Փաստ ինֆո

ՀՀ կառավարության այսօրվա որոշմամբ՝ «Կարեն Դեմիրճյանի անվան մարզահամերգային համալիր»-ն այսուհետ կունենա պետական ոչ առևտրային կազմակերպության կարգավիճակ:

Նույն որոշմամբ՝ ՊՈԱԿ-ին «անհատույց, անժամկետ օգտագործման իրավունքով» ամրագրվում են «10 411 911 000 դրամ անշարժ գույքը՝ բաղկացած 46335.7 քառ. մետր մարզամշակութային կենտրոնից, 40.0 և 50.0 քառ. մետր օժանդակ շինություններից, 2800.0 քառ. մետր ջրավազաններից և աստիճանից, 3851.3 քառ. մետր ջրավազանից և 9,559587 հեկտար սեփական հողամասից»:

Ինչպես նշված է կառավարության կայացրած որոշման մեջ, մարզահամերգային համալիրը զբաղվելու է «մշակույթի, սպորտի, սոցիալական, կրթության (նպատակ ունենալով աջակցելու` հայրենասիրության, պետականության և մարդասիրության ոգով անձի դաստիարակության գործընթացին) ոլորտներին առնչվող հանրային և մասնավոր տարաբնույթ միջոցառումների» կազմակերպմամբ ու իրականացմամբ: Դրանք են փառատոնները, համերգները, հանդեսները, հուշ-երեկոները,  լուսաձայնային ներկայացումները, շքահանդեսներ, կինոդիտումներ, թատերական ներկայացումներ, ցուցահանդեսներ,  ապրանքների ցուցահանդես-վաճառքներ,  տոնավաճառներ, սպորտային մրցույթներ, պորտային դասընթացներ, գիտաժողովներ, դասախոսություններ, բանախոսություններ,  սեմինարներ, մասնավոր և հանրային հանդիսություններ, հանրային սննդի կազմակերպում և իրացում, կինոֆիլմերի, տեսաֆիլմերի, հեռուստատեսային ծրագրերի, տեսահոլովակների, վիզուալ գովազդի արտադրության և դրանց հետ կապված ծառայությունների մատուցում, ձայներիզների, խտասկավառակների, կրիչների վրա երաժշտության, ձայնային    տեղեկատվության բնօրինակի գրառման ծառայությունների կազմակերպում, մարզահամերգային միջոցառումների բնույթից բխող հուշանվերների և կենցաղային իրերի արտադրության կազմակերպում և իրացում:

Հիշեցնենք՝ ՄՀՀ-ը նախկին սեփականատիրոջից հետ վերցվեց կառավարության որոշմամբ՝ պետությանն ունեցած պարտքի դիմաց և հանձնվեց Պաշտպանության նախարարությանը:

Ի դեպ, նոր ՊՈԱԿ-ը գործելու է հենց այս գերատեսչության կազմում, իսկ կառավարման խորհրդի անդամներին նշանակելու է անձամբ պաշտպանության նախարարը: