Փաստ ինֆո

Վարդան Պետրոսյանի նկատմամբ այսօրվա դատական նիստի 2-րդ մասն անցավ առավել լարված մթնոլորտում: Տուժող կողմի նյարդերը տեղի տվեցին Վարդան Պետրոսյանի պաշտպան Նիկոլայ Բաղդասարյանի ներկայացրած մի շարք միջնորդությունների արդյունքում դատավարության ընթացքի երկարաձգվելու հետևանքով:

Պաշտպանի որոշ արտահայտություններին տուժողները ռեպլիկներով էին արձագանքում` հայտարարելով, թե` իզուր են եկել դատարան, որ պաշտպանը շոու է սարքել լրագրողների առաջ, հնչեցին նաև վիրավորական արտահայտություններ: Իսկ Նիկոլայ Բաղդասարյանի այն դիտարկմանը, թե քննիչ Հայկարամ Հակոբյանը 2 անգամ է Վարդան Պետրոսյանին որպես մեղադրյալ ներգրավելու որոշում կայացրել և 2 անգամ է մեղադրանք առաջադրել, տուժողի իրավահաջորդ, վթարի հետևանքով զոհված անչափահասներից մեկի հայրը` Հայկ Հակոբյանն արձագանքեց, թե` «ինքն էլ 2 հոգու է սպանել»:

Ի վերջո դատավոր Վաղինակ Մկրտչյանն ստիպված եղավ սանկցիա կիրառել, նախ` նախազգուշացում տալով, ապա նաև` դատարանի դահլիճից դուրս հրավիրելով Հայկ Հակոբյանին ու տուժող կողմի ևս մեկ ներկայացուցչի:

Ինչ վերաբերում է Վարդան Պետրոսյանի պաշտպան Նիկոլայ Բաղադասարյանի ներկայացրած միջնորդություններին, ապա դրանցից առաջինը, որ կատարվել էր դատական նիստի սկզբում և վերաբերում էր դատավորին ինքնաբացարկ ներկայացնելուն, ապա դատարանը շուրջ 2 ժամ խորհրդակցական սենյակում անցկացնելուց հետո, որոշեց մերժել այն: Փաստաբանն էլ հայտարարեց, թե դատավորը շարունակում է խախտել օրենքը, և ինչպես նախորդ, այնպես էլ այս որոշումը հրապարակեց առանց դրա իրավական հիմքերը նշելու:

Այնուհետև դատարանը մերժեց նաև պաշտպանի ներկայացրած հաջորդ 2 միջորդությունները: Դրանցից առաջինը վերաբերում էր Վարդան Պետրոսյանին որպես կասկածյալ և մեղադրյալ հարցաքննությունների արձանագրությունները անթույլատրելի ապացույցներ համարելուն:

Ի հիմնավորումն իր միջնորդության` Նիկոլայ Բաղդասարյանը մանրամասն ներկայացրեց, որ ցուցմունքները ձեռք են բերվել օրենքով նախատեսված ժամկետների ու ընթացակարգերի խախտմամբ, առանց փաստաբանի ներկայության և չեն ստորագրվել ոչ Վարդան Պետրոսյանի, ոչ իր կողմից` որպես փաստաբանի:

Նիկոլայ Բաղդասարյանի այս միջնոդության վերաբերյալ իր կարծիքը հայտնեց նաև Վարդան Պետրոսյանը: «Առավոտյան ժամը 10-ին գալիս է քննիչը` առանց փաստաբանի, իմ հարցին, թե ինչո՞ւ է նորից եկել առանց փաստաբանի, «փաստաբանը չի գալու»,- պատասխանում է:  Հարցնում եմ` ինչո՞ւ, և նա ամենայն լրջությամբ պատասխանում է` «գնացել է խաշի», և ինձ առաջարկում է նոր փաստաբան, մենք կապվում ենք փաստաբանի հետ, պարզվում է ոչ մի խաշ էլ չկա, ասում է` շտապ գալիս եմ: Այդ ընթացքում քննիչ Հայկարամ Հակոբյանը` առանց իմ փաստաբանի ներկայության, կարդում է ինձ որպես մեղադրյալ ներգրավելու որոշումը, որոշման տակ ես չեմ ստորագրում` պատճառաբանելով իմ  փաստաբանի բացակայությունը: Սպասելու ընթացքում քննիչը սկսում է նորից, գողունի, քողարկված ինձ հարցաքննել»,- ասաց Վարդան Պետրոսյանը:

Նիկոլայ Բաղդասարյանի հաջորդ միջնորդությունը, որ նույնպես մերժվեց, վերաբերում էր Գյուղատնտեսության նախարարության կողմից ներկայացված` վնասի փոխհատուցման մասին քաղաքացիական հայցին:

Հիշեցնենք, վթարի ենթարկված «Նիվա» ավտոմեքենան պատկանել է Գյուղնախարարությանը, ուստի այս կառույցը Վարդան Պետրոսյանից պահանջում է փոխհատուցել վնասը: Սակայն, փաստաբանը, հիմանվորելով, որ Վարդան Պետրոսյանն ունեցել է ապահովագրական պայմանագիր «Ռեսո» ընկերության հետ, միջնորդեց այս կազմակերպությանը ներգրավել դատական նիստին որպես կողմ, քանի որ մեղքի ապացուցման պարագայում, վնասի մի մասը, ըստ պայմանագրի, պարտավորվում է վճարել ապահովագրական ընկերությունը: Բացի այդ, պաշտպանը նաև տեղեկացրեց, որ Վարդան Պետրոսյանի ամբողջ գույքի վրա արգելանք է դրվել այս հիմքով, ինչը, իր խոսքով, ևս անհիմն է:

Տուժող կողմի շահերի ներկայացուցիչ Ռուբեն Բալոյանը ներակայցված միջնոդությունները դատական այս փուլում վաղաժամ համարեց` նշելով, որ դրանք կարելի կլինի ներկայացնել, երբ դատարանը կանցնի փաստական ապացույցների ուսումնասիրության փուլ:

Պաշտպանական կողմի միակ միջնորդությունը, որ դատարանն այսօր բավարարեց վերաբերում էր դատավարությանը 3 նոր վկաներ ներգրավելուն, որոնք նախաքննության ընթացքում ցուցմունք տվել են, բայց դատակոչի ցուցակներում չեն ներգրավվել: Ի դեպ, դրանք այն մարդիկ են, ովքեր ներկա են եղել վթարի վայրում և օգնել են տուժածներին: Դատարանը բավարարեց միջնորդությունը և հայտարարեց, որ այդ վկաները ևս կկանչվեն դատարան:

Սակայն, դա մոտ ապագայում հազիվ թե լինի, քանի որ, ինչպես հայտնեց Նիկոլայ Բաղդասարյանը, դատական հաջորդ նիստերի ընթացքում ինքը ևս մի քանի միջնորդություն է պատրաստվում ներկայացնել դատարանին:

Իսկ դատական այսօրվա նիստն ավարտվեց աշխատանքային ժամի ավարտով պայմանավորված: Դատական հաջորդ նիստը կկայանա ապրիլի 18-ին` ժամը 14:00-ին:

Հեղինակ` Նելլի Դանիելյան