Փաստ ինֆո

Հայրասպանության վերաբերյալ հերթական գործով այսօրվա դատական նիստում վկան հայտնեց, որ ամբաստանյալ որդին լավ չէր վերաբերվում տուժող հորը, ծեծում էր, խփում: Ավելին, ըստ վկայի, ամբաստանյալի հայրն ասել է՝ վախենում եմ քնեմ, գիշերը սպանի:

Վկան, ում կինը տուժող հոր ազգականն է, հայտնեց, որ տուժողը մեկ մլն-ից ավելի դրամ արժեցող վիրահատության կարիք ուներ, դրա համար հարազատները որդուն առաջարկել են տունը վաճառել՝ մի սենյակի փողը տրամադրել վիրահատությանը, մնացած մասով սենյակ գնել:

Ըստ վկայի, ամբաստանյալը դանակը վերցրել է ու հարձակվել տուժողի եղբոր վրա, իրենք միջամտել են ու ձեռքից վերցրել դանակը:

Ամբաստանյալն էլ եկել է այն մտքին, որ պետք է տունը վաճառել, սակայն չի հասցրել:

Ըստ վկայի, ինքը ամբաստանյալի մոտ որևէ արտառոց բան չի տեսել:

Պաշտպանական կողմը վկայի նախաքննական ու դատաքննական ցուցմունքների միջև հակասություններ տեսավ, այդ հիմքով էլ նախաքննական ցուցմունքները հրապարակվեցին:

Նախաքննական ցուցմունքում վկան չի հայտնել ամբաստանյալի կողմից հորը ծեծելու, ինչպես նաև հորեղբոր վրա դանակով հարձակվելու մասին (ի դեպ, ամբաստանյալը տուժողի որդեգրված զավակն է):

Նախաքննության ընթացքում վկան հայտնել է, որ ամբաստանյալը տարօրինակություններ ուներ, սակայն որևէ հոգեկան հիվանդությամբ տառապելու մասին ինքը տեղեկություն չունի:

«Շան կեր կար, պապան կարող է կերել ու թունավորվել է, ես ինչ իմանամ». ամբաստանյալը չի ընդունում հոր սպանության մեղադրանքը

Ըստ մեղադրանքի, Արմեն Առաքելյանն իր հորը` Հայկարամ Առաքելյանին, սպանելու դիտավորությամբ, երկու չափաբաժին «կետոնալ» տեսակի դեղամիջոցի ներարկման, այնուհետև պարանոցից սեղմելու եղանակով խեղդամահ է արել նրան՝ այդ կերպ ապօրինաբար դիտավորությամբ զրկել կյանքից:

Այսպես, ըստ մեղադրական եզրակացության, Արմեն Առաքելյանը հոր՝ Հայկարամ Առաքելյանի, հետ երկար տարիներ միասին բնակվել են իրենց երևանյան բնակարանում:

Ամբաստանյալի հայրը երկար տարիներ տառապել է թոքերի, անոթների, ուղեղի սնուցման հետ կապված առողջական խնդիրներով և այդ ամբողջ ընթացքում Արմեն Առաքելյանը տնային պայմաններում խնամել է հորը, այդ թվում նաև՝ կատարել նրա դեղորայքային ներարկումները:

Տարիների ընթացքում որդին հոգնել է հորը խնամելու պարտականությունից, հոր անկողնային հիվանդ լինելու հանգամանքը համարել որպես իր վրա ծանրացած բեռ, այլևս չի կարողացել հանդուրժել հիվանդությամբ տառապող Հայկարամ Առաքելյանի ներկայությունը և մշտապես նրա նկատմամբ հոգատար վերաբերմունք ցուցաբերելու իր որդիական պարտականությունը:

Խնամելուց ձանձրացած ու հոգնած լինելու պատճառով Արմեն Առաքելյանը սկսել է հաճախակի վիճել հոր հետ, կարճ ժամանակահատվածում հոր հետ ունեցած բազմաթիվ վիճաբանությունների հետևանքով նրա նկատմամբ առաջացած ատելության և վրեժի հետևանքով Արմեն Առաքելյանի մոտ առաջացել է Հայկարամ Առաքելյանին ապօրինաբար կյանքից զրկելու մտադրություն՝ այդ կերպ ցանկանալով ազատվել ծնողին պահելու և խնամելու իր պարտականությունից:

«Իր հանցավոր մտադրությունն իրագործելու նպատակով քաջատեղյակ լինելով «կետոնալ» տեսակի դեղամիջոցի չարաշահման կյանքի համար վտանգավոր հետևանքների մասին, Արմեն Առաքելյանը 2016թ. մայիսի 24-ի երեկոյան Հայկարամ Առաքելյանին մեկ ժամվա ընթացքում ներարկել է երկու չափաբաժին՝ յուրաքանչյուրը 2 մլ, «կետոնալ» տեսակի դեղամիջոց, ապա նրան միայնակ թողնելով՝ դուրս է եկել տանից:
2016թ. մայիսի 25-ին ժամը 02.00-ի սահմաններում Արմեն Առաքելյանը վերադառնալով տուն՝ տեսնելով, որ հայրն ընկած է հատակին, դժվար է շնչում, դեռևս չի մահացել, իր հանցավոր մտադրությունն ավարտին հասցնելու նպատակով ձեռքերով բռնել է Առաքելյանի պարանոցից, սեղմելու միջոցով խեղդամահ արել նրան և այդ կերպ ապօրինաբար դիտավորությամբ վերջինիս զրկել է կյանքից»,- նշվում է մեղադրական եզրակացության մեջ:

Աղբյուր` Փաստինֆո