Փաստ ինֆո

Պետական դավաճանության վերաբերյալ գործով այսօրվա դատական նիստում ավարտվեց դատաքննությունը: Մեղադրողը երկու շաբաթ ժամանակ խնդրեց մեղադրական ճառի հրապարակմանը նախապատրաստվելու համար՝ դատարանը բավարարեց միջնորդությունը:

Մինչ այդ դատարանում ավարտվեց վերջին՝ ամբաստանյալների հարցաքննության փուլը: Ամբաստանյալները՝ Ռաֆիկ Պապոյանը, նրա որդին՝ Սերգեյ Պապոյանը, ինչպես նաև ամբաստանյալի կարգավիճակով հարցաքննված Դիանան հրաժարվեցին ցուցմունքներ տալ ու հարցերին պատասխանել, ուստի՝ հրապարակավեցին նրանց նախաքննական ցուցմունքները:

Դիանան հարցաքննվեց ամբաստանյալի կարգավիճակով այն պատճառով, որ ոչ արդարացման, այն է՝ վաղեմության ժամկետը անցնելու հիմքով նրա նկատմամբ քրեական հետապնդումը դադարեցնելու դատարանի որոշումը դեռևս օրինական ուժի մեջ չի մտել:

Նախաքննության ընթացքում այն ժամանակ անչափահաս Դիանան որպես վկա հարցաքննվելիս հայտնել էր իր զարմուհի, գործով անցնող, պետական դավաճանության մեջ մեղադրվող Կարինե Ղումաշյանից լսածը: Ըստ Դիանայի, Կարինեն իրեն ասել է, որ Թուրքիայում ծանոթացել է Արմանի հետ, ով շատ հարցերում իրեն օգնել է, սակայն ինչ հարցերում՝ չի ասել: Հետագայում Կարինեն ասել է, որ Արմանը «շպիոնի պես մի բան է», դրա համար նրա հետ չի շփվել:

Սակայն որպես մեղադրյալ հարցաքննվելիս՝ Դիանային առաջադրվել է նախապատրաստվող առանձնապես ծանր հանցագործության մասին տեղյակ լինելու և չհայտնելու մեջ մեղադրանք, Դիանան հայտնել էր, որ չի հասկացել «շպիոն» բառի իմաստը և լուրջ չի վերաբերվել դրան ու հրաժարվել է հարցերին պատասխանելուց: Որպես մեղադրյալ հարցաքննված մեկ այլ ցուցմունքում նա իրեն մեղավոր չի ճանաչել՝ պնդելով, որ չի հասկացել «շպիոն» բառի իմաստը և լուրջ չի վերաբերվել դրան ու նորից հրաժարվել է հարցերին պատասխանելուց:

Ամբաստանյալ Սերգեյ Պապոյանը նախաքննության ընթացքում որպես վկա հարցաքննվելիս հայտնել էր, որ հայրը՝ Ռաֆիկ Պապոյանը հարցեր էր տալիս իր զորամասի մասին, ի՞նչ զենքերի է տիրապետում, ի՞նչ թվով զինծառայողներ ունի գումարտակը, որտե՞ղ է տեղակայված, սպաները ինչպե՞ս են վերաբերվում, ե՞րբ են լինելու զորավարժությունները, սակայն ինքը մտածել է, որ նա որպես ծնող է հետաքրքրվում:

Որպես մեղադրյալ հարցաքննվելիս Սերգեյն ասել էր, որ հայրը իրեն ասել է, որ Թբիլիսիում հանդիպի ոմն Սեյրանի հետ՝ դատելով ցուցմունքներից՝ նա նույն ինքն Արմանն ու Էրիկն է: Նա ևս հարցնում էր՝ որտե՞ղ է ծառայում, ի՞նչ զենք կա, եղե՞լ է դիրքերում: Սեյրանն իրեն 750 դոլար է նվիրել, ապա փաստաթուղթ է ստորագրել տվել, որ ծառայության կանցնի Մատաղիսի զորամասերից մեկում և իրեն տեղեկություններ կհայտնի: Ինքը հասկացել է, որ Սեյրանն աշխատում է թուրքերի համար և փախել է Ռուսաստան: Հայրն իրեն փոխանցել է Սեյրանի սպառնալիքները, որ եթե Ստամբուլ չվերադառնա, ընտանիքը կվերացնի:

Սերգեյն իրեն մեղավոր է ճանաչել, որ հանդիպել է հիշյալ անձի հետ և համագործակցության մասին փաստաթուղթ ստորագրել, սակայն չի ընդունել, որ Հայաստանում ծառայության է ընդունվել՝ Սեյրանի հանձնարարությունը կատարելու համար, իրեն պարզապես աշխատանք էր պետք: Սերգեյը հայտնել էր նաև, որ ինքը որևէ տեղեկություն չի հայտնել:

Ռաֆիկ Պապոյանը որպես կասկածյալ հարցաքննվելիս հայտնել էր, որ Թուրքիայում հանդիպել է Կարինե Ղումաշյանին, վերջինիս, նրա որդու հետ հանդիպել են Էրիկ անունով ներկայացած մեկի հետ (նույն ինքը՝ Արմանն ու Սեյրանը), ով իրենց տեղեկություններով զբաղվում էր բարեգործությամբ ու օգնում եկած հայերին:

Ռ.Պապոյանը հայտնել է, որ որևէ դիտավորություն ու շահ չի ունեցել, պարզապես ցանկացել է օգնել Կարինեին աշխատանք գտնել: Ի դեպ, հետագա ցուցմունքներում Ռ.Պապոյանն ասել է, որ այդ անձի անունն Էրիկ չէ, Սեյրան է, ինքը շփոթել է և Սեյրանի խնդրանքով Կարինեի ներկայությամբ նրան Արման անունով է դիմել՝ վերջինս ասել է, որ ինքն ընտանիք ունի և չի ցանկանում, որ իր իսկական անունն իմանան: Ռաֆիկ Պապոյանը հայտնել է, որ Սեյրանը որդուն 500 դոլար է տվել, թեև ըստ նրա որդու ցուցմունքների, գումարը կազմել է 750 դոլար:

Ցուցմունքում Ռաֆիկ Պապոյանը հայտնել էր, որ Սերգեյի փախչելու հետ կապված Սեյրանը զայրացել էր, ասելով՝ նա դավաճան է, չի ուզում օգնել իր ազգին, «ուզում էինք իմանալ ՝ մեր տված օգնությունը տեղ հասնո՞ւմ է, թե՞ ոչ»: Սեյրանն անընդհատ ասում էր, որ ինքը հայերի գտնի, ովքեր բանակում ծառայող որդիներ կամ կապ ունեն բանակի հետ:

Ըստ Ռ.Պապոյանի նախաքննական ցուցմունքի, իր մտքով էլ չէր անցնում, որ Սեյրանը կապ ունի Ադրբեջանի կամ Թուրքիայի հետ, կարծում էր, որ նա Ամերիկայի համար է աշխատում:

Մինչ դատաքննությունն ավարտելը դատարանը բավարարեց պաշտպանական կողմի միջնորդությունները ամբաստանյալներ Կարինե Ղումաշյանի և Ռաֆիկ Պապոյանի հեռախոսազրույցների ու տեսակցությունների արգելքը հանելու մասին:

Աղբյուր` Փաստինֆո