Փաստ ինֆո

Ազզային ժողովն այսօր սկսեց իր հերթական քառօրյա նիստերի աշխատանքը:

Ինչպես քիչ առաջ հայտարարեց ԱԺ նախագահ Գալուստ Սահակյանը, պատգամավորների առնվազն մեկ երրորդի նախաձեռնությամբ՝ ժամը 18:30-ին հրավիրվել է արտահերթ նիստ:

Օրակարգում ԴԱՀԿ-ի, վարչարարության հիմունքների մասին օրենքներում և Վարչական իրավախախտումների վերաբերյալ ՀՀ օրենսգրքում փոփոխությունների փաթեթն է:

Ինչպես և ակնկալվում էր, ՀՀԿ խմբակցության ղեկավար Վահրամ Բաղդասարյանը հայտարարեց, որ քաղաքական մեծամասնությունը չի մասնակցի արտահերթ նիստին այն հիմնավորմամբ, որ «խնդրահարույց օրենսդրական կարգավորումների» վերաբերյալ Սահմանադրական դատարանում առկա է Մարդու իրավունքների պաշտպանի դիմումը, որի հիման վրա գործի դատաքննությունը նշանակված է նոյեմբերի 25-ին:

Ըստ նրա՝ ավելին` ՀՀ կառավարությունն ավելի վաղ հայտնել է հիշյալ նախագծերի վերաբերյալ իր իրավական դիրքորոշումը՝ միաժամանակ նշելով «խնդրահարույց հարցի նորովի իրավակարգավորման մոդելի իր տեսլականը»՝ օրենսդրական նախաձեռնության հեղինակներին առաջարկելով փաթեթի քննարկմանն անդրադառնալ ՍԴ որոշումից հետո:

Նշենք, որ ՀՀԿ-ի չմասնակցության պարագայում ԱԺ արտահերթ նիստը, ըստ ամենայնի, չի կայանա, քանի որ նիստն սկսվելու համար անհրաժեշտ քվորումը չի ապահովվի:  

Ի դեպ` ԱԺ այսօրվա աշխատանքի մեկնարկը բավականին բուռն էր` պայմանավորված օրակարգում ընդգրկվելու համար ԱԺ մշտական հանձնաժողովների կողմից մի շարք օրինագծերին դրական եզրակացություն չտալու հետ: Նման դեպքերում տվյալ նախագծերն օրակարգում ընդգրկելու համար պետք է առանձին-առանձին դրվեն քվեարկության:

Նշենք, որ այդպիսիք երեքն էին, և բոլորն էր խորհրդարանի քվեարկությամբ մերժվեցին:

Հիշյալ նախագծերի թվում էր «Հայ ազգային կոնգրես» խմբակցության անդամ Նիկոլ Փաշինյանի հեղինակած` սահմանապահ համայնքների մասին օրինագիծը:

Քաղաքական մեծամասնությունը, այդ թվում՝ ԱԺ նախագահը, կարևորեցին խնդիրը, սակայն խնդրին ավելի համապարփակ լուծում տալու նպատակով, հնարավոր համարեցին Ն.Փաշինյանի առաջարկությունները քննարկել ԱԺ-ում կառավարության կողմից ներկայացվելիք օրենսդրական նախաձեռնության քննարկման ժամանակ:

Ինչպես հայտնեց Գ.Սահակյանը, չի կարելի նման կարևորագույն խնդիրը լուծել «հատվածային օրենքով», հատկապես, որ ԱԺ բոլոր վեց խմբակցություններն առաջարկներով դիմել են կառավարությանը:  

Օրենսդրական նախաձեռնության հեղինակ Նիկոլ Փաշինյանն այս կապակցությամբ ընդգծեց, որ կառավարության օրենսդրական նախաձեռնությամբ սահմանպահ համայնքներին պետբյուջից գումարներ նախատեսված չեն, իսկ առաջարկվող արտոնություններն ուղղված են որոշակի ինստիտուտներին, տարածաշրջաններին: Մինչդեռ իր նախագծով՝ արտոնությունները նախատեսված են անմիջապես համայնքների բնակիչների համար: