Փաստ ինֆո

Մեկ շաբաթ առաջ Ընտրական օրենսգիրքն անփառունակ տապալվեց այս դահլիճում: Այս մասին Ազգային ժողովում հայտարարեց «Հանրապետական» խմբակցության պատգամավոր Արմեն Աշոտյանը։

«Գործող իշխանությունները գտան ձևը ոնց հետ բերեն տապալված Ընտրական օրենսգիրքն այս դահլիճ», - ասաց նա։

Արմեն Աշոտյանն ասաց, թե հարգում է այն պատգամավորների սահմանադրական իրավունքի իրացումը, որոնք նախաձեռնել են ԱԺ այսօրվա նիստը. «Սակայն այս քննարկման ու իմ կարծիքի հիմնական թիրախը դուք չեք, այլ՝ բացառապես ՀՀ կառավարությունն ու վարչապետի քաղաքական պատասխանատվությունը»։

Արմեն Աշոտյանն ընդգծեց՝ Ընտրական օրենսգիրքը դռներից հանեցին, ծխնելույզից նորից մտավ խորհրդարան։

«Վարչապետն էլ երևի հիմա նստած, նայում է, մտածում, թե ՀՀԿ-ն Հուլիոս Կեսարն է, «Ծառուկյան» դաշինքը, «Ելք»-ը, ՀՅԴ-ն գալլական ցեղեր են՝ հեսա իրար կուտեն, ինքն իր կայսրությունը կընդլայնի», - ասաց նա՝ հավելելով. «Չի լինելու նման բան, պարոն վարչապետ: Այս քաղաքական պատասխանատվությունը բացառապես Ձեզ վրա է՝ անկախ նրանից, թե քանի պատգամավոր կմոբիլիզացնեք այսօր քվեարկության համար»։

Արմեն Աշոտյանը միաժամանակ ասաց, որ քաղաքական կոնսենսուս չկա։

«ՀՀԿ-ն դեմ է քվեարկելու, բոլոր այն կարծիքները, որ կոնսենսուս մինուս մեկ է, թերի քաղաքական արժեք են ստանում հատկապես երկրում հանդուժողականության և քաղաքական կոսնսոլիդացիայի տեսակետից»,- ասաց նա և հավելեց, որ այլակարծությունը պետք չէ սաբոտաժ կոչել, այլ դա քաղաքական դիրքորոշում է, իսկ Ընտրական օրենսգրքի փոփոխությունները հրամցնել որպես ժողովրդավարական բարեփոխում՝ ծաղր է ժողովրդավարության հանդեպ։

«Եվրոպայի խորհրդի անդամ որևէ երկրում ընտրություններից 42 օր շուտ Ընտրական օրենսգիրք չեն փոխում, ժողովուրդ, ինչքան ուզում եք այստեղ իրար ու հասարակությանը փորձեք համոզել, չեն փոխում: Հայաստանը դառնալու է, երևի թե, առաջինը նախադեպային տեսակետից Եվրոպայի խորհրդի ողջ տարածքում, որ ընտրություններից 42 օր առաջ փոխում է Ընտրական օրենսգիրք», - ասաց նա։

Արմեն Աշոտյանն ընդգծեց՝ ավելի քան վստահ է, որ գործադրվել են բոլոր լծակները՝ ապահովելու համար ձայներ։

«Առաջին փոխվարչապետն ասում է ճնշում չեմ գործադրել, զանգել եմ տեսնեմ՝ ոնց են: Հարգելի պարոն Միրզոյան, բա ինձ խի՞ չես զանգել տեսնես՝ ես ոնց եմ, մի անգամ sms ես ուղարկել ապրիլին՝ հեղափոխության օրերին, տեսել ես, որ չի կպնում, կներես արտահայտությանս համար, Արարատ ջան, տեսել ես, որ չի ստացվում, էլ իմ ողջությունը քեզ չի՞ հետաքրքրում, քեզ հետաքրքրում է միայն այն մարդկանց ողջությունը, ով կարող է պոտենցիալ կողմ քվեարկել այդ ընտրական օրենսգրքին», - ասաց նա:

Արմեն Աշոտյանի խոսքով՝ իր համար այսօրվա քաղաքական ակտը հոկտեմբերի 2-ի շարունակությունն է ՝ խորհրդարանը մնում է պաշարված գործադիր իշխանության կողմից։

Աղբյուր` Փաստինֆո