Փաստ ինֆո

Հայաստան-Ռումինիա խայտառակ խաղից հետո հավաքականի մարզիչ Վարուժան Սուքիասյանն ընդունեց, որ ընտրել էր սխալ մարտավարություն, այդուհանդերձ հրաժարական տալ չի պատրաստվում: Նման հայտարարությամբ նա հանդես եկավ խաղից հետո նախատեսված մամուլի ասուլիսի ժամանակ, որը կարելի է ձախողված համարել:

Հիշեցնենք, որ հոկտեմբերի 8-ին սեփական հարկի տակ` Երեւանում, Հայաստանի հավաքականը խոշոր հաշվով` 0-5, պարտվեց Ռումինիայի հավաքականին: Հայ ֆուտբոլասերները հենց ընթացկում սկսեցին հեռանալ մարզդաշտից` վանկարկելով «Ամոթ», «Սուքիասյան հեռացիր»:

Ասուլիսի ժամանակ պատասխանելով իր հրաժարականի վերաբերյալ հարցերին` Սուքիասյանը հայտարարեց, թե չի պատրաստվում անել դա. «Եթե այս ծանր վիճակը չլիներ, հաստատ հրաժարական կտայի: Եթե ֆեդերացիան պահանջի, անպայման հրաժարական կտամ»: Իսկ ծանր վիճակը բացատրեց հետեւյալ կերպ. «Գոնե հաշվե՞լ եք, թե քանի խաղացողներ են բացակայել, Ղադիմյանը դուրս մնաց, կարմիր քարտ.... տղաները չհասցրին, 2-րդ, 3-րդ գոլը»:

«Ինձ վրա եմ վերցնում ամբողջ մեղքը: Այս պահին երբեք թիմը չեմ թողնի ծանր վիճակում: Ես այնքան տղամարդկություն ունեմ, որ պետք է պահեմ և դուրս բերեմ այս վիճակից»,- ասաց մասնագետը` ընդունելով, որ խաղի համար ընտրել էր սխալ մարտավարություն. «Դանիայի հետ խաղում խաղընտրեցինք 5 պաշտպաններով մարտավարությունը, իսկ այսօր՝ 4. սխալվեցինք»:

Մի շարք հարցեր մնաց անպատասխան, նա չկարողացավ բացատրել, թե ինչու Արցախի դրոշը չթույլատրեցին անցկացնել մարզադաշտ, ինչու հավաքականում չէ Յուրա Մովսիսյանը, ինչպես է մոտիվացնելու ֆուտբոլիստներին, ինչու են մեր հավաքականի կազմում այդքան շատ վնասվածքները, բայց չխորշեց մեղադրել լրագրողներին: «Այս վատ մթնոլորտը, որ տիրում է Ձեր մեջ, դրանից է, որ ամբողջ թիմը վնասվածքների մեջ է»: Այս մտքից հետո լրագրողները բուռն ծափահարեցին մարզչին:

Աղբյուր` Փաստինֆո