Փաստ ինֆո

Գերմանիայի իշխանությունները դեմ են արտահայտվել, որպեսզի G20 գագաթաժողովին, որը տեղի կունենա գերմանական Համբուրգ քաղաքում` հուլիսի 7-8-ին, ժամանեն նաեւ Վաշինգտոնում ցուցարարների նկատմամբ բռնություն գործադրած Թուրքիայի նախագահ Էրդողանի թիկնապահները: Այդ մասին գրում է Welt պարբերականը:

Ինչպես գրում է թերթը` կառավարության ներկայացուցիչներն այդ մասին խորհրդարանականներին իրազեկել են Բուդեստագի փակ նիստի ընթացքում:

Թուրք խուժանի նկատմամբ իրավական քայլեր պետք է ձեռնարկվան.ԱՄՆ կոնգրեսականն արձագանքել է Վաշինգտոնի միջադեպին

Գերմանիայի հատուկ ծառայությունները նաեւ զգուշանում են, որ Էրդողանի ժամանումը կարող է բախումներ առաջացնել նրա կողմնակիցների եւ հակառակորդների միջեւ, այդ թվում` թուրքական սփյուռքի եւ քրդերի մասնակցությամբ: Նշվում է, որ Գերմանիայի տարածքում բնակվում է Քրդական բանվորական կուսակցության մոտ 14 հազար կողմնակից, որոնցից 600-ը` Համբուրգում:

Ավելի վաղ տեղեկացրել ենք, որ Թուրքիայի նախագահ Ռեջեփ Թայիփ Էրդողանի` ԱՄՆ կատարած այցի ժամանակ ԱՄՆ մայրաքաղաք Վաշինգտոնում նրա դեմ կազմակերպվել էր խաղաղ ցույց, որի մասնակիցները մի խումբ թուրք ազգայնամոլների կատաղի հարձակման թիրախ են դարձել: Մի քանի վիրավորներ արնաշաղախ հիվանդանոց են տեղափոխվել: Հայտնի է դարձել, որ հարձակումն իրականացրել են Էրդողանի անվտանգության աշխատակիցները:

Էրդողանն իր մեքենայից հետևել է խաղաղ ցուցարարների վրա հարձակմանը (տեսանյութ)

Ավելի ուշ հայտնված տեսանյութում երևում է, թե ինչպես է հենց Էրդողանը տալիս ցուցարարների վրա հարձակվելու հրահանգը: Ցույցը կազմակերպվել էր Հայ դատի ԱՄՆ հանձնախմբի, Ամերիկայի Հելենական խորհրդի եւ մի շարք այլ՝ քրդական, ասորական եւ հունական կազմակերպությունների կողմից: Ծեծկռտուքից հետո մի քանի մարդ տեղափոխվել էր հիվանդանոց:  Կատարվածը դատապարտել էր ԱՄՆ պետդեպը, Վաշինգտոնի քաղաքապետը և մի շարք կոնգրեսականներ:

Թիկնապահներից մի քանիսի նկատմամբ ԱՄՆ-ում հետախուզում է հայտարարվել: Նրանք կձերբակալվեն ԱՄՆ մուտք գործելուց անմիջապես հետո:

Աղբյուր` Փաստինֆո