Փաստ ինֆո

Խանդի հողի վրա խոշտանգելու գործով  դատական նիստում այսօր հարցաքննվեց տուժող աղջիկը եւ  հայտարարեց, որ դեպքից հետո՝ լոգարանում է հայտնաբերել, որ ականջի մի մասը չկա, ապա պոկված կտորը տեսել է  միջանցքում` գետնին ընկած, բայց ինքը ձեռք չի տվել:

Խոշտանգման ենթարկված աղջիկն իր ցուցմունքում  հայտնեց, որ  ամբաստանյալ Վաղինակ Ոսկանյանի հետ ծանոթացել է 2012թ.՝   իր ընկերուհու միջոցով։ Չնայած  նրան, որ ինքը ամբաստանյալից 11 տարով մեծ է, ընկերություն են արել, համատեղ ապրել 6-7 ամիս, ինչը տուժողը ամուսնություն չի համարում: Նա նաև նշեց, որ մինչև ամբաստանյալին հանդիպելը նախկինում ամուսնացած  է եղել, երեխաներ չի ունեցել։ Ամբաստանյալի   հիվանդությունների մասին նրա հետ ապրելու ժամանակ տեղյակ չի եղել:

Տուժողը պատմեց, որ  ինքը բարձրացրել է  ամբաստանյալի՝ իրենից տարիքով փոքր լինելու հանգամանքը և առաջարկել դադարեցնել իրենց հարաբերություններն ասելով, որ չի ցանկանում նրա հետ ապրե, առաջացած վեճի հետևանքով ամբաստանյալն էլ շորերը հավաքել է ու հեռացել իր տանից: Օրեր անց՝ գիշերվա ուժ ժամին, Վաղինակը նորից գնացել է տուժողի տուն, որպեսզի նախկին ընկերուհու տանից վերցնի մնացած հագուստը, թակել է դուռը, տուժողը բացել է, իսկ նա էլ, տեսնելով, որ տանը այլ տղամարդ կա, զայրացել է:

Ըստ տուժողի, Վաղինակը չի սպասել, որպեսզի ինքը բացատրի, թե ով է այդ տղամարդը և ծանոթացնի: Մազերը հավաքել է ձեռքերի մեջ, հարվածներ հասցրել մարմնի տարբեր մասերին, ապա` կծել ու պոկել ականջը։ Տուժողի խոսքով, ինքը ցավ է զգացել միայն մազերը քաշելուց  և վախեցել, որ կկորցնի մազերը: Ինքն օգնություն է խնդրել, եկել են հարևանները և ոստիկանություն զանգահարել: Այնուհետև տանը եղած տղամարդը և Վաղինակը հեռացել են:

Տուժողը նաև նշեց, որ իր տանը գտնվող տղամարդը  եղել է իր հեռավոր ազգականը, ում ինքն է    զանգահարել և կանչել, նրանք միասին հաց են կերել և գարեջուր խմել և ոչինչ ավելին: Ըստ տուժողի, ինքն երբևէ առիթ չի տվել, որ ամբաստանյալն  ագրեսիվ դառնա:

Տուժողը հայտարարեց, որ ամբաստանյալը լավ բնավորություն ունի, այս տարվա հունվարից ինքն ու ամբաստանյալը նորից համատեղ ապրում են ամբաստանյալի տանը, անգամ ցանկացել են օրինականացնել իրենց հարաբերությունները և ամուսնանալ:

Հարցաքննվեց նաեւ ամբաստանյալ Վաղինակ Ոսկանյանը, ով իրեն մեղավոր ճանաչեց  առաջադրված մեղադրանքում եւ  պնդեց  իր  նախաքննական ցուցմունքները: Նա  նշեց, որ դեպքի օրը տեսել է տուժողի տան լույսը վառվում է, թակել է դուռը, սկզբում չեն ցանկացել բացել, իսկ երբ ներս է մտել՝ տեսել է օտար տղամարդու՝ «կոշիկները հանած,  նստած հաց են ուտում», ինքն  էլ զայրացել է:

Ըստ ամբաստանյալի, ինքը  չգիտե, թե ինչպես է պատահել, որ կծել է տուժողի ականջը, այդ մասին իմացել է միայն հաջորդ օրը, երբ կամովին գնացել է ոստիկանություն:

Ի դեպ, նշենք, որ ամբաստանյալի նկատմամբ 4 անգամ քրեական գործ է հարուցվել մարմնական վնասվածք պատճառելու և ծեծի ենթարկելու հատկանիշներով, սակայն բոլոր գործերը կարճվել են, ևս մեկ դեպքով էլ իրեն են դանակահարել, որի հետևանքով ամբաստանյալն  ստացել է ծանր մարմնական վնասվածք, իսկ դանակահարող երիտասարդը դատապարտվել է:

Ամբաստանյալը համապատասխան հանձնաժողովի կողմից ոչ պիտանի է ճանաչվել բանակում ծառայելու համար, անգամ պատերազմական պայմաններում, այդուհանդերձ, նախաքննական մարմինը   դատահոգեբանական և  դատահոգեբուժական փորձաքննություններ  չի նշանակել:

Այս բացը լրացնելու համար  գործով  նախագահող դատավոր Վլադիմիր Գրիգորյանը սեփական նախաձեռնությամբ կողմերին առաջարկեց  ամբաստանյալի նկատմամբ նշանակել դատահոգեբանական և  դատահոգեբուժական ամբուլատոր փորձաքննություն` փորձագետներին  առաջադրելով  պատասխանել` ներկա պահին ամբաստանյալը մեղսունա՞կ է, թե ոչ, տառապո՞ւմ է հոգեկան հիվանդությամբ, թե ոչ, հարկադիր բուժման կարիք ունի՞, թե ոչ, ինչպիսի՞ն է Վաղինակ Ոսկանյանի մտավոր զարգացածության աստիճանը:

Դատական նիստը հետաձգվեց անժամկետ, մինչև փորձաքննության եզրակացության ստանալը: