Փաստ ինֆո

Իսպանիայից Կատալոնիայի անջատվելու օգտին են քվեարկել հանրաքվեի մասնակիցների 90 տոկոսը: Այս մասին, ըստ ՌԻԱ Նովոստիի, հայտարարել է Կատալոնիայի Ժեներալիտատի պաշտոնական ներկայացուցիչ Ժորդի Տուրուլը:

Ընդհանուր առմամբ հանրաքվեին մասնակցել է 2,3 մլն մարդ՝ ձայնի իրավունք ունեցող 5,3 մլն-ից:

Ըստ Ժեներալիտատի ներկայացուցչի, դրանք նախնական տվյալներ են, քանի որ դեռևս չի հաշվվել 50 հազար ձայն:

Անկախության դեմ քվեարկել է տեղամասեր եկած ընտրողների 7,8 տոկոսը, երկու տոկոսը քվեատուփ դատարկ քվեաթերթիկներ են գցել, քվեաթերթիկների 0,89 տոկոսը փչացած է եղել:
Կատալոնիայի կառավարության ղեկավար Կարլես Պուչդեմոնը հանրաքվեի արդյունքները տպավորիչ է գնահատել: Նա կոչ է արել Եվրամիությանը չանտեսել իսպանական ոստիկանության կողմից թույլ տրված մարդու իրավունքների խախտումները և Մադրիդի հետ երկխոսության պատրաստակամություն է հայտնել:

Կիրակի օրը Կատալոնիայում անց է կացվել Իսպանիայից անկախանալու հանրաքվե, որը Մադրիդը համարում է անօրինական և որի անցկացումը արգելել է թագավորության Սահմանադրական դատարանը: Ոստիկանության (որը փորձել է հսկողության տակ վերցնել ընտրական տեղամասերը) հետ բախումների ընթացքում տուժել է 800-ից ավելի մարդ:

Աղբյուր` Փաստինֆո