Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանի դատավոր Վլադիմիր Գրիգորյանի օգնական Արմինե Կարապետյանն այսօր ցուցմունք տալով դատարանին՝ խնդրեց իր նկատմամբ կայացնել արդարացման դատավճիռ:

Ըստ ամբաստանյալ դատավորի օգնականի՝ իրեն առաջադրված մեղադրանքը իրականության չի համապատասխանում, գործը կեղծ է և շինծու, և այս ամենը տուժողի վրեժխնդրության և զրպարտանքի արդյունք է, քանի որ նրա որդուն դատավոր Վլադիմիր Գրիգորյանը դատական նիստերի դահլիճից կալանավորել է:

Ա. Կարապետյանը նշեց, որ, մինչև այս գործով տուժող Ալինա Հովհաննիսյանի որդու գործի դատարան մուտք լինելը, ինքը Ալինային չի ճանաչել, նրա հետ որևէ կապ չունի ունեցել, իսկ նրա հետ առնչվել է դատավորի հանձնարարությամբ:

Այսպիսով, դատավոր Վլադիմիր Գրիգորյանի կողմից ԵԷԴ/0047/01/14 քրեական գործը վարույթ ընդունելուց հետո դատավորի օգնական Արմինե Կարապետյանը դատավարական փաստաթղթերը հանձնելու նպատակով գործի միջից վերցել է հեռախոսահամար և զանգահարել, որպեսզի ամբաստանյալը դատարան գնա և վերցնի այդ փաստաթղթերը,  հեռախոսազանգին պատասխանել է ամբաստանյալի մայրը՝ Ալինա Հովհաննիսյանը:

Դատավարական փաստաթղթերը նրանց առձեռն հանձնելու պատճառն եղել է այն, որ ամբաստանյալին ուղարկված ծրարը ետ է վերադարձվել մակագրմամբ՝ նշված հասցեն թերի է:

Փաստաթղթերը հանձնելու ժամանակ ամբաստանյալի մայրը դատավորի օգնականին պատմել է, որ դատախազ Ափյանն իրենց  ասել է՝ չվախենան, որ տուգանք է միջնորդելու, իսկ  դատարանն էլ ուզած-չուզած տուգանք է տալու:

Կարապետյանի խոսքով՝ ինքը զարմացել է և ասել, որ ոչ ոք իրավունք չունի դատարանի անունից երաշխիքներ տալու, ի վերջո դատարանն է դատական ակտ կայացնելու: Սակայն հետագայում պարզվել է գործի նախաքննության նկատմամբ դատավարական ղեկավարում իրականացնող դատախազ Ավետիս Ափյանը, դուրս գալով իր լիազորությունների սահմաններից, նախապես ամբաստանյալ Գարիկ Եսայանին և նրա մորը խոստումներ ու երաշխիքներ է տվել:

Ըստ Արմինե Կարապետյանի՝ դատավոր Վ. Գրիգորյանը գործն ուսումնասիրելու ժամանակ պարզել է, որ գործից բացակայում է մեղադրյալի անձնագիրը, և դատավորի հանձնարարությամբ կրկին Կարապետյանը զանգահարել ու խնդրել է, որ նրա անձնագիրը բերեն դատարան, ամբաստանյալի մայրը ներկայացել է դատարան, սակայն հայտնել է, որ ինչ-որ գործարքների մեջ են և անձնագիրը կներկայացնի մի քանի օր հետո:

«Կաշառակերներ, փող ուզեցիք՝ չտվեցի, դատեցիք». գոռում էր տուժողը

Այս հանդիպման ժամանակ, դատավորի օգնականի խոսքով, ամբաստանյալի մայրն ասել է, որ իրենց ծանոթներից մեկը, ով ոստիկանության աշխատող է, իրենից 2000 ԱՄՆ դոլար է պահանջել՝ որդու հարցերը դատարանում կարգավորելու համար, որպեսզի ազատազրկման հետ կապ չունեցող պատիժ նշանակվի:

Դատավորի օգնականի խոսքով՝ ինքը զայրացել է ամբաստանյալի մոր վրա և ասել, որ ոչ ոքի գումար չտան, քանի որ իրենց կխաբեն:

Դատավորի օգնականի և ամբաստանյալի միջև 3 հանդիպումը կայացել է կրկին ամբաստանյալի անձնագիրը դատարան ներկայացնելու հարցի նպատակով, թեև այս հանդիպմանը ամբաստանյալի մայրը կրկին անձնագիրը իր հետ բերած չի լինում, սակայն դատավորի օգնականին հայտնում է, որ ոստիկանության համակարգի ծանոթ աշխատակիցը այս անգամ էլ 5000 ԱՄՆ դոլար է պահանջել իրենից՝ գործը գլուխ բերելու նպատակով:

Ըստ ամբաստանյալ դատավորի օգնականի՝  ինքը կրկին հորդորել է գումար չտալ ոչ ոքի:

Այդ մասին դատավորը տեղեկանում է իր օգնականի միջոցով և զայրանում, ասելով՝  «զգուշացրել ես, որ ոչ մեկի գումար չտան, քանի որ դրանով կշահարկվի դատարանի հեղինակությունը»:

Արմինե Կարապետյանի հավաստմամբ՝ Գարիկ Եսայանի վերաբերյալ գործով դատավճռի հրապարակումից հետո, երբ դատավոր Վլադիմիր Գրիգորյանը մտել է իր աշխատասենյակ, որտեղ եղել են դատավորի օգնական Ա. Կարապետյանը, օպերլիազոր Հովհաննես Դավթյանը, ով փաստաթղթեր է ստորագրել, որպեսզի ամբաստանյալին մեկուսարան տանի, այդ ժամանակ դատավորի աշխատասենյակ է մտել դատախազ Ավետիս Ափյանը՝ կարմրած, քրտնած, լարված և դիմելով դատավորին ասել է, որ «Թորգոմիչ, այս ինչ արեցիք,  եկեք վճիռը փոխեք: Էս գործով ԿԿԲ-ն տեղյակ է և ԿԿԲ-ում ձայնագրություններ կան»:

Ի պատասխան դատախազի՝ Թորգոմիչն էլ ասել է. «Ի՞նչ է նշանակում արի վճիռը փոխի, դու լրիվ բանականությունդ կորցրել ես»:  ԿԿԲ-ի ձայնագրությունների վերաբերյալ էլ դատավորն ասել է, որ «մտահոգվելու ոչինչ չունի, դու մտահոգվի» և զայրանալով դատախազին դուրս է հրավիրել իր աշխատասենյակից:

Արմինե Կարապետյանն իր ցուցմունքում հայտնեց, որ իրեն մեղադրանք  է առաջադրվել խաբեության եղանակով խարդախություն կատարելու մեջ, «ես ինչպե՞ս կարող էի խաբեության եղանակով գումարի հափշտակության փորձ կատարել, երբ նախապես տեղյակ էի, որ դատավորը ՀՀ քրեական օրենսգրքի 178-րդ հոդվածին 2-րդ մասին 2 կետով պարտադիր պատիժ է նշանակում ազատազրկման ձևով: Ինչպե՞ս կարող էի Ալինա Հովհաննիսյանից պահանջած գումարի դիմաց նրան խոստանալ ազատազրկման հետ կապ չունեցող պատժատեսակի սահմանում, չէ որ ես ոչ մի երաշխիք չունեի, որ գումարը ստանալուց հետո Գարիկն ազատազրկման հետ կապված պատժի չի ենթարկվի: Չէ որ այս դեպքում կկանգնեի փաստի առաջ»,- ասաց Կարապետյանը` հավելելով. «ստացվում է, որ ես կամ պետք է խելագար լինեի կամ էլ պետք է գործարքի մեջ մտնեի դատավորի հետ»:

Նա նաև նշեց, որ իր դեմ հարուցված քրեական գործով 1,5 տարի տևած գործի քննության ընթացքում ապացույցներ ձեռք չեն բերվել այդ փաստով և դատավորի վերաբերյալ գործի մասը քննիչի որոշմամբ կարճվել է՝ հանցակազմի բացակայության հիմքով:

Կարապետյանը գտնում է, որ այս ամենը ուղղված է  եղել դատավորի դեմ, քանի որ Վ. Գրիգորյանը բազմաթիվ անգամներ կարճել կամ արդարացրել է  Ափյանի և մյուս դատախազների գործերը, բայց քանի որ ամբաստանյալի մոր հետ առնչվել է ինքը, և Վլադիմիր Գրիգորյանը նրա հետ որևէ առնչություն չի ունեցել, այս գործով քավության նոխազ դարձել է ինքը, և իր միջոցով փորձել են վրեժխնդիր լինել Վլադիմիր Գրիգորյանից:

Դատավորի օգնականը նաև նշեց, որ դատախազ Ափյանը և ամբաստանյալի մայրն ակտիվ հեռախոսային կապի մեջ են գտնվել,  այդ մասին վկայում է գործում ապացույց ճանաչված նրանց հեռախոսազանգերի վերծանումները:

Ավելին, ըստ ամբաստանյալ դատավորի օգնականի, դատախազ Ափյանը և ամբաստանյալ Գարիկի մայրը Ալինա Հովհաննիսյանը սիրային կապի մեջ են գտնվել:

Ա. Կարապետյանը նաև նշեց,  որ ոչ միայն դատախազը չի հեռացվել աշխատանքից, նրա արարքին քրեաիրավական գնահատական չի տրվել, այլև «ամենազորեղ այդ անձը դատախազության ղեկավարության հովանավորչությամբ մինչև օրս շարունակում է պաշտոնավարել՝ իր գործունեությամբ և գոյությամբ վարկաբեկելով դատախազության համակարգը»:

Նա նաև նշեց, որ աշխատանքից ազատվել է ՀՔԾ-քննիչ Ազատ Հարությունյանը, ով ոչ միայն փորձել է Ալինա Հովհաննիսյանից ցուցմունք կորզել Կարապետյանի դեմ, այլև գործով վկա Կարեն Օհանյանի վրա ճնշում է գործել:

Ըստ ամբաստանյալ Կարապետյանի՝ ՀՔԾ- քննիչի կողմից ճնշումներ են գործադրվել նաև իր վրա. ՀՔԾ քննիչն ասել է՝ «գիտեմ, որ դու անմեղ ես, արի դատավորիդ վրա ցուցմունք տուր, քեզ բաց թողնեմ, նրան կալանավորեմ»: Կարապետյանն այս մասին նախկինում չի բարձրաձայնել՝ չցանկանալով  երիտասարդ քննիչին վատություն անել:

Այսպիսով Կարապետյանը գտնում է, որ այս ամենի հեղինակը և կազմակերպիչը դատախազ Ափյանն է, քանի որ դատավճռի հրապարակումից 2,5 ամիս gh] ամբաստանյալի մայրը որևէ հաղորդում չի տվել, և որ այս գործը դատախազ Ավետիս Ափյանի սադրանքն է, որպեսզի կոծկի իր անբարոյական և հակաբարոյական վարքագիծը: