Փաստ ինֆո

«Մեղադրողի ճառը մեկ անգամ ևս ապացուցեց, որ «սա իշխանությունների հաշվեհարդարն էր այն անձանց նկատմամբ, ովքեր իրենց օրինական շահերից ելնելով՝ իրենց իրավունքներն էին փորձում և իրենց գաղափարներն էին փորձում տեղ հասցնել:
Սարքեցին սադրանք, անձանց ներկայացրեցին որպես խուլիգաններ և այսօր էլ տեսանք՝ ինչպիսի դաժան միջնորդություն ներկայացվեց»,- հայտարարել է Շանթ Հարությունյանի փաստաբան Ինեսսա Պետրոսյանը` մեկնաբանելով Շանթ Հարությունյանի եւ մյուսների գործով դատախազի մեղադրական ճառը:

Ավելի վաղ «Փաստինֆո»-ն տեղեկացրել է, որ Շանթ Հարությունյանի ու մյուսների գործով այսօրվա դատական նիստում մեղադրող Գևորգ Գևորգյանը միջնորդեց Շանթ Հարությունյանին դատապարտել 7 տարվա, իսկ նրա անչափահաս որդուն՝  Շահեն Հարությունյանին՝ 5 տարվա ազատազրկման:

Մեղադրողը միաժամանակ միջնորդեց Վահե Մկրտչյանին դատապարտել ութուկես տարվա, Ալբերտ Մարգարյանին՝ ութ տարվա, Վարդան Վարդանյանին, Ավետիս Ավետիսյանին, Լիպարիտ Պետրոսյանին 6,5-ական տարվա, Ալեք Պողոսյանին ու Հայկ Հարությունյանին՝ վեց տարվա, Մկրտիչ Հովհաննիսյանին՝  5.5 տարվա, Սևակ Մնացականյանին, Տիգրան Պետրոսյանին ու Արմեն Հովհաննիսյանին` 4-ական տարվա ազատազրկման, իսկ Միսակ Առաքելյանին` 50 հազար ՀՀ դրամի տուգանքի:  

Դատախազի գնահատմամբ` դատաքննության ընթացքում լիովին հիմնավորվել է նախաքննական մարմնի առաջադրած մեղադրանքն առ այն, որ Շանթ Հարությունյանը և ևս 13 ամբաստանյալներ խմբով, որպես զենք օգտագործվող առարկայի գործադրմամբ, կատարել են խուլիգանություն` զուգորդված իշխանության ներկայացուցչին դիմադրություն ցույց տալով:

Շանթ Հարությունյանին մեղադրանք է առաջադրվել՝ ՀՀ քրեական օրենսգրքի 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, Ալբերտ Մարգարյանին՝ 258-րդ հոդվածի 4-րդ մասով և 316-րդ հոդվածի 2-րդ մասով՝ իշխանության ներկայացուցչի կյանքի կամ առողջության համար վտանգավոր բռնությունը՝ կապված նրանց կողմից իրենց ծառայողական պարտականությունները կատարելու հետ, Ալեք Պողոսյանին՝ 258-րդ հոդվածի 4-րդ մասով, Արմեն Հովհաննիսյանին՝ 258-րդ հոդվածի 3-րդ մասի 1-ին և  2-րդ կետերով՝ մի խումբ անձանց, կամ կազմակերպված խմբի կողմից կատարված խուլիգանություն, որը զուգորդվել է իշխանության ներկայացուցչին, կամ հասարակական կարգի պահպանության պարտականություն իրականացնող, կամ հասարակական կարգի խախտումը խափանող անձին դիմադրություն ցույց տալով, Ավետիս Ավետիսյանին՝ 258-րդ հոդվածի 4-րդ մասով, Հայկ Հարությունյանին՝ 258-րդ հոդվածի 4-րդ մասով և 268-րդ հոդվածի 1-ին մասով՝ հոգեմետ  նյութերի ապօրինի շրջանառություն` առանց իրացնելու նպատակի, Լիպարիտ Պետրոսյանին՝ 258-րդ հոդվածի  4-րդ մասով, Միսակ Առաքելյանին՝ 258-րդ հոդվածի 1-ին մասով, Մկրտիչ Հովհաննիսյանին՝ 258-րդ հոդվածի 4-րդ մասով, 316-րդ հոդվածի 2-րդ մասով, Սևակ Մնացականյանին՝ 258-րդ հոդվածի 3-րդ մասի 1 և 2-րդ կետերով, Շահեն Հարությունյանին՝ 258-րդ հոդվածի 4-րդ կետով, Տիգրան Պետրոսյանին՝ 258-րդ հոդվածի 3-րդ մասի 1-ին և  2-րդ կետերով, Վահե Մկրտչյանին՝ 258-րդ հոդվածի 4-րդ մասով, 316-րդ հոդվածի 2-րդ մասով, Վարդան Վարդանյանին՝ 258-րդ հոդվածի 4-րդ մասով:

Մեղադրողը պատժաչափերի միջնորդություն անելիս դատարանից խնդրեց հաշվի առնել մեղմացուցիչ և ծանրացուցիչ հանգամանքները, անձը բնութագրող տվյալները՝ մինչև 14 տարեկան երեխաների առկայությունը, Վարդան Վարդանյանի դեպքում ԼՂՀ ու Հայաստանի սահմաններում մարտական գործողություններին մասնակցելը, որպես ծանրացուցիչ հանգամանք` բազմաթիվ դեպքերում նշվեց դեպքերին ակտիվ դերակատարությունը, հանրության համար վտանգավոր կամ առանձնապես վտանգավոր եղանակով հանցանք կատարելը:    

Ի.Պետրոսյանը նշեց, թե իր համար զարմանալի էր, որ նաև «անչափահաս երեխայի՝ Շահեն Հարությունյանի վերաբերյալ ազատազրկելու պատվեր էր իջեցվել»:   

Հաջորդ դատական նիստում պաշտպանական ճառերով հանդես կգա պաշտպանական կողմը: