Փաստ ինֆո

Գյումրիում ռուսական ռազմաբազայի զինծառայողի սպանության գործով ստեղծվել է քննչական-օպերատիվ խումբ: Այս մասին «Փաստինֆո»-ին հայտնեց ՀՀ ՔԿ նախագահի խորհրդական Սոնա Տռուզյանը` նշելով, որ քննությունն իրականացվում է ՀԿԳ քննության գլխավոր վարչության վարույթում:

Ներկայումս քննչական խումբը գտնվում է Գյումրիում եւ տեղում իրականացվում են անհրաժեշտ քննական եւ դատավարական այլ գործողություններ` սպանության բոլոր հանգամանքները պարզելու ուղղությամբ, հարցաքննվել են բազմաթիվ անձինք, այդ թվում ականատես վկաներ, նշանակվել փորձաքննություններ, դրանց թվում` դատաբժշկական, դատաքրեագիտական, դատակեսնաբանական եւ այլն: Ս.Տռուզյանը տեղեկացրեց, որ այսօր կսկսվի դատաբժշկական փորձաքննության կատարումը, որի արդյունքում մասնագետները կտրամադրեն զինծառայողի մահվան նախնական պատճառը:

Հարցաքննվել է նաեւ կասկածյալը, խուզարկություններ են կատարվել նրա բնակարանում: Քրեական գործով ներգրավվել է նաեւ հանրային պաշտպան: Ինչպես նշեց Ս.Տռուզյանը` քրեական գործով վարույթին պաշտպանի մասնակցությունը պարտադիր է, երբ կասկածյալի կամ մեղադրյալի համար դժվար է ինքնուրույն իրականացնել պաշտպանության իր իրավունքը` հոգեկան պակասությունների հետևանքով:

Ավելի վաղ «Փաստինֆո»-ն տեղեացրել է, որ սպանության մեջ կասկածվողը որպես մեղադրյալ անցնում է նաեւ մեկ այլ քրեական գործով: Խնդիրն այն, որ ծառայության ընթացքում նա բռնություն է գործադրել համածառայակցի նկատմամբ, կատարել ինքնախեղումներ` վնասելով ինքն իրեն: Զինվորական քննչական գլխվոր վարչության 9-րդ կայազորային քննչական բաժնում հարուցվել է քրեական գործ, որի շրջանակներում նրա նկատմամբ դեռեւս 2016 թվականի նոյեմբերին նշանակվել է ռազմաբժշկական և դատահոգեբուժական ամբուլատոր համալիր փորձաքննություն։ Նեղ մասնագիտական հետազոտման նպատակով տեղափոխվել է ՀՀ ՊՆ Երևանի կայազորային հոսպիտալի հոգեբուժական բաժանմունք:

2017թ. մարտի 9-ին ՀՀ ՔԿ ԶՔԳՎ 9-րդ կայազորային քննչական բաժնում ստացվել է թիվ 12 եզրակացությունը, համաձայն որի՝ նրա մոտ փորձաքննության ժամանակ հայտնաբերվել են հոգեկան որոշ խանգարումներ, ճանաչվել է սահմանափակ մեղսունակ և ոչ պիտանի զինվորական ծառայության համար խաղաղ ժամանակ։ Պաշտպանության նախարարի հրամանով 2017 թվականի մարտին նա զորացրվել է:

ՔԿ ներկայացուցիչը նաեւ հայտնեց, որ անհրաժեշտ քննչական գործողություններ են կատարվում պարզելու նաեւ տուժողի եւ կասկածյալի հնարավոր առնչությունը նախկինում:

Հիշեցնենք, որ ապրիլի 22-ին` ժամը 17:15-ի սահմաններում, Գյումրի քաղաքի Արգո խանութի մոտ հայտնաբերվել է Գյումրիում տեղակայված 102-րդ ռուսական ռազմաբազայի զինծառայող 21-ամյա Դմիտրի Յալպաևի դին, ով սպանվել է դանակի գործադրմամբ:

Վերջինս սպանության կասկածանքով ձերբակալվել է 21-ամյա Արման Ջանջուղազյանը:

Դեպքի վերաբերյալ հարուցվել է քրեական գործ՝ ՀՀ քրեական օրենսգրքի 104-րդ հոդվածի հատկանիշներով:

Աղբյուր` Փաստինֆո