Փաստ ինֆո

«Սասնա Ծռեր»-3-ի գործով այսօրվա դատական նիստում առողջական խնդիրներ ունեցան ամբաստանյալներ Կարո Եղնուկյանն ու Խաչատուր Գիչյանը:

Դատարանի կանչով շտապօգնության բժիշկն արձանագրեց, որ Կարո Եղնուկյանի արյան ճնշումը հասել է 220/120-ի և անհապաղ նրան անհրաժեշտ է տեղափոխել հիվանդանոց:

Խաչատուր Գիչյանի մոտ էլ արձանագրվել էր բարձր ճնշում՝ 240/140: Բուժօգնությունից հետո բժիշկն արձանագրել էր՝ «ներկա պահին ճնշումը ստաբիլ է»:

Մինչ այդ Կ.Եղնուկյանի պաշտպան Տիգրան Հայրապետյանը բացարկի միջնորդություն ներկայացրեց դատախազին՝ նշելով, որ դատախազը անկողմնակալ չէ, ունի ընդգծված բացասական վերաբերմունք իր պաշտպանյալի հանդեպ: «Մենք չենք ունեցել հսկողություն իրականացնող դատախազ»,- ասաց պաշտպանը:

Իսկ նրա պաշտպանյալ Կարո Եղնուկյանը հայտարարեց, որ կալանավորումը վերացնելու և իր մասով գործից մաս անջատելու իրենց միջնորդությունների վերաբերյալ դատարանը կամ նրա փոխարեն որոշողը նիստից առաջ արդեն իսկ որոշում կայացրել էր: «Ուզում եք 3-5 տարի տանեք-բերեք դատարան և լսեմ վկաների, ովքեր կապ չունեն ինձ հետ»,- ասաց ամբաստանյալը:

Գործով նախագահող Արտուշ Գաբրիելյանն արձագանքեց՝ «որոշում ընդունողն ես եմ»:

Ամբաստանյալը նաև հայտարարեց, որ այլևս չի մասնակցելու դատական նիստերին՝ արդեն դատավճիռ կայացրել եք՝ 3-5 տարի: «Դուք նոտարի պես վավերացնում եք այն, ինչ դատախազն է ասում»,- ասաց ամբաստանյալը:

Կ.Եղնուկյանն ընդգծեց, որ կյանքում երկրորդ անգամ այդ միջնորդությունների մերժումից հետո իր ճնշումը բարձրացել է՝ իրավիճակն ազդել է իր առողջության վրա, նիստերին մասնակցելը հակացուցված է իրեն: «Եթե ես մասնակցեմ, ինքնասպանություն եմ գործելու: Էշ նահատակ դառնալ դատարանում չեմ պատրաստվում: … Ձեր խղճի վրա կլինի իմ մահը»,- հայտարարեց Կարո Եղնուկյանը:

Պաշտպանական կողմից հայտարարություն հնչեց, որ Կարո Եղնուկյանի հանդեպ անմարդկային վերաբերմունք է դրսևորվում, նա ենթարկվում է քաղաքական հետապնդման և քաղաքական հաշվեհարդարի:

Դատարանը մերժեց դատախազին բացարկ հայտնելու միջնորդությունը՝ մինչ այս որոշումը կայացնելու համար դատարանի՝ խորհրդակցական սենյակ հեռանալը Կ.Եղնուկյանը հեռացել էր դատական նիստերի դահլիճից վատ ինքնազգացողության պատճառով: Քանի որ նա խնդրել էր դատարանից նիստն անցկացնել իր բացակայությամբ, դատական նիստը շարունակվեց:

Մասնավորապես, դատարանը մերժեց պաշտպանական կողմի միջնորդությունը 11 ամբաստանյալի մասով երկու գործերի երկու մեղադրական եզրակացությունների փոխարեն մեկ ամբողջական մեղադրական եզրակացություն կազմելու մասին պաշտպանական կողմի միջնորդությունը: Ըստ դատարանի, օրենքով որևէ նորմ չկա, որը պարտադրի դատախազներին երկու գործերի միավորման դեպքում մեկ ամբողջական մեղադրական եզրակացություն կազմել:

Դատարանն անդրադարձավ նաև պաշտպան Մուշեղ Շուշանյանի դիտարկմանը, ըստ որի առաջին ատյանի դատարանը նախկինում նման որոշում կայացրել է, այսինքն՝ կա ամբողջական մեղադրական եզրակացություն կազմելու նախադեպ: Ըստ դատարանի, նախադեպային որոշումներ կայացնում է միայն Վճռաբեկ դատարանը: Բացի այդ, հիշյալ որոշումը կայացվել է այն ժամանակ, երբ Հայաստանում գործում էր լրացուցիչ նախաքննության ուղարկելու ինստիտուտն՝ այն այլևս չի գործում, քանի որ Սահմանադրական դատարանի կողմից ճանաչվել է որպես Սահմանադրությանը հակասող և անվավեր:

Դատարանը մերժեց պաշտպաններ Արա Ղարագյոզյանի ու Աննա Ջուվանովայի միջնորդությունները իրենց պաշտպանյալներ, համապատասխանաբար՝ Մանվել Աթոյանի և Խաչատուր Գիչյանի խափանման միջոցը վերացնելը մասին: Աննա Ջուվանովան միջնորդում էր նաև քննել գրավը թույլատրելի ճանաչելու հարցը:

Մանվել Աթոյանը միացավ իր պաշտպանի միջնորդությանը և նշեց, որ իր երեխայի մոտ առողջական խնդիրներ են առաջացել, եթե ինքը թաքնվի քննությունից, ապա իր ձեռքով իր ընտանիքին կմատնի անտերության և որ իր երեխան կարող է բուժվել միայն իր աջակցությամբ: Իսկ Խաչատուր Գիչյանի պաշտպանը դատարանի ուշադրությունը հրավիրեց իր պաշտպանյալի տարիքի ու վատառողջ լինելու վրա:

Լուսանկարը՝ ֆոտոլուրի

Աղբյուր` Փաստինֆո