Փաստ ինֆո

Սահմանադրական դատարանն այսօր` ժամը 10-ին, կշարունակի ՀՀ նախագահի թեկնածուներ Րաֆֆի Հովհաննիսյանի և Անդրիաս Ղուկասյանի դիմումների հիման վրա` «Հայաստանի Հանրապետության Նախագահ ընտրվելու մասին» ՀՀ կենտրոնական ընտրական հանձնաժողովի փետրվարի 25-ի թիվ 62-Ա որոշումը վիճարկելու վերաբերյալ գործի քննությունը:

Առավոտյան նիստում պատասխանող կողմի` Կենտրոնական ընտրական հանձնաժողովի, ներկայացուցիչը կշարունակի պատասխանել Ա.Ղուկասյանի հարցերին:

ՍԴ-ն դեռևս պետք է լսի դատավարությանը որպես հարակից պատասխանող կողմեր ներգրավված ՀՀ դատախազության և ՀՀ կառավարությանն առընթեր ոստիկանության, ինչպես նաև որպես երրորդ անձինք ներգրավված` փետրվարի 18-ի ընտրությունների արդյունքների հիման վրա, ԿԸՀ-ի որոշմամբ, ՀՀ նախագահ ընտրված Սերժ Սարգսյանի ներկայացուցիչներին:

Հաշվի առնելով այն հանգամանքը, որ, «Սահմանադրական դատարանի մասին» օրենքի 74-րդ հոդվածի համաձայն, Հանրապետության Նախագահի ընտրության արդյունքներով ընդունված որոշումների հետ կապված վեճերով Սահմանադրական դատարանը պետք է որոշում ընդունի դիմումի մուտքագրման օրվանից հետո` տասնօրյա ժամկետում, այն է` մինչև մարտի 14-ը, ՍԴ նախագահ Գագիկ Հարությունյանը մարտի 12-ին հորդորեց դատավարության կողմերին պատրաստել նաև իրենց եզրափակիչ ելույթները: ՍԴ նախագահն ընդգծեց, որ որոշում կայացնելու համար ժամանակը շատ սուղ է և չբացառեց, որ վաղվա նիստերի միջև հայտարարվելիք կեսժամյա ընդմիջումների ժամանակը կրճատվի:

Նշենք, որ «Սահմանադրական դատարանի մասին» օրենքի համաձայն` Հանրապետության Նախագահի ընտրությունների արդյունքներով ընդունված որոշումների հետ կապված վեճերով Սահմանադրական դատարանն ընդունում է հետևյալ որոշումներից որևէ մեկը` ընտրական հանձնաժողովի որոշումը թողնել ուժի մեջ կամ անվավեր ճանաչել ընտրական հանձնաժողովի որոշումը: Երկրորդ դեպքում ՍԴ-ն կամ անվավեր է ճանաչում ընտրությունների արդյունքները, կամ ընտրված է ճանաչում համապատասխան թեկնածուին, կամ ընտրությունները ճանաչում է չկայացած, կամ նշանակում է ընտրության երկրորդ փուլ:

Օրենքը սահմանում է նաև, եթե գործի քննության արդյունքում ՍԴ-ն, սպառելով ապացույցներ ձեռք բերելու համար «Սահմանադրական դատարանի մասին» օրենքով նախատեսված բոլոր միջոցները, այդուհանդերձ, հնարավորություն չի ունեցել պարզելու ընտրության իրական արդյունքները, սակայն ՍԴ-ի կողմից որպես հավաստի գնահատված ապացույցներից ակնհայտ է դարձել, որ ընտրախախտումներն ունեցել են կազմակերպված, զանգվածային, կրկնվող կամ պարբերական բնույթ, և դրանց համադրումը վկայում է դրանց միջև համակարգային այնպիսի փոխկապակցվածության մասին, որի պայմաններում խախտվում են Սահմանադրության 4-րդ հոդվածով ամրագրված ընտրական իրավունքի սկզբունքները, ապա որոշում ընդունելիս ՍԴ-ն իրավասու է այդ հիմքով անվավեր ճանաչելու ընտրությունների արդյունքները:

Լուսանկարը` Ֆոտոլուրի