Փաստ ինֆո

«Նիկոլ Փաշինյանը Արցախի հարցում իր ապաշնորհ, հայեցակարգ չունեցող ու վտանգավոր  քաղաքականության արդյունքում հասել է նրան, որ ԵԱՀԿ ՄԽ համանախագահող  երկրների ներկայացուցիչները կամ նրանց արտաքին գերատեսչությունների ներկայացուցիչները հնչեցնում են գնահատականներ, որոնք այլեւս հավասարության նշան են դնում Հայաստանի  ու Ադրբեջանի հայտարարությունների միջեւ»,- «Փաստինֆո»-ի հետ զրույցում ասաց ԱԺ նախկին փոխնախագահ, ՀՀԿ խոսնակ Էդուարդ Շարմազանովը՝ անդրադառնալով ՌԴ ԱԳՆ խոսնակ Մարիա Զախարովայի հայտարարությանը։

Ինչպես տեղեկացրել ենք, Զախարովան մեկնաբանել է ՀՀ վարչապետ Փաշինյանի՝ Ստեփանակերտում արած «Արցախը Հայաստանն է, եւ վերջ» հայտարարությունը։

Զախարովան հայտարարել էր . «Հաշվի ենք առնում, ինչ խոսք, որ կան ներքաղաքական հռետորաբանություն, ներքաղաքական գործընթացներ, որոնցով պայմանավորվում են քաղաքական ուժերի, կուսակցությունների կարծիքները՝ նկատի ունենալով, որ մենք խոսում ենք ժողովրդավարական երկրի մասին։ Այնուամենայնիվ, շատ կցանկանայինք, որպեսզի բոլոր կողմերի հայտարարությունները համապատասխանեն խաղաղ կարգավորմանն ուղղված ջանքերի համատեքստին»։

Շարմազանովի խոսքով, գործող  վարչապետը սիրում է իր իշխանության շրջանը համեմատել նախկին իշխանությունների պաշտոնավարման ժամանակահատվածի հետ։ Զուգահեռներ այս անգամ Շարմազանովն անցկացրեց՝ նշելով. «Եթե նախկինում համանախագահող երկրները հիմնականում կշտամբում էին Ադրբեջանին՝ ապակառուցողական մոտեցման համար, եթե ՀԱՊԿ նախկին գլխավոր քարտուղար Բորդյուժան ժամանակին  Ադրբեջանի քաղաքականությունն անվանեց պրովոկացիա Հայաստանի նկատմամբ, եթե համանախագահները կոնկրետ կոչ էին անում Ադրբեջանին՝ իրականացնել Վիեննայի եւ  Սանկտ Պետերբուրգի պայմանավորվածությունները, երբ ամբողջությամբ մատնանշում էին ինքնորոշման իրավունքը, ապա այժմ Ռուսաստանը՝ որպես համանախագահող երկիր, առնվազն 2 դեղին քարտ է ցույց տալիս Փաշինյանին»։

Նախ, ըստ Շարմազանովի, ըստ էության  Զախարովան հայտարարեց, որ ՀՀ վարչապետը ոչ թե զբաղված է Արցախյան հիմնախնդրի կարգավորմամբ,այլ պոպուլիզմով եւ հայտարարություններ է անում  ներքաղաքական շրջանակների համար։ «Դուք տեսե՞լ եք այս տարիների ընթացքում, որ որեւէ երկրի ներկայացուցիչ Արցախի վերաբերյալ Սերժ Սարգսյանի արած որեւէ հայտարարության մասին ասի,որ դա ներքաղաքական շրջանակների համար էր։ Ի՞նչ է դա նշանակում, նրանց , ովքեր միջազգային խնդիրները տեղափոխում են ներքաղաքական հարթակ՝ դիվիդենտներ շահելու համար, անվանում են դասական պոպուլիստներ։ Մեղմ  ասած, Զախարովան ասել , որ Փաշինյանը պոպուլիստ է»-ասաց Շարմազանովը։

Ապա, Շարմազանովը հիշեց վարչապետ Փաշինյանի՝ Արցախյան հիմնախնդրի կարգավորման վերաբերյալ արած հայտարարությունները, մասնավորապես, նա հայտարարել էր, որ Արցախը պետք է վերադառնա բանակցային սեղան, բայց համանախագահները, ինչպես Շարմազանովը ձեւակերպեց, նրան ասացին, որ հանգիստ նստի տեղը։ Ապա, Փաշինյանը  հայտարարեց, որ Արցախում դավադիր ուժեր կան՝ դրանով իսկ, ըստ մեր զրուցակցի, Ադրբեջանի առջեւ պատերազմ սկսելու համար կանաչ լույս վառեց եւ վերջապես, հայտարարելով, որ «Արցախը Հայաստանն է եւ վերջ», Փաշինյանը օկուպանտ ճանաչեց Հայաստանին, ինչն ամենավտանգավորն է։

 «Արցախը Հայաստանն է եւ վերջ» հայտարարությամբ  Փաշինյանը քարտբլանշ է տալիս Ադրբեջանին։ Մամեդյարովը հանդիպել է Մեծ Բրիտանիայի դեսպանին եւ ապակառուցողականության մեջ է մեղադրել  Հայաստանին։ Նիկոլ  Փաշինյանին հաջողվեց այս 1.5 տարվա ընթացքում  Հայաստանն Ադրբեջանի հետ հավասար հարթության մեջ դնել»,-համոզված է ՀՀԿ խոսնակը։

«Նրա  յուրաքանչյուր հայտարարություն հայկական կողմերի դիրքերը բանակցային գործընթացում ոչ թե ամրապնդում, այլ թուլացնում է։ Հայաստանը երբեք չի ներկայացել որպես հակամարտող կողմ։ Հակամարտող կողմը Ղարաբաղի ժողովուրդն է»։

Շարմազանովի համոզմամբ, իրականում այսպես ասած, թավշյա հեղափոխության նպատակն է եղել չեզոքացնել հայ –ռուսական հարաբերություններն ու ռուսական ռազմաբազան դուրս բերել Հայաստանից, իսկ վերջում էլ Արցախում հասնել իշխանափոխության. «Նիկոլ Փաշինյանը ֆանտաստիկ քանդող է, հիմա էլ Արցախում է ուզում հեղափոխություն անել։ Դավաճանական քայլ է ՝ կասկածի տակ դնել Արցախի ժողովրդավարական ընտրությունները» ։

Զախարովայի հայտարարությունը, ըստ Շարմազանովի,  ազդակ է բոլոր առողջ ուժերին առ այն, որ Փաշինյանը պետք է հեռանա. «Նրա քաղաքականությունն Արցախյան հարցով մեր՝ թե դիվանագիտական, թե ռազմական հարաբերությունների փոշիացումն է»,-եզրափակեց Էդուարդ Շարմազանովը։

Աղբյուր` Փաստինֆո