Փաստ ինֆո

Փաստաբանական համայնքում ստեղծված լարված իրավիճակի լուծման նպատակով ՓՊ նախագահի թեկնածու Արա Զոհրաբյանը ընտրություններից հետո ևս մեկ անգամ կփորձի համերաշխության կոչ անել, իսկ թե իրենց ընդդիմադիր համարող փաստաբաններն ընդառաջ կգնա՞ն, դա պարզ կլինի օրեր անց: Այս և այլ հարցերի շուրջ «Փաստինֆո»-ն զրուցել է Արա Զոհրաբյանի հետ:

- Պրն Զոհրաբյան, առջևում ՓՊ նախագահի ընտրություններն են։ Շատ կարճ, մեկ նախադասությամբ ինչպես այսօր կբնութագրեք փաստաբանական համայնքում ընդհանրապես, պալատում՝ մասնավորապես տիրող իրավիճակը։

- Փաստաբանական համայնքում նորմալ վիճակ է տիրում:

-  Նախքան ՓՊ նախագահ ընտրվելը՝ նույն համայնքում հանդես եք եկել որպես փաստաբան. իրավիճակի գնահատականը, առկա խնդիրների նկատմամբ մոտեցումները փոխվե՞լ են:

- Խնդիրները հիմնականում նույն են: Փաստաբանների հակառակորդ կողմում գտնվող պետական մարմինները փորձում են հակազդել՝ դրանից բխող հետևանքներով: Երբեմն այդ հակազդեցությունները ստացվում են, հաճախ՝ չեն ստացվում: Բոլոր դեպքերում մեր փաստաբանները կարողանում են համարժեք հակահարված տալ: Հիմա տեղեկատվությունն առավել մատչելի է և նույնիսկ փոքրիկ շեղում նկատելիս կարելի է մեծ աղմուկ բարձրացնել և այն շտկել:

- Նախորդ ընտրություններում՝ Դուք հաղթեցիք ձայների զգալի տարբերությամբ։ Ճիշտ է, մրցակից չունեք այս անգամ, բայց կհաջողվի պահպանե՞լ նշաձողը։

- Դա ցույց կտան ընտրությունների արդյունքները:

- Ինչպե՞ս եք տեսնում փաստաբանական համայնքում ստեղծված լարված իրավիճակի լուծումը: Միմյանց ընդառաջ քայլելու եզրեր տեսնո՞ւմ եք։

- Ընտրություններից հետո ևս մեկ անգամ կփորձեմ համերաշխության կոչ անել, եթե ընդառաջ եկան լավ, եթե ոչ՝ իրենք գիտեն: Փոքրաթիվ փաստաբանները երբեք չեն կարող և չպետք է կարողանան ցնցել փաստաբանների պալատը: Այսօր փաստաբանական գրասենյակներ են գործում, որոնք 50-ից ավելի աշխատող ունեն: Ինչ է ստացվում, որ մեկ գրասենյակ կարող է «ահաբեկել» փաստաբանների պալատին: Չի կարող այդպիսի բան լինել:

- Ընտրություններից մի քիչ շեղվենք և անդրադառնանք զննություն-խուզարկություն խնդրին։ Չե՞ք կարծում, որ հարցը փոքր ինչ արհեստական է ուռճացվում։

- Սկզբնական շրջանում իրոք խնդիր կար: Հետագայում մի քիչ չափազանցված էր ներկայացվում:

- Հայտարարվեց, որ փաստաբանների մի խումբ գործադուլ է պատրաստում անել սեպտեմբերի 13-ին՝ դատարաններում խուզարկությունների դեմ իրենց բողոքն արտահայտելով, արդյո՞ք սա բխում է պաշտպանյալների, վստահորդների շահերից, քանի որ գործադուլի հետևանքով փաստաբանները դատական նիստերի չեն ներկայանա:

- Ոչ մեկին գաղտնիք չէ, որ փաստաբանները ոչ միայն հնչեղություն ստացած քրեական գործերով են պաշտպանություն իրականացնում, այլ նաև՝ շատ ու շատ այլ գործերով։ Արդյոք բոլոր պաշտպանյալների հետ է համաձայնեցվել և ստացվել նրանց համաձայնությունը, թե տվյալ պարագայում նրանց իրավունքները երկրորդվում են։

Երբ փաստաբանը «գործադուլ» է անում, դա նշանակում է, որ հրաժարվում է իր վստահորդների շահերը ներկայացնելուց: Այդ բողոքի ակցիայով ըստ էության ճնշում է գործադրվում պետական մարմինների վրա՝ պարալիզացնելով նրանց աշխատանքը՝ զիջումներ կորզելու նպատակով: Գործադուլի նախաձեռնողները ցավոք իրենց հայտարարության տեքստում նշել են, որ հասցեատեր չունեն: Երկրորդ, նշել են, որ անհետաձգելի դեպքերում կմասնակցեն նիստերին: Որպես իրավապաշտպան՝ շատ ճիշտ դիրքորոշում են հայտնել, բայց որպես բողոքի ակցիայի մոտեցում՝ սա հետքայլ է: Պատկերացրեք՝ երբ բողոքի ակցիայի մասնակիցը տեսնի, որ նախաձեռնողն այդ օրը մասնակցել է նիստի, մինչդեռ ինքը չի մասնակցել և պրոբլեմներ է ունեցել իր վստահորդի հետ: Բացի այդ, քաղաքացիական և վարչական գործերով փաստաբանները կդժվարանան այդ ակցիային մասնակցել, քանի որ առանց իրենց ներկայության դատարանը կարող է գործը քննել, իսկ վստահորդը՝ վնաս կրել և վնասի հատուցում պահանջել փաստաբանից:

Եթե նախաձեռնողներն իրականում ցանկանում էին մասշտաբային բողոքի ակցիա կազմակերպել, ապա լավ կլիներ նախ դիմեին փաստաբանների պալատին, քննարկեինք, ծրագիր մշակեինք, որի մեջ մինչև գործադուլը անպայման կլիներ հետևյալ քայլերի հաջորդականությունը՝ դիմել իրավապահ մարմիններին, վերադասությամբ բողոք բերել և նոր անցնել այդ ծայրահեղ քայլին: Սրանով առավել շատ փաստաբանների կարելի էր հավաքել այդ գաղափարի շուրջ: Ինչևէ, անձամբ հարգում եմ իրենց որոշումը և պատրաստակամություն եմ հայտնել իրենց ակցիայի համար տրամադրել դահլիճ:

Աղբյուր` Փաստինֆո