Փաստ ինֆո

ՀՀ հատուկ քննչական ծառայությունում կարճվել է ՀՀ ոստիկանության Կենտրոնական բաժնի և ՔԳՎ  Կենտրոնականի քննչական  բաժնի  առանձին պաշտոնատար անձանց  կողմից  բռնությամբ զուգորդված  պաշտոնեական  լիազորությունների  անցում կատարելու վերաբերյալ գործը: Այն հարուցվել էր  ՀՀ քրեական օրենսգրքի 5  հոդվածներով մեղադրվող  ամբաստանյալ  Էդգար Վարագյանին ծեծի ենթարկելու և  մարմնական վնասվածքներ  պատճառելու առթիվ:

Ինչպես «Փաստինֆո»-ի թղթակցին հայտնեց  Է.Վարագյանի  պաշտպան  Աննա Թամազյանը, ըստ ՀՔԾ որոշման,  ոստիկանության աշխատակիցներ  Արթուր Մկրտչյանի,  Ամրամ Մակինյանի, Արգիշտի Տոնոյանի, Արման Մացակյանի, Գարիկ Մակարյանի և  Կարեն Ավետիսյանի արարքում հանցակազմը բացակայում է:  Նույն հիմքով ՀՔԾ-ն քրեական հետապնդում չի իրականացրել  ամբաստանյալի ու նրա ծնողների  նկատմամբ՝   «ակնհայտ սուտ  մատնություն կատարելու և սուտ ցուցմունք տալու կապակցությամբ»:

Էդգար Վարագյանը նախաքննության ընթացկում ցուցմունք էր  տվել, որ «Նուբարաշեն» քրեակատարողական  հիմնարկ ընդունվելու ժամանակ մարմնի վրա հայտնաբերված մարմնական վնասվածքներն ստացել է 2013թ.  սեպտեմբերի 24-26-ն ընկած ժամանակահատվածում՝  ՀՀ ոստիկանության  Կենտրոնական բաժնի  աշխատակիցների կողմից ծեծի և բռնության ենթարկվելու հետևանքով:

Ըստ  Է.Վարագյանի,  ձախ ձեռքի և ոտքի  վնասվածքներն ստացել է 2013 սեպտեմբերի 24-ին ոստիկանության Երևանի  վարչության Կենտրոնական բաժնի  Մարաշի բաժանմունքի պետ Արթուր Մկրտչյանի և ՔԳՎ Կենտրոնականի քննչական բաժնի պետ Ամրամ Մակինյանի կողմից ծեծի ենթարկվելու հետևանքով,  իսկ 2013թ. սեպտեմբերի  26-ին ի հայտ եկած վնասվածքները  իրեն դատարան ուղեկցած  ոստիկանների կողմից ծեծի ենթարկվելու, իսկ դաստակների կարմրավուն հետքերը ձեռքերին ձեռնաշղթաներ գցելու հետևանք են:

Քննչական մարմինը, սակայն, գտել է, որ  բացի Էդգար Վարագյանի ու նրա ծնողների ցուցմունքներից հիմնավորող այլ ապացույց ձեռք չի բերվել  և սպառվել են այդպիսիք ձեռք բերելու հնարավորությունները:

Պաշտպան Աննա Թամազյանը հայտնեց, որ անպայման բողոքարկելու է  ՀՔԾ որոշումը    վերադաս դատախազին  և  դատարան:  Ընդ որում, ըստ փաստաբանի,  իր պաշտպանյալը ոչ միայն բռնությունների է ենթարկվել, այլև  բերման ենթարկվելուց  ի վեր  3  օր  նրա ծնողներին  չեն տեղեկացրել, թե որտեղ է   գտնվում իրենց  որդին, իսկ  կալանավորելու միջնորդության քննարկումը դատարանում սկսվել է  ձերբակալության   թույլատրելի 72-ժամյա ժամկետը լրանալուց   2 ժամ անց:

Հիշեցնենք, որ ՀՀ ոստիկանության շտաբի ոստիկան,  ոստիկանության կրտսեր սերժանտ  Էդգար Վարագյանը մեղադրվում է    ՀՀ քրեական օրենսգրքի 5 հոդվածներով՝ 175-րդ հոդվածի 3-րդ մասի 1-ին կետով՝ ավազակություն՝ առանձնապես խոշոր չափերով գույք հափշտակելու նպատակով, 183-րդ հոդվածի 3-րդ մասի 3-րդ կետով՝ առանց հափշտակելու նպատակի ավտոմեքենային կամ տրանսպորտային այլ միջոցին ապօրինաբար տիրանալը, որը կատարվել է կյանքի կամ առողջության համար վտանգավոր բռնություն գործադրելով, կամ դա գործադրելու սպառնալիքով, 131-րդ հոդվածի 2-րդ մասի 2-րդ, 3-րդ, 4-րդ և 6-րդ կետերով՝ մարդուն առևանգելը, որը կատարվել է երկու կամ ավելի անձանց նկատմամբ, որոնցից մեկը՝ անչափահաս՝  կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով, զենքի կամ որպես զենք օգտագործվող առարկաների գործադրմամբ, 139-րդ հոդվածի 1-ին մասով՝ սեքսուալ բնույթի բռնի գործողություններ, և 138-րդ հոդվածի 1-ին մասով՝ բռնաբարություն:

Է.Վարագյանը և ոչ մի հոդվածով իրեն մեղավոր չի ճանաչում և հայտարարում է, որ ինքն ոչ մի հանցագործություն չի կատարել: