Փաստ ինֆո

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանի պաշտպանը միջնորդեց Զադոյանի նկատմամբ որպես խափանման միջոց ընտրված կալանավորումը փոփոխել:

Երևանի ընդհանուր իրավասության դատարանում այսօր Զադոյանի պաշտպան Հրանտ Անանյանը միջնորդեց փոխել իր պաշտպանյալի նկատմամբ ընտրված կալանավորումը և ընտրել անազատության հետ չկապված խափանման միջոց կամ կալանավորումը փոխարինել գրավով՝ գրավի չափ սահմանելով 1 մլն դրամ կամ այն գումարը, որը կսահմանի դատարանը:

Միջնորդության վերաբերյալ կողմերը կարծիքներ կհայտնեն հաջորդ դատական նիստում, այսօր աշխատանքային օրվա ավարտով պայմանավորված նիստը հետաձգվեց:

Իսկ մինչ այդ ավագ քննիչ Զադոյանի պաշտպանները ներկայացրեցին այլ միջնորդություններ, մասնավորապես, սույն քրեական գործին կցել քննիչ Զադոյանի վարույթում եղած Սոս Գասպարյանի վերաբերյալ գործից պատճենահանված եւ  Էրեբունի և Նուբարաշեն վարչական շրջանների դատախազին հասցեագրված, ինչպես նաև ՀՀ ոստիկանության էրեբունի բաժնի պետին հասցեագրված գրությունների լուսապատճենները:

Մեղադրողը ներկայացված փաստաթղթերը քրեական գործին կցելու առարկությամբ հանդես չեկավ, սակայն նշեց, որ փաստաթղթերի վերաբերյալ հետագայում հայտարարությամբ հանդես կգա:

Միջնորդությունը բավարարվեց, փաստաթղթերի պատճենները կկցվեն գործին և դատարանը դրանց կանդրադառնա փաստաթղթերի հետազոտման փուլում:

Զադոյանի մյուս պաշտպան Ամիրխանյանը ներկայացրեց մեկ այլ միջնորդություն:

Գործով հարցաքննվել է էրեբունի և Նուբարաշեն քննչական բաժնի պետի տեղակալ Բունիաթ Եղիազարյանը, վերջինս Զադոյանի գործով հարցաքննվել է որպես վկա, առերես հարցաքննվել  ամբաստանյալ Բաբկեն Գասպարյանի և Հովհաննես Գասպարյանի հետ, որից հետո որպես մեղադրյալ է ներգրավվել և նրա նկատմամբ որպես խափանման միջոց է ընտրվել չհեռանալու մասին ստորագրությունը:

Զադոյանի գործով Բունիաթ Եղիազարյանը դատակոչի ցուցակում ընդգրկված չէ այն դեպքում, երբ նա բազմիցս հարցաքննվել է և հանդիսացել  Զադոյանի անմիջական ղեկավարը, նրա ցուցմունքներով հերքվել են Բաբկեն Գասպարյանի պնդումներն այն մասին, թե  Զադոյանը գնացել և Բունիաթ Եղիազարյանին կանչել է իր աշխատասենյակ, և ոչ միայն դա:

Վարույթն իրականացնող մարմինը ոչ միայն միտումնավոր նրան դատակոչի ցուցակում չի ընդգրկել, այլև մեղադրական եզրակացության մեջ չի անդրադարձել նրա ցուցմունքներին:

Ըստ պաշտպանի՝ Բունիաթ Եղիազարյանին դատարանում չհարցաքննելու պարագայում խախտվելու է նաև մարդու իրավունքների և հիմնարար ազատությունների մասին կոնվենցիայի 6-րդ հոդվածով սահմանված իրավունքը:

Պաշտպանը միջնորդեց՝ գործով դատակոչի ցուցակում ընդգրկել նախաքննության ընթացքում հարցաքննված Բունիաթ Եղիազարյանին:

Միքայել Զադոյանի մյուս պաշտպան Հրանտ Անանյան էլ իր հերթին նշեց, որ Եղիազարյանի անունը նշված է Զադոյանի նախաքննական մեղադրանքի մեջ որպես խմբի կազմում նախնական համաձայնությամբ կաշառք ստացած անձ:

Բացի այդ՝ ըստ պաշտպանի՝ մեղադրական եզրակացությունը կազմված է օրենքի խախտմամբ, եզրակացության մեջ պետք է ընդգրկված լինեն մեղադրյալին ի պաշտպանության բերված ապացույցները:

Ամբաստանյալի աթոռին հայտնված փաստաբան Գայանե Գալոյանի պաշտպան Հոբոսյանը ևս միացավ միջնորդությանը՝ կարեւորելով դատարանում  Բունիաթ եղիազարյանի հարցաքննությունը:

Սակայն մեղադրողն այլ կարծիք ուներ՝ գտավ, որ հարկ է միջնորդությունը հետաձգել:

Դատարանը՝ նախագահությամբ Մեսրոպ Մակյանի, բավարարեց միջնորդությունը՝ գտնելով, որ Բունիաթ Եղիազարյանի առնչությունը սույն գործին ակնհայտ է և նրա ցուցմունքները կարող են նշանակություն ունենալ դատարանի համար:

Հաջորդ միջնորդությամբ էլ պաշտպանական կողմը դատարանին խնդրեց գործին կցել ենթադրյալ դեպքի ժամանակ Զադոյանի վարույթում եղած գործերի ծանրաբեռնվածության վերաբերյալ փաստաթուղթը:

Պաշտպանական կողմի հարցմանն ի պատասխան էրեբունի և Նուբարաշեն քննչական բաժնի պետ Գոյունյանը հայտնել էր, որ 2017թ. հունիս 19-ի դրությամբ Զադոյանի վարույթում քննվել են 16 քրեական գործ:

Այդ գործերից մեկով Զադոյանը հեռախոսազրույց է ունեցել փաստաբան Գալոյանի հետ և նրան ասել, որ հնարավորինս շուտ ներկայանա քննչական բաժին՝ քննչական գործողություն կատարելու նպատակով, քանի որ ծանրաբեռնված է իր վարույթում ունեցած գործերով: Ըստ պաշտպանի՝ այս հանգամանքը անտեսվել է վարույթն իրականացնող մարմնի կողմից:

Ըստ մեղադրող Արա Մնացականյանի՝ ներկայացվող փաստաթուղթը որևէ կերպ վերաբերելի չէ քննվող գործին և առարկեց միջնորդությանը, ինչին ի պատասխան պաշտպան Անանյանն ասաց՝ մեղադրողի հայտարարությունը վերաբերելի չէր իրենց միջնորդությանը:

Դատարանը գտավ, որ գործին փաստաթղթի վերաբերելիության վերաբերյալ այս պահին դատողություններ անելը վաղաժամ է: Բավարարելով միջնորդությունը՝ դատարանը փաստաթղթերը կցեց գործին:

Հաջորդ միջնորդությունը վերաբերում էր Զադոյանի ողջ գույքի վրա դրված կալանքին, պաշտպանական կողմը միջնորդեց ազատել Զադոյանի գույքերի վրա դրված կալանքը՝ պահպանելով միայն մեկինը:

Պաշտպանական կողմը գնահատման է ներկայացել Զադոյանի գույքերից մեկը, մասնավորապես ավտոմեքենան, որի շուկայական արժեքը կազմում է 1 մլն 350 000 դրամ: Ըստ պաշտպան Անանյանի՝ սա արդեն իսկ բավարար է բռնագրավումը ապահովելու համար, ուստիև միջնորդեց գույքի մի մասն ազատել կալանքից, միևնույն ժամանակ դատարանի դեպոզիտ հաշվին 101 000 ՀՀ դրամ վճարելուց հետո:

Պաշտպան Ամիրխանյանի խոսքով՝ գույքի բռնագրավումը չի կարող գերազանցել 3000 դոլարը, հանցագործության առարկան 3000 դոլար է, բայց վարույթն իրականացնող մարմնի կողմից 300 000 դոլարի չափով կալանք է դրվել:

Այս միջնորդության վերաբերյալ էլ մեղադրողը կարծիք հայտնեց, որ դատաքննության ընթացքում հնարավոր է ի հայտ գան դատական ծախսեր և միջնորդեց մերժել:

Դատարանը պաշտպանական կողմից պահանջեց, որպեսզի այդ գույքի գնահատման վերաբերյալ կազմակերպության լիցենզիան տրամադրվի: Միևնույն ժամանակ նաև նշեց՝ չի բացառվում, որ այդ ավտոմեքենայի արժեքը շուկայում իջնի: Միջնորդության լուծումն այս փուլում հետաձգվեց:

Հաջորդ դատական նիստը տեղի կունենա փետրվարի 6-ին:

Աղբյուր` Փաստինֆո