Փաստ ինֆո

Արդեն 8 ամիս է Հայաստանի հոկեյի ֆեդերացիան ունի նոր ղեկավարներ: Նախագահի պաշտոնը զբաղեցնում է Սամվել Զախարյանը, իսկ գլխավոր քարտուղարն է Վահրամ Սարգսյանը: Armsport.am-ի հետ զրույցում նրանք հավաստիացրին, որ 2015-16 թվականները  Հայաստանում տափօղակով հոկեյի համար զարգացման եւ առաջխաղացման տարիներ են լինելու:

- Ինչպիսի՞ն են 2015 թվականին ֆեդերացիայի ծրագրերը:

 - (Վ.Ս.). 2015 թվականն, ինչ խոսք, նախորդի համեմատ դեպի առաջ քայլ է գրանցելու: Մենք նախատեսում ենք անպայման մասնակցել 2016 թվականի աշխարհի առաջնության C դիվիզիոնին մասնակցելը որը մեծ քայլ կլինի մարզաձեւում: Մեր նպատակը ոչ միայն պարզապես մասնակցությունն է, այլ նաեւ հաջողություն գրանցելը:

Առաջնությանը գլխավոր հավաքականներից զատ տեղի է ունենալու նաեւ երիտասարդական եւ պատանեկան հավաքականների առաջնությունը: Մենք նախատեսում ենք մասնակցել բոլոր տարիքային խմբերի մրցաշարերին:

Հավաքականը նախապատրաստությունը կսկսկի սեպտեմբերից, իսկ առաջնությունը նախատեսված է հաջորդ տարվա սկզբին:

Նշեմ նաեւ, որ մինչեւ 18 տարեկանների հավաքականը հրավեր է ստացել մասնակցել Թուրքմենստանի նախագահի գավաթին: Այդ մրցաշարը տեխնիկական հարցերի պատճառով մինչեւ փետրվար հետաձգվել է: Գավաթի խաղարկությանը 8 թիմեր են մասնակցելու:

- 2014 թվականի նոյեմբերին մինչեւ 16 տարեկան հոկեյիստները բավականին լավ հանդես եկան Լեհաստանում. ինչի՞ արդյունքն էր այդ հաղթանակը:

 - (Վ.Ս.) Բավականին մարտունակ կազմ էր հավաքվել, որը հիանալի հանդես եկավ: Պարզապես անհավանական էր, երբ մեր պատանի հոկեյիստները հաղթեցին չեխերին: Պարտվեցինք միայն Բելառուսի ընտրանուն, սակայն դա այդքան էլ հիասթափեցնող չէր: Կարեւորն այն էր, որ երեխաները ձգտում ունեին եւ հետագայում նրանք կարող են հիանալի խաղացողներ դառնալ:

 -  Ի՞նչ է արվում հոկեյի մասսայականությունը բարձրացնելու եւ երեխային մեջ մարզաձեւի հանդեպ նվիրումը սերմանելու համար:

 - (Ս.Զ.) Հոկեյն այնպիսի մարզաձեւ է, որ մասսայականության համար որեւէ խնդիր չունի: : Երբ մի քանի ամսով մարզահամերգային համալիրը տրամադրված էր հոկեյին, այդժամ երեխաների պակաս չի եղել, շատերն են ցանկացել մարզվել:

Վստահ եմ՝ մանկապատանեկան մարզադպրոցի բացումից հետո երեխաների մեծ հոսք է լիենելու, քանի որ մարզաձեւը «վարակիչ» է եւ շատերն են ցանկանալու զբաղվել հոկեյով: Ունենք բոլոր նախադրյալները մեր առջեւ դրված նպատակներն իրագործելու համար: Այն համոզմանն ենք, որ պետք չէ շտապել, այլ քայլ առ քայլ, ամեն ինչ հաշվարկելով դեպի զարգացում գնալՀեռահար ծրագրեր կան նաեւ կանանց հոկեյի հետ կապված: Ամբողջ աշխարհում այժմ կանանց թիմեր են ստեղծվում եւ մեծ թափով վերելք է գրանցվում: Կգա ժամանակը, երբ մենք նույնպես կանանց մարտունակ հավաքական կունենանք:

 - Նշեցիք, որ մասսայականության առումով հատկապես պատանիների շրջանում որեւէ խնդիր չկա: Իսկ ի՞նչ է պետք Հայաստանում այդ սերնդի զարգացման եւ առաջխաղացման համար:

 - (Ս.Զ.) Իրականում հոկեյը ծախսատար մարզաձեւ է, 100 ծնողից գուցե 1-ը ցանկանա, որ իր երեխան հոկեյով զբաղվի, սակայն կա հարցի մյուս կողմը: Ծնողը մտադրվում է, որ իր երեխան կտրվի փողոցից եւ պատրաստ է գումարներ ծախսել, որպեսզի իր երեխան որեւէ մարզաձեւով զբաղվի: Հոկեյը տալիս է այդ հնարավորությունը. այն բավականին ջանքեր պահանջող մարզաձեւ է, իսկ յուրաքանչյուր մարզիկ ձգտում է ուժերի առավելագույնը ներդնել: Քանի որ ինքս հոկեյիստ եմ եղել (Հայաստանի հոկեյի նորակազմ հավաքականի ավագ,- խմբ) ծանոթ եմ այն ճանապարհին, որով պետք է անցնի իսկական մարզիկը: Հոկեյը բնավորություն, ուժ, ճարպկություն է պահանջում: Ֆեդերացիայում վստահ ենք, որ եկող սերունդը շատ լավ լրացնելու է մեծահասակներին եւ հերթափոխը կայանալու է:

 - Ֆեդերացիան ինչպիսի՞ գործելաոճով է առաջնորդվում եւ ո՞ր աշխատանքներն են կարեւորվում:

 - 8 ամիս առաջ ֆեդերացիայում ղեկավար կազմի փոփոխություններ եղան, եւ մենք այդ ժամանակից որդեգրեցինք աշխատանքների տեղին կազմակերպման քաղաքականությունը:

Հատկապես տափօղակով հոկեյում մեծ դեր ունի այն հանգամանքը, որ նախկին հոկեյիստը շարունակի գործունեությունը մարզաձեւում. դա միմիայն կնպաստի տվյալ շրջանակի առաջխաղացմանը:

Ինչպես հայտնի է, ամռանը Երեւանում մեկնարկել է ձմեռային որոշ մարզաձեւերի համար նախատեսված սառցադաշտի շինարարությունը, որի ավարտը նախատեսված է աշնան սկիզբին: Խոսելով մարզակառույցի շինարարական եւ ուղեկից հարցերի մասին՝ Սամվել Զախարյանն ասաց հետեւյալը.

«Ռուսական «Մոնարխ» ընկերությունը 5 միլիոն դոլար է ներդրել սառցադաշտի կառուցման համար: Քաղաքապետարանի վերահսկմամբ 6-7 ամիս է արդեն ընթանում է շինարարությունը եւ այն սեպտեմբեր-հոկտեմբեր ամիսներին շրջանառության կհանձնվի: Մարզակառույցը համապատասխանելու է միջազգային բոլոր ստանդարտներին եւ բազմապիսի մրցաշարեր կազմակերպելու մեծ հնարավորություններ է ընձեռելու:

Ֆեդերացիան ամեն ինչ անելու է, որպեսզի մանկապատանեկան մարզադպրոցի կայացման հարցը լուծվի եւ աշխատակիցները, մարզիչները ճիշտ ուղով շարժվեն»:

 - Ինչքանո՞վ եք ծանոթ շինարարական աշխատանքներին եւ ի՞նչ սպասումներ ունեք մարզակառույցից:

 - Մենք մի քանի տարի առաջ պարզապես երազել կարող էինք նման սառցադաշտի մասին: Մի քանի ամսից կունենանք այն եւ մեզ կմնա հետագա աշխատանքների ճիշտ կազմակերպումը: Մի քանի օր առաջ եմ այցելել եւ հետեւել աշխատանքներին, որոնք շատ բարձր մակարդակով էին կազմակերպված: Հետագայում քաղաքապետարանի հետ կկազմվեն աշխատանքային փուլերը եւ մարզադպրոցի կայացման ծրագրերը:

Սառցադաշտից սպասումները շատ մեծ են, քանի որ այն հիմնավոր դեր է խաղալու Հայաստանում տափօղակով հոկեյի զարգացմանը, մարզումների ավելի հարմար կազմակերպմանը: