Փաստ ինֆո

«Իմ քայլը» խմբակցությունը դեռ չի հստակեցրել իր դիրքորոշումը՝  կապված ԲՀԿ ղեկավար Գագիկ Ծառուկյանին մանդատից զրկելու «Քաղաքացու որոշում» կուսակցության բարձրացված հարցի վերաբերյալ։  Այս մասին այսօր՝ ապրիլի 30-ին, լրագրողների հետ զրույցում նշեց «Իմ քայլը» խմբակցության պատգամավոր Ռուբեն Ռուբինյանը:

Նշենք, որ  ԱԺ նախագահ Արարատ Միրզոյանը  «Իմ քայլի» ղեկավար կազմի մասնակցությամբ հրավիրել էր աշխատանքային հանդիպում, որի ընթացքում ի թիվս այլ հարցերի քննարկվել է նաեւ  «Քաղաքացու որոշում» կուսակցության առաջարկը:

«Եղել են հայտարարություններ, որոնցից կարելի է ենթադրել, որ գուցե գործ ունենք շահերի բախման հետ, պետք է պարզել թե, արդյոք Ծառուկյանը քաղաքական գործիչ է, թե բիզնեսմեն: Բայց ես ինձ վրա պատասխանատվություն չեմ վերցնի որեւէ վերդիկտ կամ եզրակացություն տալու: Կարող եմ ասել, որ այո, կա որոշակի անհասկանալիություն: Իմ անձնական դիրքորոշումն այն է, որ պարոն Ծառուկյանի որոշ հայտարարություններ տարակարծությունների կամ կասկածների տեղիք են տալիս, եւ արժի հստակեցնել, թե ինչ են նշանակում այդ հայտարարությունները»,-ասաց Ռուբինյանը:

Նրա խոսքով, «Իմ քայլը» կունենա խմբակցության նիստ, կձեւավորի դիրքորոշում, գուցե դրա արդյունքում որոշակի գործընթացներ լինեն:

Լրագրողի այն հարցին, թե  ընտրությունների ժամանակ արդյոք կասկածներ չունեի՞ք, որ Ծառուկյանը գալով խորհրդարան, շարունակելու է զբաղվել ձեռնարկատիրական գործունեությամբ՝ իշխող խմբակցության պատգամավորն ասաց, թե   «Ինձ մոտ պարբերաբար կասկածներ առաջանում են տարբեր գործընթացների վերաբերյալ, բայց ի վերջո, այդ կասկածները բավարար չեն, պետք են փաստեր, պետք է  համակողմանի քննություն»:

Այն  հարցին, թե պատգամավորի կարծիքով Գագիկ Ծառուկյանը քաղաքական գործի՞չ է, թե՞ գործարար, Ռուբինյանն ասաց. «Քաղաքական գործիչ է, թղթաբանորեն նա ունի սեփականություն, թղթաբանորեն պաշտգամավոր դառնալուց առաջ իր բիզնեսները հանձնել է կառավարման, իսկ թե ինչպես է իրականում, ես հիմա պատասխանատվություն չեմ վերցնի անել պնդումներ, թե դա համապատասխանում է իրականությանը, թե ոչ»:

Աղբյուր` Փաստինֆո