Փաստ ինֆո

Այսօր՝ ժամը 10:00-ից սկսած, ՀՀ Վճռաբեկ դատարանի գրադարանի դահլիճում մեկնարկել է ՄԻԵԴ-ում ՀՀ դատավորի պաշտոնի համար հատարարված մրցույթի հացազրույցի փուլը:

Մրցութային հանձնաժողովը յուրաքանչյուր հավակնորդի կարող է քննել ոչ ավելի քան 2 ժամ: Ի դեպ, հենց այս փաստը հաշվի առնելով՝ արդարադատության նախարարությունում չեն բացառում, որ մրցույթը կարող է տևել մի քանի օր:

Նշենք, որ ներկայացված 12 մասնակիցներից հարցազրույցի փուլը կհաղթահարեն միայն 3-ը, որոնցից առնվազն 1-ը, ըստ գործող կարգի, պետք է լինի կին ներկայացուցիչ:

Մրցույթի ավարտին, դրա արդյունքները` 3 թեկնածուների անուններով, կվավերացվեն ՀՀ նախագահի կողմից և արտաքին գործերի նախարարության միջոցով կուղարկվեն Եվրոպայի խորհրդի խորհրդարանական վեհաժողովի ընտրությանը: Ի դեպ, ինչպես նախագահը, այնպես էլ ԵԽԽՎ-ն իրավունք ունեն մերժել բոլոր 3 թեկնածուներին, և այդ դեպքում պետք է նոր մրցույթ հայտարարվի:

Հիշեցնենք՝ մրցույթին մասնակցելու հայտ նախապես ներկայացրել էր 14 անձ, որոնցից մեկը` Արմեն Սարվարյանը չէր հաղթահարել մրցույթի փաստաթղթային փուլը: Իսկ Արմեն Մելքումյանը հետ էր վերցրել դիմումը մի քանի օր առաջ` հրաժարվելով հետագա պայքարից: Այսպիսով, այս պահին ՄԻԵԴ-ում ՀՀ դատավորի հավակնորդները մնում են 12-ը:

Ինչպես «Փաստինֆո»-ի հետ զրույցում ասաց արդարադատության նախարարի մամուլի քարտուղար Ծովինար Խաչատյանը, գործող կարգը թույլ է տալիս թեկնածուներին, մրցույթի ցանկացած փուլում և ցանկացած պահի հրաժարվել հետագա պայքարից:

«Քանի որ թեկնածուների ընտրությունը հարցազրույցի կարգով է անցկացվում, և դրա համար նախապես չեն տպագրվել քվեաթերթիկներ` մասնակիցների անուններով, նրանք կարող են ցանկացած պահի հետ վերցնել իրենց դիմումը և դուրս գալ պայքարից»,- ասաց Ծովինար Խաչատրյանը: