Փաստ ինֆո

Հայաստանից այս տարի արտահանման ռեկորդային աճ է արձանագրվել: Դեկտեմբերի 28-ին լրագրողների հետ հանդիպմանն այս մասին հայտնեց ՀՀ տնտեսական զարգացման և ներդրումների նախարար Սուրեն Կարայանը:

«Մենք այս տարվա արդյունքներով կարձանագրենք արտահանման ծավալների շուրջ 21 տոկոս աճ` նախորդ տարվա համեմատ: Իսկ վերջին` չորրորդ եռամսյակում, այդ աճը մեր կանխատեսումներով կկազմի շուրջ 25 տոկոս»,- «Արմենպրես»-ի հաղորդմամբ` ընդգծեց նախարարը:

Այդուհանդերձ, այդ ցուցանիշները դեռևս գոհացուցիչ չեն ՀՀ կառավարության համար,քանի որ համախառն ներքին արդյունքում արտահանման ծավալները կազմում են մոտ 30 տոկոս, իսկ կայուն տնտեսական աճ ապահովելու համար արտահանման ծավալները պետք է կազմեն ՀՆԱ-ի 40-50 տոկոսը:

«Այս ցուցանիշին հասնելու համար մենք առաջին հերթին կփորձենք արձանագրել այն խնդիրները, որոնք առկա են: Շարունակում է խնդրահարույց լինել արտահանման կենտրոնացման մեծ աստիճանը ինչպես շուկաների, այնպես էլ արտադրանքի մասով: Այսինքն, մեր խնդիրներից առաջնայինն այն է լինելու, որպեսզի մենք փորձենք դիվերսիֆիկացնել մեր արտահանումն ըստ երկրների և ապրանքատեսակների: Միաժամանակ մեր ուսումնասիրությունները ցույց են տալիս, որ մենք շատ ցածր արտահանման ներուժ ունենք մեր հարևան և առաջին առևտրատնտեսական գործընկեր երկրների հետ: Մեր արտահանումը Ռուսաստան այդ երկրի մեկ շնչի հաշվով կազմում է ընդամենը 1.7 ԱՄՆ դոլար, իսկ Իրանի դեպքում`այն կազմում է 1 ԱՄՆ դոլար: Մեր կարծիքով` սա շատ ցածր ցուցանիշ է, և մենք գտնում ենք, որ այստեղ կա բավականին չօգտագործված ներուժ: Այս երկրներում մեր արտահանումը մեծացնելը լինելու է մեր առաջիկա քայլերից հիմնականը»,- հավելեց Սուրեն Կարայանը:

Կառավարությունը փորձելու է կարճ ժամանակահատվածում Հայաստանի համար արտոնյալ առևտրային ռեժիմներ ունեցող շուկաների մուտքի հնարավորությունները ավելի ընդլայնել:

«Դա նշանակում է, որ այն շուկաները, որոնք Հայաստանի համար սահմանել են արտոնյալ ռեժիմներ, սակայն ամբողջովին վերացված չեն խոչընդոտները, մենք օպերատիվ քայլեր ենք ձեռնարկելու ,որպեսզի այդ խոչընդոտները շատ արագ վերանան»,- ասաց Կարայանը:

Աղբյուր` Փաստինֆո