Փաստ ինֆո

Մինչ նորաստեղծ՝ «Քաղաքացու  օր» տոնի անդրանիկ նշմանը հաշված օրեր են մնացել,  մեր  հասարակությունը ականատես-վկան է դառնում, թե ինչպես են հեղափոխության հարթակում կանգնած որոշ «հպարտ» քաղաքացիներ դիմակազրկվում են:

Թավշյա հեղափոխության պայքարի հիմնական  և գլխավոր դաշտը կոռուպցիայի դեմ պայքարն է, և ուրեմն, իշխանության ձևավորումից հետո այդ պայքարը գլխավորող պաշտոնյան պի՛տի որ դառնար կոռուպցիան բնում խեղդող  սուպերմենը, բայց ինչպես հանրությունը, այնպես էլ՝ հեղափոխության առաջնորդն ու երկրի վարչապետը այսօր տեսնում և արձանագրում են, որ Պետական վերահսկողական ծառայության պետ Դավիթ Սանասարյանը ոչ միայն հեռու է կոռուպցիայի դեմ անհաշտ պայքարող մարտիկ-սուպերմեն  լինելուց, այլև պետության ի պաշտոնե թիվ մեկ հակակոռուպցիոներն ինքը կասկածյալ է այն նույն քրեական գործի շրջանակում, որով անցնում էին իր ղեկավարած կառույցի երկու պաշտոնյաները:  Ավելին, իշխանության սորոսական թևի  կարկառուն ներկայացուցիչ համարվող Սանասարյանի նկատմամբ  խափանման միջոց է կիրառվել՝ չհեռանալու մասին ստորագրությունը : 

Մենք իհարկե, կարող ենք քաշվել մի կողմ և պարզապես հետևել, թե ինչ է հաջորդելու սրան, քանի որ արդեն տեսել ենք, թե ինչ է նախորդել: Իսկ ի՞նչ է նախորդել հարցի պատասխանը շատ տխուր է, քանի որ մեծ հաշվով նախորդող ողջ շրջանը  ներքին թշնամու որոնման ու թիրախներ  ընտրել-գտնելու  դրվագներով լեցուն է: Ցավոք, ներկան՝ նույնպես, բայց արդեն յուրայինների մեջ։

Մեր աչքի առաջ երկակի ստանդարտներով առաջնորդվող  Դավիթ Սանասարյանը՝ անմեղության կանխավարկածը չհարգելուց և անտեսելուց մինչև քննության ուղղորդմամբ է իր գործն առաջ տարել, չխորշելով կանխակալ ու կեղծ տեղեկատվության տարածումից անգամ ու հիմա, ճակատագրի հեգնանք որպես՝ ինքն է հայտնվել թակարդում: Կյանք է, ուր  բումերանգի օրենքը միշտ անվրեպ է գործում:

Ի դեպ, Դավիթ Սանասարյանի՝ որպես կասկածյալ ներգրավվելու հանգամանքը մի կողմից վկայում է, որ վարչապետ Փաշինյանը փորձում է օբյեկտիվ լինել, մյուս կողմից էլ՝  հեղափոխական իշխանության տարբեր շրջանակների՝ արդեն ընդհուպ միմյանց հանդեպ   թշնամաբար տրամադրված լինելու հանգամանքներն ուղղակի ջրի երես է հանում:

Մասնավորաբար, Դավիթ Սանասարյանին որպես կասկածյալ ներգրավելու մասին լուրը՝ լրահոսի թոփ թեմա լինելուզ զատ,  թոփ թեմա է դարձել նաև երիտհեղափոխականների  սորոսական թևի ներկայացուցիչների համար, վերջիններիս մղելով  մարտական քայլերի՝ մի շարք ուղղություններով:

Սորոսականները բոլորր հնարավոր միջոցներով տագնապի ազդանշան են հնչեցրել՝ ի պաշտպանություն Սանասարյան Դավթի՝ նետահարելով կոնկրետ ուղղությոմբ, այն է՝  ԱԱԾ-ի: Երբ ԱԱԾ-ն տեսանյութ էր հրապարակում Հայաստան Համահայկական հիմնադրամի նախկին գործադիր տնօրեն Արա Վարդանյանի մասին՝ նրան ներկայացնելով ընդհուպ որպես դարի հանցագործ, երբ քրեական գործ անգամ չկար հարուցված՝ նույն անձինք ծափահարում էին, ասում՝ կեցցե ԱԱԾ-ն, իսկ երբ կոնկրետ քրեական գործով ռեալ ապացույցներ կան հեղափոխական Դավիթ Սանասարյանի ղեկավարած կառույցում կոռուպցիոն դրսեւորումների վերաբերյալ, պարզվում է ԱԱԾ-ն ենթակա է կախաղանի, հանրապետության վարչապետից պահանջում են կոնկրետ քայլեր, ընդհուպ՝ ԱԱԾ պետի  աշխատանքից ազատում և Սանասարյանի  վրայից կասկածյալի պիտակի հեռացում ու վերացում:

Այսինքն, հեղափոխականների տանը կռիվ է ընկել ու բանը հասել է դիվանբաշուն: Այս և ՔՊ-ականների բազմաթիվ երկպառակությունների հարցում արբիտրի դեր կատարող Նիկոլ Փաշինյանն ի՞նչ որոշում կկայացնի, առաջիկայում պարզ կլինի, բայց, որ նա յուրայինների տարբեր թևերի կողմից էլ լուրջ  ճնշումների է ենթարկվում, ակնհայտ է: 

Հեղինակ` Արթուր Գահնապետյան