Փաստ ինֆո

Գագիկ Ծառուկյանին մանդատից զրկելու հարցը հենց այս պահին բարձրացնելը պայմանավորված է 2 հանգամանքով. այն նախեւառաջ 2018թ.-ի ապրիլ-մայիս ամիսներից սկսված գործընթացի շարունակությունն է, երկրորդ՝ Ծառուկյանը այս պահին է հայտարարություններ արել բիզնեսի վերաբերյալ: ‹‹Փաստինֆո››-ի հետ զրույցում ասաց  «Քաղաքացու որոշում» կուսակցության խոսնակ Միքայել Նահապետյանը:

Հիշեցնենք, որ օրեր առաջ կուսակցությունը դիմել է ԱԺ  նախագահին և ՀՀ գլխավոր դատախազին՝  Գագիկ Ծառուկյանին՝ պատգամավորական մանդատից զրկելու եւ նրա նկատմամբ քրեական հետապնդում հարուցելու համար՝ նկատի ունենալով, որ Սահմանադրությունն արգելում է պատգամագորին ձեռնարկատիրական գործունեությամբ զբաղվել։

Մ.Նահապետյանի փոխանցմամբ՝  2018թ.-ի ապրիլ-մայիս ամիսներին իրենք ձեռնամուխ են եղել օլիգարխիկ համակարգի փլուզմանը, իսկ հեղափոխությունից հետո, հասկանալով, որ անցումային շրջան է, որոշակի ադապտացման կարիք ունեն նաև օլիգարխները, որոշել են հանդիպել նրանց հետ և ներկայացրել իրենց առաջարկը, որ գրեն օրենսդրական այն երաշխիքները, որոնց առկայության դեպքում իրենք կգան բիզնեսի դաշտ և չեն զբաղվի քաղաքականությամբ: Տարբեր քաղաքական ուժերի, այդ թվում ԲՀԿ-ի հետ հանդիպումներ են ունեցել նախընտրական փուլում՝ մինչեւ խորհրդարանական արտահերթ ընտրությունները։

‹‹Այս ամբողջ  գործընթացում իրենք ստացել են մեր ուղերձները: Նրանցից ոմանք որոշել են քաղաքականությանը չմասնակցել և զբաղվել միայն բիզնեսով, իսկ որոշներն էլ՝  անտեսել են ժողովրդի կամքն առ այն, որ Հայստանում օլիգարներ չեն լինելու և գնացել  բիզնես-քաղաքականություն սերտաճմանը››,-ասաց ՔՈ խոսնակը՝ նշելով, որ հիմա սկսել են պայքարի  երրորդ փուլը, երբ արձանագրում են իրենց ունեցած փաստերը:

‹‹Փաստինֆո››-ի դիտարկմանը, որը Պետական եկամուտների կոմիտեի նախագահի հայտարարության համաձայն Գագիկ Ծառուկյան անուն - ազգանունով գործարար գորյություն չունի՝ խո,սնակը հրաժարվեց մենկաբանել, ասելով՝ ‹‹ՊԵԿ նախագահի խոսքերը թող մեկնաբանի իր մամուլի խոսնակը, ես մի մեկնաբնության եմ սպասում, դա  քաղաքական առումով պարոն Արարատ Միրզոյանի մեկնաբնությունն է, իսկ իրավականով՝ գլխավոր դատախազ Արթուր Դավթյանինը››:

Հարցին, թե ինչու խորհրդարանական ուժերը Ծառուկյանին մանդատից զրկելու հարցը չեն բարձրացնում՝ Նահապետյանը ձեռնպահ մնաց ԱԺ մյուս երկու խմբակցությունների գործունեությանը գնահատական տալուց։  Անդրադառնալով այն հարցին, թե արդյոք իրենց հայտարարությանը միացել կամ հավանություն տվել են այլ կուսակցություններ՝ ՔՈ խոսնակն ասաց, որ  պառլամենտական ուժերը որևէ հայտարարություն չեն տարածել, սակայն  մի շարք պատգամավորներ իրենց աջակցությունն են հայտնել կամ առնվազն ասել են, որ այս գործընթացը իրենց համար ևս հասկանալի և ընդունելի է:

Արձագանքելով Իվետա Տոնոյանի՝ ‹‹Փաստինֆո››-ի հետ զրույցում ասված այն հայտարարության մասին, որ ՔՈ-ն պարզապես սեփական չգոյության մասին հիշեցնելու անհաջող փորձ է անում, Նահապետյանն ասաց, որ միայն ուրախությամբ կարող է արձանագրել, որ  իրենց և ԲՀԿ-ի պատկերացումները քաղաքական ուժի գոյության և չգոյության մասին չեն համապատասխանում:

‹‹Մենք կուսակցությունը չենք պատկերացնում Սերժ Սարգսյանի կամ այլ քաղաքական ուժի կողմից ցուցումներ կատարող կառույց, չենք պատկերացնում որպես  քաղաքական առևտրի կառույց, որը առք ու վաճառքի առարկա է դարձնում ինչպես տնտեսական որոշ արժեքներ, այնպես էլ իրենց քաղաքական կապիտալը››,-ասաց Նահապետյանը:

Խոսնակը ԲՀԿ-ին համարեց շոումեն և ասաց, որ ԲՀԿ-ի համար գոյություն ունի այն՝ ինչ աղմուկ է հանում:

‹‹Այդ մարդկանց հետաքրքրում է այն ինչ իրենց ցավեցնում ու աղմուկ է հանում, նման առիթներ դեռ շատ կունենան, եթե չգան և չխոսեն այն պայմանների, այն երաշխիքների  մասին, որի դիմաց դուրս կգան քաղաքականությունից››,-ասաց ՔՈ կուսակցության մամուլի խոսնակ Միքայել Նահապետյանը:

Մեր զրուցակիցը տեղեկացրեց, որ արդեն 4-րդ ամիսն է, ինչ  «ՔՈ»-ն դե յուրե սկսել է գործունեություն ծավալել,  իսկ այս պահին կուսակցության ներսում  կառուցվածքային ստորաբաժանումների ձևավորում է տեղի ունենում:

Հեղինակ` Սոնա Գեւորգյան