Փաստ ինֆո

Բազմիցս հայտարարվել է, որ եթե բանակցություններն այլևս հնարավոր չլինի շարունակել, այսինքն, եթե խոսքը գնա պատերազմական գործողությունների մասին, Հայաստանը՝ որպես Լեռնային Ղարաբաղի անվտանգության երաշխավոր, կձեռնարկի համապատասխան քայլեր, ներառյալ նաև՝ ճանաչումը, ինչպես նաև՝ այլ անհրաժեշտ քայլեր: Այս մասին այսօր հայտարարել է  ՀՀ արտգործնախարար Էդվարդ Նալբանդյանը՝  պատասխանելով ստատուս-քվոյի ու  զինադադարի խախտման վերաբերյալ Ազգային ժողովի «Ժառանգություն» խմբակցության ներկայացուցիչ Զարուհի Փոստանջյանի հարցին:  

ՀՀ ԱԳ նախարարը նշել է նաև, որ պատգամավորը՝  խոսելով հրադադարի ու ստատուս-քվոյի մասին, մի քիչ խառնում է  տարբեր ձևակերպումները:  Կա հրադադար, կա ստատուս-քվո, դրանք տարբեր բաներ են,  խախտվում է հրադադարը, որն  առաջին անգամ չի խախտվում, այն  շարունակաբար է խախտվում։ «Այս վերջին շրջանում խախտվում է ավելի սաստիկ ձևով»,- նշել է ՀՀ արտաքին քաղաքական գերատեսչության ղեկավարը: 

Է. Նալբանդյանը գոհունակություն է հայտնել այն կապակցությամբ, որ եռանախագահներն արդեն ուղղորդված և հասցեագրված հայտարարություններ են անում, թե ով է այդ հրադադարի խախտման պատճառը։ «Նրանք ասում են, որ պետք է անպայման ստեղծվի հրադադարի խախտման հետաքննության մեխանիզմ և հայտարարում են, որ Հայաստանը համաձայն է այդ մեխանիզմի ստեղծմանը, իսկ Ադրբեջանը հրաժարվում է: Այսինքն, դրանով ասում են, որ ամբողջ պատասխանատվությունը հրադադարի խախտման և միջադեպերի համար ընկնում է Ադրբեջանի վրա»,- հայտարարել է ՀՀ ԱԳ նախարարը:

Է.Նալբանդյանը փաստել է նաև, որ Լեռնային Ղարաբաղի հակամարտության կարգավորման հարցով ԵԱՀԿ Մինսկի խմբի ամերիկացի համանախագահող  Ջեյմս Ուորլիքը  երեկ արձագանքել է Միացյալ Նահանգների Կոնգրեսի արտաքին հարաբերությունների հանձնաժողովի նախագահ Ռոյսի և նաև կոնգրեսական Էնգելի նամակին, որում վերջիններս կոչ էին արել հավելյալ ջանքեր գործադրելու հրադադարի ամրապնդման ուղղությամբ։ Խոսքը գնում է նաև այդ մեխանիզմի ստեղծման մասին՝ պահանջելով որպեսզի Ադրբեջանը նույնպես համաձայնվի դրան: Այսինքն, նախաձեռնությանը, որով հանդես էին եկել ժամանակին եռանախագահները՝ աջակցություն է ստանում ոչ միայն միջազգային կառույցների, նաև՝ խորհրդարանների կողմից, ներառյալ նաև Ամերիկյան կոնգրեսի կողմից։

«Երեկ Ուորլիքը ողջունել է Ռոյսի և Էնգելի այդ նախաձեռնությունը: Բնականաբար, մենք էլ ենք ողջունում, որովհետև խոսքը գնում է հենց այն մասին, ինչի վերաբերյալ մենք ինքներս էինք կոչ անում՝ այն մասին, որ պետք է հրադադարի ամրապնդման համապատասխան քայլեր ձեռնարկվեն, դիպուկահարների դուրսբերման, հրադադարի ռեժիմի ամրապնդման, և վերոհիշյալ մեխանիզմի ստեղծման մասին, որոնց դեմ շարունակաբար դուրս էր գալիս Ադրբեջանը»,- ընդգծել է Էդվարդ Նալբանդյանը:

ԵՏՄ-ին  Ադրբեջանի անդամակցության մասին պատգամավորի հարցին ի պատասխան  ՀՀ ԱԳ նախարարը հայտարարել է. «Դուք ինչ-որ ենթադրյալ բաների մասին եք խոսում: ԵՏՄ-ում այսօր այդպիսի հարց չի քննարկվում: Հայաստանն այդ կազմակերպության անդամ է, և բոլոր անդամներն ունեն կարծիք արտահայտելու իրավունք, իսկ այդպիսի որոշումները պետք է ընդունվեն կոնսենսուսով»: