Փաստ ինֆո

2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու գործով մեղադրյալ Արման Ստեփանյանն այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դահլիճից ազատ արձակվեց:

Այսպիսով, դատարանը վերաորակեց նախաքննական մարմնի կողմից Արման Ստեփանյանին առաջադրված՝ ՀՀ քրեական օրենսգրքի 358.1-րդ հոդվածի 4-րդ մասով մեղադրանքը՝ ՀՀ քրեական օրենսգրքի 358.1-րդ հոդվածի 1-ին մասով՝ նրան դատապարտելով 3 տարի ժամկետով ազատազրկման և հաշվի առնելով այն հանգամանքը, որ Ստեփանյանն արդեն 3 տարուց ավել է կալանքի տակ է գտնում ազատ արձակեց անմիջապես դատական նիստերի դահլիճից:

Իսկ գործով մյուս ամբաստանյալ Բաբկեն Գաբոյանը դատարանի դատավճռով մեղավոր ճանաչվեց՝ ՀՀ քրեական օրենսգրքի 358.1 հոդվածի 4-րդ մասով և 360 հոդվածի 2-րդ մասով՝ երկու դրվագ, դատապարտվեց 7 տարի ժամկետով ազատազրկման:

Հիշեցնենք, որ Արման Ստեփանյանի պաշտպան Նորայր Նորիկյանը իր պաշտպանական ճառում միջնորդել էր հռչակել Արման Ստեփանյանի անմեղությունը և նրան արդարացնել:

Միևնույն ժամանակ պաշտպանը նաև նշել էր, որ եթե առաջնորդվեն փորձագետների տրամաբանությամբ և բառապաշարով և եթե դատարանը Ստեփանյանի մասով արժանահավատ համարի տուժող Լիբիկ Մկրտչյանի ցուցմունքները, ապա առնվազն պետք է վերաորակի նրա արարքը ՀՀ քրեական օրենսգրքի 358.1 հոդվածի 1-ին մասով և հաշվի առնելով այն հանգամանքը, որ Ստեփանյանն անազատության մեջ է ավելի քանի երեք տարի՝ դատապարտի նրան երեք տարի ժամկետով ազատազրկման և ազատ արձակի դատական նիստերի դահլիճից:

նշենք, որ մեղադրող դատախազ Արամ Ամիրյանը իր մեղադրական ճառում միջնորդել էր ամբաստանյալ Արման Ստեփանյանին դատապարտել 7.5, իսկ Բաբկեն Գաբոյանին՝ 8 տարի ժամկետով ազատազրկման:

Ինչպե՞ս է ծնվել Լիբիկի 40 օրը. զինծառայողին ինքնասպանության հասցնելու գործով պաշտպանի ուսումնասիրության արդյունքում մեղադրանքը կփլուզվի՞

Ըստ մեղադրանքի՝ ՊՆ N զորամասի ավագ հետախույզ, կրտսեր սերժանտ Բաբկեն Գաբոյանը տեղ գնալու իր պահանջը չկատարելու կապակցությամբ, «սեփական անձի վարկանիշը բարձրացնելու, համածայողների շրջանում իր գերակայությունն ամրապնդելու նպատակով մեկ անգամ ապտակել է նույն զորամասի ժամկետային զինծառայող, շարքային Լիբիկ Մկրտչյանին, այդ կերպ վիրավորանք է հասցրել վերջինիս՝ անպարկեշտ ձևով ստորացնելով նրա պատիվն ու արժանապատվությունը»:

Բացի այդ, ըստ մեղադրանքի, Բ.Գաբոյանը նույն զորամասի ժամկետային զինծառայող, շարքային Մանուչար Մանուչարյանի նկատմամբ, որպես հեղինակություն վայելող զինծառայող առանձնանալու և անառարկելի հեղինակությունն ամրապնդելու անձնական շահագրգռվածությունից ելնելով, սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ։

Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից երեկոյան «քուն» հրամանից հետո զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար, Մ.Մանուչարյանի նկատմամբ բռնություն գործադրելու՝ երկու ձեռքերով կոկորդից բռնելու, վերջինիս պատին հենելու և կոկորդը սեղմելու, ինչպես նաև դրանից քիչ անց, անկողնում պառկած Մ.Մանուչարյանին ոտքերով հարվածներ հասցնելու պատճառով, նրանց երկուսի հակաօրինական գործողությունների արդյունքում անզգուշությամբ վրա է հասել ծանր հետևանք, այն է՝ վերը նկարագրված պարբերաբար բնույթ կրող ծեծի, ստորացումների, անձնական արժանապատվությունը նվաստացնող գործողությունների ու ծաղրի հետևանքով շարքային Մ.Մանուչարյանի մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով:

Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։

Աղբյուր` Փաստինֆո