Փաստ ինֆո

Վերաքննիչ քրեական դատարանում այսօր՝ դեկտեմբերի 4-ին, շարունակվում է ՀՀ երկրորդ նախագահ Ռոբերտ Քոչարյանի խափանման միջոցի հարցի քննությունը: Այսօր պաշտպանական կողմը պետք է ներկայացնի միջնորդությունները։

Մինչ նիստի մեկնարկը ճեպազրույցում Քոչարյանի պաշտպանական խմբի անդամ Արամ Օրբելյանը հայտարարեց, որ միջնորդություն են ներկայացնելու Վերաքննիչ դատարան՝ Քրեական օրենսգրքի 300-րդ և 300.1-րդ հոդվածների՝ Սահմանադրականությունը պարզելու համար ՍԴ դիմելու  ւ հարցով։ Նշենք, որ Քոչարյանին հենց այդ հոդվածով է առաջադրվել մեղադրանք՝ 2008-ին Սահմանադրական կարգը տապալելու փորձի համար։

«Դիմում ենք դատարանին՝ գտնելով, որ այն իրավական նորմերը, որոնք կիրառվում են այս գործի շրջանակներում, հակասում են Սահմանադրությանը և խնդրում ենք դիմել Սահմանադրական դատարան։ Կամ եթե դատարանը համոզված կլինի, որ հակասում են, ուրեմն չպետք է դրանք կիրառի», - նշեց Օրբելյանը։

Փաստաբաններից Հայկ Ալումյանը ներկայացնելիք միջնորդության վերաբերյալ ասաց, որ իրենք գտնում են, որ Քրեական օրենսգրքի 300-րդ հոդվածը, այն խմբագրմամբ, որը գոյություն ուներ 2008-ին, հակասահմանադրական էր։

«Կախված այս միջնորդության ելքից՝ ևս մեկ միջնորդություն կարող է լինել Սահմաանդրական դատարանի հետ կապված։ Դրանից բացի, որոշ նյութեր ենք ցանկանում ներկայացնել», - ասաց Ալումյանը։

Նշենք, որ Վերաքննիչ դատարանն արդեն 5-րդ օրն է շարունակում է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ բողոքի քննությունը: Ռ.Քոչարյանը մեղադրվում է «Մարտի 1»-ի քրեական գործով՝ սահմանադրական կարգը տապալելու մեջ։

Հիշեցնենք՝ Վճռաբեկ դատարանը նոյեմբերի 15-ին բեկանել էր Քոչարյանի վերաբերյալ Վերաքննիչ դատարանի օգոստոսի 13-ի որոշումը և գործն ուղարկել նույն՝ Վերաքննիչ դատարան նոր քննության: Գլխավոր դատախազ Արթուր Դավթյանը վճռաբեկ բողոքում Վճռաբեկ դատարանից պահանջել էր բեկանել Վերաքննիչ դատարանի որոշումը և ուժի մեջ ճանաչել Երևանի ընդհանուր իրավասության դատարանի որոշումը, այսինքն՝ Քոչարյանի նկատմամբ խափանման միջոց ընտրել կալանավորումը, ինչը վերաքննիչ դատարանը վերացրել էր անձեռնմխելիության հիմքով։

Աղբյուր` Փաստինֆո