Փաստ ինֆո

Քաղաքագետ Հրանտ Մելիք-Շահնազարյանը Tert.am-ի հետ զրույցում անդրադարձել է ՌԴ արտգործնախարար Սերգեյ Լավրովի այն հայտարարությանը, թե ղարաբաղյան հակամարտության կողմերը հաջողությանն ավելի մոտ են, քան երբևէ:

Ըստ քաղաքագետի՝ Լավրովի լավատեսությունը պայմանավորված է նրանով, որ Ռուսաստանը վերջին շրջանում ակտիվ է և փորձում է խաղաղ կարգավորման հետ կապված որոշակի արդյունքներ արձանագրել և ցույց տալ աշխարհին:

«Դրա համար էլ Ռուսաստանից հնչող գնահատականները լավատեսական են և նաև խոստումնալից: Սակայն իրականությունը, ցավոք սրտի, այդպիսին չէ։ Մենք տեսնում ենք ճիշտ հակառակը, վերջին տարիների ընթացքում հայ-ադրբեջանական հարաբերություններում ամենալարված ժամանակահատվածն է՝ Ադրբեջան-Արցախ և Ադրբեջան-Հայաստան սահմանում»,-ասաց նա:

Հրանտ Մելիք-Շահնազարյանը նշել է, որ այս պահին չի կարելի խոսել բանակցային գործընթացի վերսկսման hնարավորությունների մասին, որովհետև նկատելի է, որ Ադրբեջանը մերժում է Վիեննայում, Սանկտ Պետերբուրգում ձեռքբերված պայմանավորվածությունները, որոնք ուղղված են սահմանում իրավիճակը վերահսկելի դարձնելուն և կայունություն պահպանելուն: Նա նշեց, որ Ադրբեջանի մոտեցումները ցույց են տալիս, որ խաղաղ կարգավորման հնարավորություն այս պահին չկա:

«Բացի այդ չպետք է մոռանալ, որ ապրիլին եղել է Ադրբեջանի կողմից պատերազմ վերսկսելու փորձ, ինչը չի կարող անհետևանք անցնել և չի կարող իրավիճակ չփոխել»,-ասաց նա:

Քաղաքագետը նշել է, որ պայմանավորվածությունները պետք է հիմնված լինեն նախկին փորձի վրա: «Մենք Ադրբեջանի նախկին պաշտոնյաների կողմից շատ ենք լսել այն, թե կողմնակից են խնդրի խաղաղ լուծմանը, սակայն նրանց կատարած քայլերը հակառակի մասին են խոսում: Երբ խոսվում է, թե կողմերը համաձայնության են եկել ինչ-որ հարցերի շուրջ, ապա ժամանակը ցույց կտա, թե որքանով է Ադրբեջանը պատրաստ հետևել իր պայմանավորվածություններին: Գլխավոր խնդիրն իրավիճակի կայունացումն է և վստահությունը, որ Ադրբեջանը ռազմական ճանապարհով չի փորձի խնդիրը լուծել»,-ասաց:

Հրանտ Մելիք-Շահնազարյանը նշել է, որ Ադրբեջանի որևէ խոստումներին հավատալը միամտություն կլինի: Նա ներկայումս որևէ փոփոխություններ չի սպասում ղարաբաղյան հակամարտության հարցում: «Նույնիսկ բանակցային գործընթացը վերսկսումը կարելի է համարել առաջընթաց, սակայն մինչ բանակցությունների վերսկսումը, պետք է վստահության մեխանիզմներ ստեղծվեն, դիտորդների թիվը ավելացվի, Ադրբեջանը հրաժարվի մի շարք իր թեզերից, և Արցախը պետք է դառնա բանակցային կողմ»,-ասաց քաղաքագետը։

Ըստ նրա՝ հայկական կողմը պետք է հետամուտ լինի իր բարձրացրած հարցերին:

Աղբյուր` Փաստինֆո