Փաստ ինֆո

«Ֆեռո» ՍՊ ընկերության մասնակից «Ֆաստէքս Հոլդինգ» ՍՊ ընկերության հիմնադիրներից մեկը՝ Ռոբերտ Ավետիսյանը, դատավճռով ճանաչվել  է  անպարտ և արդարացվել մեղադրանքներից մեկում՝ ՀՀ քրեական օրենսգրքի 193-րդ հոդվածով՝ կանխամտածված սնանկությունը՝  արարքում հանցակազմի բացակայության հիմքով:

Ռոբերտ Ավետիսյանի նկատմամբ ընտրված խափանման միջոցը` կալանավորումը, փոխվել է չհեռանալու մասին ստորագրության, և նա անհապաղ ազատվել է կալանքից դատական նիստերի դահլիճում:

Ըստ մեղադրանքի՝ Ռ.Ավետիսյանը, հանդիսանալով «Ֆեռո» ՍՊ ընկերության մասնակից «Ֆաստէքս Հոլդինգ» ՍՊ ընկերության հիմնադիրներից,  2009-2012թթ. ընթացքում իրականացրած ձեռնարկատիրական գործունեության վերաբերյալ ՀՀ ԿԱ ՊԵԿ Մաշտոցի հարկային տեսչություն ներկայացրած հաշվարկներում և հաշվետվություններում արտացոլված հարկային պարտավորությունները, սեփական շահերից ելնելով չի կատարել, թեև ունեցել է դրանք վճարելու հնարավորություն և կանխամտածված ստեղծելով անվճարունակության հատկանիշներ` պարտատիրոջը` պետությանը, պատճառել է խոշոր չափի` 303.068.319 դրամի վնաս, որից հարկի գումար` 203.252.735, տույժ` 99.784.084 դրամ, տուգանք` 31.500 դրամ:

Ավելի ուշ դատարանի ընդունած որոշմամբ՝ Ռոբերտ Ավետիսյանն ու Արմեն Մանուկյանն ազատվել են համապատասխանաբար՝ ՀՀ քրեական օրենսգրքի 38-205-րդ հոդվածի 1-ին մասով՝ հարկերը, տուրքերը կամ պարտադիր այլ վճարումները վճարելուց չարամտորեն խուսափելը կազմակերպելը, և ՀՀ քրեական օրենսգրքի 205-րդ հոդվածի 1-ին մասով՝ հարկերը, տուրքերը կամ պարտադիր այլ վճարումները վճարելուց չարամտորեն խուսափելը պատասխանատվությունից, և նրանց նկատմամբ քրեական հետապնդումը դադարեցվել է:

Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի դեպոզիտ հաշվեհամարին Արմեն Մանուկյանի կողմից որպես հայցի ապահովման գումար վճարված 5.811.610 ՀՀ դրամը փոխանցվել է ՀՀ պետական բյուջե, որից 4.657.085 ՀՀ դրամը՝ որպես սոցալական ապահովության վճար, իսկ 1.154.525 ՀՀ դրամը՝ որպես եկամտահարկ:

Ռոբերտ Ավետիսյանին և «Ֆեռո» և «Վիվա-Առգո» ՍՊ ընկերություններին սեփականության իրավունքով պատկանող անշարժ գույքի վրա դրված կալանքը, ինչպես նաև Ռոբերտ Ավետիսյանի և Արմեն Մանուկյանի նկատմամբ ընտրված խափանման միջոցը` ստորագրությունը  չհեռանալու մասին,  վերացվել է:

Արդարացման դատավճռի ու քրեական հետապնդումը դադարեցնելու որոշման համար հիմք են ծառայել ՀՀ գլխավոր դատախազության մեղադրանքի պաշտպանության և դատական ակտերի բողոքարկման վարչության ավագ դատախազ Մ.Մարտիրոսյանի հայտարարությունը:

Մեղադրողը դատարանում կրկնակի դատահաշվապահական հանձնաժողովային փորձաքննության եզրակացության հետազոտումից հետո հայտարարել էր, որ հրաժարվում է Ռոբերտ Ավետիսյանին ՀՀ քրեական օրենսգրքի 193-րդ հոդվածով առաջադրված մեղադրանքից՝ միջնորդելով  նրա նկատմամբ քրեական հետապնդումը մեղադրանքի այդ մասով դադարեցնել` հանցակազմի բացակայության հիմքով:

Միևնույն ժամանակ մեղադրողը նշել էր, որ որոշում է կայացրել՝ ամբաստանյալներին առաջադրված մեղադրանքը փոփոխելու և նրանց նոր մեղադրանք առաջադրելու մասին:

Որոշումների համաձայն՝ ամբաստանյալ Ռոբերտ Ավետիսյանին ՀՀ քրեական օրենսգրքի 38-205-րդ հոդվածի 1-ին մասով մեղադրանք է առաջադրվել այն բանի համար, որ նա, 29.04.2003թ.-ից փաստացի ղեկավարելով «Ֆեռո» ընկերության ընթացիկ գործունեությունը, հարկային պարտավորությունները կատարելուց խուսափելու դիտավորությամբ կազմակերպել է ընկերության տնօրեններ Արմեն Մանուկյանի, Արթուր Գրիգորյանի և Ֆելիքս Ավետիսյանի կողմից հարկային մարմիններին ներկայացրած, հարկման համար հիմք հանդիսացող 2009, 2011 թվականների շահութահարկի, 2010թ. 1-ից 4-րդ, 2011թ. 1-ին եռամսյակների եկամտահարկի, 2009թ. հուլիս, սեպտեմբեր, 2010թ. դեկտեմբեր ամիսների ԱԱՀ-ի հաշվարկներում և 2010թ. հունվարից մինչև 2011թ. հունվար ամիսների պարտադիր սոցիալական վճարների հաշվետվություններում ակնհայտ խեղաթյուրված տվյալներ մտցնելը և այդ միջոցով չարամտորեն խուսափել է խոշոր չափի` 4.474.202 դրամ հարկերը և սոցիալական վճարները վճարելուց:
 
Արմեն Մանուկյանին ՀՀ քրեական օրենսգրքի 205-րդ հոդվածի 1-ին մասով մեղադրանք է առաջադրվել այն բանի համար, որ նա, 09.12.2008-14.10.2010թթ. ընկած ժամանակահատվածում հանդիսանալով «Ֆեռո» ՍՊԸ-ի տնօրեն Ռոբերտ Ավետիսյանի ղեկավարմամբ և կազմակերպմամբ հարկային մարմիններին ներկայացրած, հարկման համար հիմք հանդիսացող 2009թ. շահութահարկի հաշվարկում, 2010թ.-ի հունվար-սեպտեմբեր ամիսների պարտադիր սոցիալական ապահովագրության վճարների հաշվետվություններում, 2009թ. հուլիս և սեպտեմբեր ԱԱՀ-ի և 2010թ.-ի 1-ին, 2-րդ, 3-րդ եռամսյակի եկամտահարկի հաշվարկներում ակնհայտ խեղաթյուրված տվյալներ մտցնելու միջոցով, չարամտորեն խուսափել է խոշոր չափի` 3.284.702 դրամ հարկերը և պարտադիր սոցիալական ապահովագրության վճարները վճարելուց:  

Մինչ հիշյալ որոշումը կայացնելը՝ ամբաստանյալները դատարանին ներկայացրել էին 1.134.301 ՀՀ դրամ և 2.685.660 ՀՀ դրամ գումարները ՀՀ պետական բյուջե վճարելու վերաբերյալ անդորրագրերը և միջնորդել իրենց ազատել պատասխանատվությունից` նշելով, որ մինչ այդ դատարանի դեպոզիտ  հաշվեհամարին վճարել են նաև` 5.811.610 ՀՀ դրամ գումար, այսինքն՝ հիշյալ գումարների հանրագումարը կազմում է հանցագործությամբ պատճառված վնասի և դրա վրա հաշվարկված տույժերի և տուգանքների գումարը:

Հաշվի առնելով, որ Ռոբերտ Ավետիսյանը և Արմեն Մանուկյանը ՀՀ քրեական օրենսգրքի 205-րդ հոդվածի 1-ին մասով նախատեսված հանցագործությամբ պատճառված վնասը` 4.474.202 ՀՀ դրամ գումարը, ու այդ գումարի վրա հաշվարկված` 2.249.009 ՀՀ դրամ տույժերը ու 2.908.360 ՀՀ դրամ տուգանքները` ընդհանուր 9.631.571 ՀՀ դրամ գումարը հատուցել են, դատարանը գտել է, որ նրանք ենթակա են ազատվելու քրեական պատասխանատվությունից: