Փաստ ինֆո

«Կոչ եմ անում բոլորին, որպեսզի սթափ նայեն ծրագրին և չստեղծեն սպասումներ և պարտավորություններ, որոնք կարող են չկատարվել և այդպիսով իսկ խաթարել կայունությունը, տնտեսական զարգացման հնարավորությունները»,- Ազգային ժողովի նոյեմբերի 13-ի նիստում հայտարարեց ՀՀ ֆինանսների նախարար Վաչե Գաբրիելյանը` կառավարության և ԱԺ գլխադասային հանձնաժողովի դրական եզրակացությունը չստացած, սակայն ՀՅԴ խմբակցության կողմից արտահերթ համարված «Նվազագույն ամսական աշխատավարձի մասին» օրենքում փոփոխություններ և լրացում կատարելու մասին օրենսդրական նախաձեռնության քննարկման ժամանակ:

ՀՅԴ-ն առաջարկում է «Նվազագույն ամսական աշխատավարձի մասին» օրենքում ամրագրել, որ յուրաքանչյուր հաջորդ տարվա համար ՀՀ-ում աշխատավարձի ամսական և ժամավճարի նվազագույն չափերը սահմանվում են պետական բյուջեի մասին օրենքով: Ընդ որում` աշխատավարձի ամսական նվազագույն չափը սահմանելիս պետք է հաշվի առնվի գնաճի մակարդակը, կենսաապահովման նվազագույն բյուջեն կամ սպառողական նվազագույն զամբյուղի արժեքը, ինչպես նաև միջին աշխատավարձը: Հանրային ծառայության ոլորտում առաջարկվում է ամրագրել աշխատավարձերի նվազագույն` բազային դրույքաչափերի կապը միջին աշխատավարձի հետ:

Օրինագծով ամրագրվում է, որ աշխատավարձի ամսական նվազագույն չափը չի կարող պակաս լինել 12-ամսյա գնաճի արդյունքներով վերահաշվարկված նախորդ տարվա նվազագույն աշխատավարձից, 2013 թ.-ի համար` կենսաապահովման նվազագույն բյուջեի 80 տոկոսից, 2014 թ.-ի և հետագա տարիների համար` 100 տոկոսից, 2013 թ.-ի համար` միջին ամսական աշխատավարձի 30 տոկոսից, 2014 թ.-ի համար` 40 տոկոսից, 2015 թ.-ի և հետագա տարիների համար` 50 տոկոսից:

Ըստ նախագծի, կենսաապահովման նվազագույն բյուջեի մեծությունը սահմանված չլինելու դեպքում` հիմք է ընդունվում ՀՀ առողջապահության նախարարության կողմից մշակված սննդամթերքի կազմը, կառուցվածքը և էներգետիկայի հիման վրա հաշվարկված սպառողական նվազագույն զամբյուղի մեծությունը:

Օրենքն առաջարկվում է նաև լրացնել նոր հոդվածով, ըստ որի քաղաքական, հայեցողական կամ քաղաքացիական պաշտոն զբաղեցնող անձանց, ինչպես նաև քաղաքացիական, օրենքով սահմանված այլ պետական ծառայությունների և տեղական ինքնակառավարման մարմինների ծառայողների, պետական պաշտոնատար այլ անձանց, ՀՀ կենտրոնական բանկի աշխատողների նվազագույն ամսական աշխատավարձը, այդ թվում` բազային պաշտոնային դրույքաչափը, սահմանվում է պետական բյուջեի մասին օրենքով և չի կարող սահմանված նվազագույն ամսական աշխատավարձի 120 տոկոսից ցածր լինել:

Հիմնական զեկուցող, ՀՅԴ խմբակցության քարտուղար Աղվան Վարդանյանը նշեց, որ, հաշվի առնելով այն փաստը, որ տարին ավարտվում է, և 2013թ.-ի պետբյուջեի նախագիծն արդեն խորհրդարանում է, իրենք պատրաստ են մեկ տարով երկարաձգել աշխատավարձի ամսական նվազագույն չափի և կենսաապահովման նվազագույն բյուջեի ու միջին ամսական աշխատավարձի հետ առաջարկվող տոկոսային հարաբերակցությունների կիրառումը: Ըստ նրա, այս պարագայում 2014թ.-ի համար աշխատավարձի ամսական նվազագույն չափը կկազմի նույնքան` 45 հազար դրամ, ինչը կառավարությունը նախատեսում է իր ծրագրով: Նշվեց նաև, որ, կառավարության հաշվարկներով, անհրաժեշտ կլինի լրացուցիչ 16 մլրդ դրամի ծախս:

«Կարծում եմ, որ իրատես լինելով պետք է այս նախաձեռնությունը մերժել, քանի որ դա ի վերջո դնում է այն նույն նպատակը, որին կառավարությունն ուզում է հասնել ծրագրով, սակայն ոչ թե աստիճանական ընթացակարգով, այլ անմիջապես պարտադրելով և սահմանափակելով օրենքի խիստ նորմով, ինչը կարող է խնդիրներ առաջացնել բյուջետային կարգապահության, ֆինանսական միջոցների առկայության, ինչպես նաև միջավայրի վրա ազդեցության տեսակետից»,- ընդգծեց Ֆինանսների նախարար Վաչե Գաբրիելյանը:

Հարակից զեկուցող, ԱԺ սոցիալական հարցերի մշտական հանձնաժողովի նախագահ Հակոբ Հակոբյանն էլ հայտնեց, որ նախագիծը չի ստացել դրական եզրակացություն այն պատճառով, որ նախագծով առաջարկվող մեխանիզմներով հաշվարկների դեպքում ստացվում է, որ «առաջարկվում են շատ ավելի վատ պայմաններ», քան հետագա տարիների համար նախատեսում է կառավարությունն իր ծրագրով:

ՀՅԴ խմբակցության անդամների հեղինակած նախագծի վերաբերյալ հիմնականում ելույթ ունեցան խորհրդարանական ընդդիմության ներկայացուցիչները:

Նախագծի քվեարկությունը, ըստ ամենայնի, կիրականացվի նոյեմբերի 14-ին: