Փաստ ինֆո

Մի շարք ՀԿ-ներ, փաստաբաններ ու ՀՀ քաղաքացիներ այսօր հայտարարություն են տարածել, որում իրենց մտահոգությունն են հայտնում Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության գործընթացի գաղտնիության շուրջ:

«Տեղեկատվության տրամադրման հետևողական և անդրդվելի մերժումները լուրջ կասկածներ են հարուցում ՄԻԵԴ-ում Հայաստանի Հանրապետության դատավորի ընտրության գործընթացի օրինավորության նկատմամբ»,-ասված է հայտարարության մեջ:

Հայտարարության հեղինակները մրցութային հանձնաժողովից պահանջում են «ապահովել արդար, թափանցիկ և պատշաճ գործընթաց՝ պահպանելով ՀՀ Սահմանադրության 27-րդ հոդվածով և «Տեղեկատվության ազատության մասին» ՀՀ օրենքով` յուրաքանչյուր քաղաքացու համար երաշխավորված տեղեկություններ փնտրելու և ստանալու իրավունքը, ինչպես նաև 27.1-րդ հոդվածով երաշխավորված իրավասու պետական մարմիններին դիմում ներկայացնելու և ողջամիտ ժամկետում պատասխան ստանալու իրավունքը:

Հայտարարությանը միացած կազմակերպություններն ու անհատները պահանջում են դիմող կազմակերպություններին և ԶԼՄ-ներին թույլ տալ ծանոթանալ մրցութային հանձնաժողովի գրանցամատյանին և տրամադրել հանձնաժողովի երեկվա նիստի արձանագրությունը և հետագա աշխատանքային բոլոր փաստաթղթերը:

«ՄԻԵԴ-ում Հայաստանի դատավորի թեկնածուների ընտրության պատշաճ գործընթացը չի կարող անցնել աննկատ և գաղտնի հանրության համար: Դռնփակ և գաղտնի գործելաոճը վնասելու է և’ հանձնաժողովի անդամների վարկանիշին, և’ բացասական հետևանքներ է ունենալու ընտրված թեկնածուների համար»,- նշում են հայտարարության հեղինակները` կոչ անելով «ձեռնպահ մնալ ժողովրդավարական կառավարմանն անհարիր գործելաոճից և իրականացնել արդար և թափանցիկմրցույթ»:

Հայտարարության տակ ստորագրել են «Իրավունքի Եվրոպա միավորում», «Թրանսփարենսի Ինթերնեշնլ հակակոռուպցիոն կենտրոն», Ժուռնալիստների «Ասպարեզ» ակումբ, «Հելսինկյան քաղաքացիական ասամբլեայի Վանաձորի գրասենյակ», «Համագործակցություն հանուն ժողովրդավարության», «Սպիտակի Հելսինկյան խումբ», «Էկոլոգիական իրավունք», «Կանանց աջակցման կենտրոն», «Խոսքի ազատության  պաշտպանության կոմիտե», «Ընդդեմ իրավական կամայականության», «Նոր սերունդ», «Երաշխիք քաղաքացիական հասարակության կենտրոն», «Երեւանի մամուլի ակումբ» ՀԿ-ները, փաստաբաններ Լուսինե Սահակյանը, Երվանդ Վարոսյանը, Նիկոլայ Բաղդասարյանն ու ԱրաԶաքարյանը, ինչպես նաև Մարդու իրավունքների նախկին պաշտպան Լարիսա Ալավերդյանն ու ակտիվիստ Ծովինար Նազարյանը: