Փաստ ինֆո

 

Այսօր Երևանի Ավան և Նոր-Նորք վարչական շրջանների դատարանում հրապարակվեց 2012թ. հունիս 17-ին «Հարսնաքար»  ռեստորանային համալիրի տարածքում բռնարարքի գործով դատավճիռը: 

 

Ըստ այդմ, բոլոր 6 ամբաստանյալները՝ որոնցից չորսը համալիրի անվտանգության աշխատակիցներ են, մեկը՝ մատուցող, ևս մեկը՝ առաքիչ, դատապարտվեցին 12-ական տարվա ազատազրկման և յուրաքանչյուրը 100 000 ՀՀ դրամ տուգանքի: 

 

Ամբաստանյալներ՝ համալիրի անվտանգության ծառայության աշխատակիցներ Գարիկ Մարգարյանին, Արման Բաղդասարյանին, Արման Խաչատրյանին Նորայր Հայրապետյանին, մատուցող Դավիթ Ադամյանին եւ առաքիչ Արթուր  Բաբլոյանին դատարանը մեղավոր ճանաչեց ՀՀ քրեական օրենսգրքի 112-րդ հոդվածի 2-րդ մասի 6 –րդ և 14 –րդ կետերով, 113-րդ հոդվածի 2-րդ մասի 1,3 կետերով և 118-րդ հոդվածով՝ դիտավորությամբ առողջությանը ծանր վնաս պատճառելը, դիտավորությամբ առողջությանը միջին ծանրության վնաս պատճառելը և ծեծը:

 

Հիշեցնենք, որ գործով մեղադրող կողմն ի դեմս մեղադրողներ՝ Արթուր Դավթյանի և Արմեն Մարուխյանի միջնորդել էին ամբաստանյալներին դատապարտել 13-ական տարվա ազատազրկման և 100 000-ական դրամ տուգանքի:

 

Դատավճիռը շատ բուռն արձագանք ստացավ դեռևս հրապարակման փուլում. ամբաստանյալների և նրանց հարազատների կողմից հնչեցին հայհոյանքներ և անեծքներ ուղղված դատարանին, տուժող կողմին և լրագրողներին, ներառյալ՝ սեռական բնույթի հայհոյանքներ: Աղմուկի մեջ դատավճռի մի մասն անգամ անլսելի դարձավ։ Ամբաստանյալ Արման Բաղդասարյանի պաշտպան Միհրան Պողոսյանը լրագրողներին հայտնեց, որ տուժող կողմի ներկայացրած քաղհայցը դատարանի կողմից թողնվել է առանց քննության։ Միհրան Պողոսյանի գնահատմամբ, դատավոր Դավիթ Հարությունյանի նախագահությամբ կայացված դատավճիռն  ամենաապօրինի դատավճիռներից մեկն է։ Մասնավորապես, իր պաշտպանյալի մասով նա մշեց, որ Ա.Բաղդասարյանը չի մասնակցել միջադեպին, ինչի մասին վկայող բազմաթիվ ապացույցներ կան գործում, ուստի իրենք ակնկալում  էին արդարացման դատավճիռ։ Փաստաբանը տեղեկացրեց, որ պատրաստվում է բողոքարկել դատավճիռը։