Փաստ ինֆո

Ինչպես «Փաստինֆո»-ն ավելի վաղ տեղեկացրել է, հուլիսի 17-ին, ժամը 08.57-ին ՀՀ արտակարգ իրավիճակների նախարարությունում ահազանգ է ստացվել, որ Երևանի Վահագնի թաղամասի մոտակայքում տեղի է ունեցել ՃՏՊ. ավտոմեքենան բախվել է էլ.սյանը, կան տուժածներ: Անհրաժեշտ է փրկարարների օգնությունը:

Դեպքի վայր են մեկնել մեկ մարտական հաշվարկ և ճգնաժամային կառավարման ազգային կենտրոնի օպերատիվ խումբը:

ԱԻՆ-ից լրացուցիչ տեղեկացնում են, որ դեռևս չբացահայտված հանգամանքներում «Վանաձոր» ՍՊԸ տաքսի ծառայությանը պատկանող «Shkoda» մակնիշի 918 LS 63 պետհամարանիշով ավտոմեքենան (վարորդ Ն. Ս., ծնվ. 1961թ.) դուրս է եկել ավտոճանապարհի երթևեկելի գոտուց՝ բախվել արտաքին լուսավորության սյանը և հայտնվել ավտոճանապարհի հանդիպակաց գոտում:

Մինչ հրշեջ-փրկարարների կանչի վայր հասնելը ավտոմեքենայի ուղևորները՝ Ք. Գ.-ն (ծնվ. 1988թ.), Ա. Ղ.-ն (ծնվ. 1985թ.) և Մ. Զ.-ն (ծնվ. 1998թ.), ավտոմեքենայից դուրս են բերվել տեղի ուժերով և տեղափոխվել «Արմենիա» ՀԲԿ:

Բժիշկները տուժածների առողջական վիճակը գնահատել են միջին ծանրության:

Հրշեջ-փրկարարներն ավտոմեքենայից դուրս են բերել վարորդ Ն. Ս.-ին և ուղևոր Գ. Ղ.-ին (ծնվ. 1990թ.) և մոտեցրել շտապօգնության ավտոմեքենային:

Վերջիններս տեղափոխվել են «Աստղիկ» ԲԿ, որտեղ բժիշկները Ն. Ս.-ի վիճակը գնահատել են միջին ծանրության, իսկ Գ. Ղ.-ինը՝ ծանր:

Փրկարարները կատարել են ավտոճանապարհի լվացման աշխատանքներ:

Լուսանկարը՝ shamshyan.com-ի

Աղբյուր` Փաստինֆո