Փաստ ինֆո

Այսօրվա ռազմաքաղաքական իրավիճակի և սահմանային իրադրության  վերլուծությունը հանգեցնում եզրակացության, որ սահմաններում այսօր իրավիճակը կայուն լարված է: Այս մասին Ազգային ժողովում՝ ի պատասխան «Օրինաց երկիր» խմբակցության ղեկավար Հեղինե Բիշարայնի հարցի, հայտնեց ՀՀ պաշտպանության նախարար Սեյրան Օհանյանը:

«Հակառակորդի կողմից անընդհատ խախտւմները նորություն չեն մեզ համար: Շատ դեպքերում և մենք,  և մեր հասարակությունը պետք է նաև հասկանանք և համակերպվենք այն իրավիճակի հետ, որ քանի որ մենք ունենք հակամարտության խնդիր և վերջնական լուծված չէ խաղաղության խնդիրը, ապա մենք պետք է մեր հակառակորդի, այսպես ասած, «ռազմատենչ եռանդը» լուծենք հակագործողությունների կամ կանխարգեկիչ գործողությունների միջոցով»,-ընդգծեց նախարարը:

Նրա կարծիքով, հակառակորդի անընդհատ փորձերը՝ դիտարկել և տեսնել մեր թույլ կողմերը, դիտավորյալ և պլանավորված բնույթ են կրում: Մանավանդ, որ և միջազգային կառույցների հետ հանդիպումների ընթացքում, և հայկական սկզբունքներն ընդհանուր առմամբ այդպիսին են, որ հարցի լուծման համար պետք է վստահության մթնոլորտ ձևավորել: Ըստ նախարարի, այդ մթնոլորտի ձևավորումը կայանում է նրանում, որ «պետք է զերծ մնանք դիպուկահարների կրակոցներից և ետ քաշենք վերջիններիս, հրադադարի ռեժիմն ընդհանուր առմամբ պետք է պահպանվի, կանխվեն դիվերսիոն հետախուզական գործողությունները, և ամենակարևորը՝ միջազգային հետաքննության անցկացումն է»:

Ս.Օհանյանը հայտնեց, որ հատկապես վերջին խնդրի հետ կապված բազմիցս խոսել է, այդ թվում՝ նաև Անջեյ Կասպրչիկի, համանախագահների հետ: «Ցավոք սրտի, ֆինանսական և նյութատեխնիկական ապահովման խնդիրները, նաև մասնագետների առկայությունը և նրանց պահպանման խնդիրները թույլ են տալիս մեր համանախագահներին ասել, որ իրենք պատրաստ չեն այսօր անցնել միջազգային հետաքննությանը»,-նշեց նա:

Նախարարը վստահեցրեց, որ «միայն ինժեներական կառույցների, դիտարկման, հայտնաբերման, նշանառման և խոցման միջոցների շնորհիվ մենք կարող ենք հակազդել, նաև կանխարգելել այդ խնդիրները»՝ հավելելով, որ ԶՈՒ հրամանատարությունը, տեղերում համապատասխան մարտավարության և գործողությունների շնորհիվ, դա իրականացնում է: