատել ենք շատ լավ, չէի ցանկանա այլ մանրամասներ հայտնել»:

Հարցին, արդյո՞ք քաղաքականությամբ զբաղվելու ցանկություն ունի՝ Վանեցյանը պատասխանել է. «Երբ ես կայացրել եմ հրաժարականի որոշումը, ես չեմ խորհրդակցել որևէ քաղաքական ուժի հետ: Իմ հրաժարականի մասին ես խոսել եմ միայն իմ ընտանիքի՝ կնոջս, երեխաներիս և ծնողներիս հետ: Այդ որոշումը շատ մտածված էր, շատ հստակ էր եւ ես քաղաքականություն մտնելու կամ քաղաքական զբաղվելու հետ կապված այս պահին որևէ մեկնաբանություն չեմ անի:

Ես այս պահին կենտրոնանալու եմ մեր ֆուտբոլի զարգացման ուղղությամբ»:

Աղբյուր` Փաստինֆո