Փաստ ինֆո

Սա իրավունքի ինքնապաշտպանություն է. եթե երկրում չկա խախտված իրավունքների իրավական պաշտպանության միջոց, մարդը ստիպված է լինում դիմել ինքնապաշտպանության: ՀՀ վարչապետի ընտրությանը նվիրված ԱԺ հատուկ նիստում այսպես բնորոշեց Հայաստանում ստեղծված իրավիճակն ԱԺ «Ելք» խմբակցության անդամ Արտակ Զեյնալյանը:

Դիմելով ՀՀԿ պատգամավորներին՝ ընդդիմադիր խմբակցության պատգամավորը նշեց, որ «ձեր ելույթներում խոսում եք այն համոզմունքով, որ Հանրապետական կուսակցությունն երբեք չի լինելու քաղաքական փոքրամասնություն»: Ինչ է ասում Նիկոլ Փաշինյանը՝ ժողովուրդը պետք է ձևավորի քաղաքական կամքն արտահայտող օրենսդիր մարմին, դրա համար ներկայիս օրենսդիր մարմինը պետք է ցրել: Ն.Փաշինյանի առաքելությունն է ժամանակավոր կառավարությունը ղեկավարել, նախապատրաստել երկիրն, օրենքները արտահերթ խորհրդարանական ընտրություններին:

Պատգամավորը հարց տվեց՝ կարո՞ղ է, արդյոք, Հանրապետական կուսակցությունն ապահովել արդար ընտրություններ, քանի՞ այդպիսի ընտրություն է ապահովել: Չի կարող, որևէ մեկը, այդ թվում՝ հրապարակում կանգնած մարդիկ, չեն հավատում դրան:

Համոզմունք հայտնելով, որ Հայաստանում կան քաղբանտարկյալներ, Արտակ Զեյնալյանն արձանագրեց, որ Վարդան Մալխասյանի, Արամ Սարգսյանի, Կարապետ Ռուբինյանի գործերով ՍԴ որոշումներով, Ժիրայր Սեֆիլյանի գործով Եվրոպական դատարանի վճռով, մի շարք այլ վճիռներով հաստատվել է իրավունքի խախտումը՝ ի՞նչ նպատակ է հետապնդել նրանց իրավունքի խախտումը, եթե ոչ քաղաքական նպատակ: 95% կալանքների միջնորդությունները բավարարվում են, եթե քաղաքական նպատակ չեն հետապնդում, ապա ի՞նչ նպատակ են հետապնդում: Մարդը ինչ ձևով պետք է իրավունքները պաշտպանի, եթե ոչ փողոց դուրս գալով, եթե ընտրություններով հնարավոր չէ ձևավորել կամքն արտահայտող օրենսդիր մարմին, ասաց Արտակ Զեյնալյանը:

Այսօրվա քաղաքական մեծամասնությունն ընտրական իրավունքը չի ապահովում, նաև միաձուլված են կուսակցական, տնտեսական ու պետական շահերը՝ սա 2013թ. ՍԴ որոշում է, ի՞նչ է արել քաղաքական մեծամասնությունը խնդիրը լուծելու համար:

Աղբյուր` Փաստինֆո