Փաստ ինֆո

Սահմանադրական բարեփոխումներից հետո Հայաստանը թևակոխել է խորհրդարանական կառավարման համակարգ, որտեղ անչափ կարևոր է կուսակցությունների դերն ու նշանակությունը: Ազգային ժողովում «Կուսակցությունների մասին» օրենքի նախագծի քննարկման ժամանակ այս մասին ասաց ՀՀ ԱԺ փոխնախագահ Էդուարդ Շարմազանովը:

«Բնական է, որ խորհրդարանական կառավարման համակարգը պետք է իր հետ բերեր որոշակի շտկուﬓեր կուսակցությունների դերի և նրանց աշխատանքի հետ կապված: Մենք այս ոլորտում բազում խնդիրներ ունենք, որոնք լուծման կարիք ունեն»,- «Արմենպրես»-ի հաղորդմամբ՝ նշեց Շարմազանովը:

Նա ընդգծեց, որ կուսակցությունների արագ կայացման և զարգացման համար անհրաժեշտ է երկու քայլ կատարել:

«Հարկավոր է ստեղծել հավասար հնարավորություններ և պայմաններ բոլոր կուսակցությունների համար: Սա ժողովրդավարության ոսկե կանոններից մեկն է: Երկրորդ քայլը պետք է լինի այն, որ բոլոր կուսակցությունների համար պետք է լինեն ազատ մրցակցային պայմաններ: Եթե մենք խոսում ենք ժողովրդավարությունից և ցանկանում ենք, որ մեր ժողովուրդն ապրի ժողովրդավարական հասարակարգում, իսկ մենք մեզ համարենք ժողովրդավարական խորհրդարանի ներկայացուցիչներ, պետք է առաջին հերթին գիտակցենք, որ ժողովրդավարությունը ազատ և բաց մրցակցություն է, ուստի մենք չպետք է արհեստական խոչընդոտներ ստեղծենք կուսակցությունների համար, որոնք ցանկանում են մաս դառնալ մրցակցության»,- ընդգծեց ԱԺ փոխնախագահը:

Շարմազանովը ներկայացրեց նաև այն քայլերը, որոնք պետք է կատարվեն այդ խնդիրները կարգավորելու համար: Նրա խոսքով՝ անհրաժեշտ է, որպեսզի պատգամավորները հնարավորինս արագ ընդունեն մի օրենք, որը կբացառի արհեստական, բյուրոկրատական քաշքշուկը:

«Մենք պետք է գնանք հնարավորինս ազատականացման ճանապարհով: Նոր հեծանիվ պետք չէ ստեղծել, կա բավականին հաջողված փորձ ու գոնե Հայաստանի համար մենք պետք է դիտարկենք հետխորհրդային տարածաշրջանի երկրների փորձը՝ Լատվիա, Լիտվա, Էստոնիա, Ռուսաստան, Ուկրաինա: Եթե մենք նայենք այս երկրների փորձը, կտեսնենք, որ շեշտակի ազատականացում է գնում: Ռուսաստանի նման 150 միլիոնանոց երկրում ընդամենը 40 հազար անդամ է պետք, որպեսզի հնարավոր լինի համագումար անել և կուսակցություն ստեղծել: Մենք էլ ենք գնում այս ճանապարհով: Այս նախագծով գործող օրենքի փոխարեն մենք սահմանում ենք, որ կուսակցություն գրանցելու համար հարկավոր կլինի ունենալ ոչ թե 2000, այլ 1000 անդամ: Եթե մենք բոլոր մարզերում և մայրաքաղաքում ունենայինք կառույցներ, հիմա դա կրճատվում է»,- նշեց Էդուարդ Շարմազանովը:

Նա ընդգծեց, որ հարկավոր է ունենալ նաև որոշ սահմանափակումներ, որոնք, սակայն, պետք է լինեն ողջամտության և տրամաբանության շրջանակներում:

«Եթե մենք ցանկանում ենք զբաղվել քաղաքականությամբ, և ես ու պարոն Բաղդասարյանը որոշում ենք կուսակցություն ստեղծել, ընդամենը նրա համար, որ մենք այդպես ենք որոշել, դա բավարար չէ: Դրա համար կա հասարակական կազմակերպություն: Մենք պետք է կարողանանք հասարակական կազմակերպությունը կամ գարեջրի սիրահարների միությունը տարբերել կուսակցությունից: Մենք պետք է աստիճանաբար գնանք այն ճանապարհով, որ այն կուսակցությունները, որոնք մի քանի գումարման ազգային ժողովի աշխատանքներին չեն մասնակցում, ինքնալուծարվեն: Հակառակ դեպքում, եթե քաղաքական ուժը որևէ ձև չի մասնակցում խորհրդարանական ընտրություններին, տեղական ինքնակառավարման մարմինների ընտրություններին, այդ դեպքում ո՞րն է այդ կուսակցության իմաստը»,- ընդգծեց Էդուարդ Շարմազանովը՝ կարծիք հայտնելով, որ հարկավոր է աստիճանաբար գնալ կուսակցությունների խոշորացման ճանապարհով, սակայն դա չպետք է արվի արհեստական խոչընդոտներ ստեղծելու եղանակով:

Լուսանկարը՝ Armenpress-ի

Աղբյուր` Փաստինֆո