Փաստ ինֆո

Այս տարի փետրվարին Արմավիրի մարզի Մայիսյան գյուղում սարսափելի հանցագործություն էր տեղի ունեցել. ամուսինը ծեծելով սպանել էր կնոջը:

Արմավիրի մարզի ընդհանուր իրավասության դատարանը, ավարտելով գործի դատաքննությունը, կնոջը սպանելու համար 36-ամյա տղամարդուն դատապարտեց 9.5 տարվա ազատազրկման:

Գործի նյութերի համաձայն՝ կնոջ սպանությունը տեղի է ունեցել առանձնակի դաժանությամբ։  2014թ. փետրվարի 15-ին՝ ժամը 23։00-ի սահմաններում ամուսինների միջեւ ծագել  է վիճաբանություն կենցաղային հարցերի շուրջ, որի ժամանակ ամուսինը, գտնվելով ալկոհոլի ազդեցության տակ,  վագոն-տնակի բակում բռունցքներով, ոտքերով, մետաղական ձողով և փոցխով բազմաթիվ հարվածներ է հասցրել իր կնոջ գլխին և մարմնի այլ մասերին, որի հետևանքով կինը մահացել է։

Ի դեպ, պարզվել է նաև, որ տղամարդն առանձնապես ջերմ հարաբերությունններ չի ունեցել նաև իր նախկին կնոջ հետ, որից, մի քանի տարվա համատեղ կյանքից հետո, ամուսնալուծվել էր: Երկրորդ կնոջ հետ վիճաբանություններն ընտանիքում սկսել են համատեղ կյանքի արդեն առաջին իսկ տարում:

Դեպքի օրը՝ կնոջ քրոջ մահվան քառասունքի արարողության ժամանակ, տղամարդը, սովորության համաձայն, դարձյալ շատ է խմել, ապա որոշել է գնալ Չարենցավան՝ իր ծանոթի մոտ:

Կինն սկսել է մեղադրել նրան, որ սիրուհիների մոտ է գնում, բայց ամուսինն այնուամենայնիվ մեկնել է: Ավելի ուշ ամուսինը մորից տեղեկացել է, թե կինը տաքսի է փնտրում, որ գնա իր հետևից: Կնոջ այս պահվածքից զայրացած՝ ամուսինը վերադարձել է, վիճաբանել կնոջ հետ: Ընդ որում, կինը գտնվել է իր մյուս քրոջ տանը եւ ամուսինը տաքսիով գնացել է նախ նրա հետեւից, նստեցրել մեքենան ու շարժվել տուն ու ճանապարհին սկսել ծեծը։  Ընդ որում՝ քրեական գործի նյութերի համաձայն, ամուսինը կնոջը բռունցքներով սկսել է ծեծել դեռեւս տաքսու մեջ եւ դադարեցրել է միայն այն բանից հետո, երբ վարորդն ասել է, որ իր մեքենան վիճելու և կռվելու տեղ չէ՝ պահանջելով դադարեցնել վեճը։ Ժամը 22։30-ից 23։00-ի սահմաններում ամուսինները հասել են իրենց վագոն-տնակի մոտ։ Ամուսինն իջել է  մեքենայից, բացել հետևի դուռը եւ կնոջը  քաշել դուրս, ով ընկել է գետնին, այնուհետև իջեցրել է իրենց իրերը, իսկ տաքսու վարորդը մեքենայով հեռացել է։ Կինը բանալիով բացել է դուռը և երկուսով մտել են բակ, որտեղ վերջինս շարունակել է ասել, որ նրան տաքսու վարորդի հեռախոսահամար է հարկավոր, ու որ ցանկանում է հեռանալ։ Այդպես վիճաբանությունը շարունակվել է և ամուսինն սկսել է բռունցքներով և ոտքերով բազմաթիվ ուժեղ հարվածներ հասցնել նրա դեմքին և մարմնի այլ մասերին, ինչի արդյունքում կինն ընկել է գետնին։

Բայց ծեծը չի դադարեցրել, փոխարենը վերցրել է մետաղական ճկուն ձողը, ապա փոցխը և սկսել դրանցով բազմաթիվ հարվածներ հասցնել կնոջ գլխին և մարմնի այլ մասերին:

Շուտով տեսնելով, որ կինն այլևս չի դիմադրում և չի շարժվում՝ գրկել է նրան, տարել տուն, պառկեցրել թախտի վրա։ Այդ ժամանակ կինն սկսել է մի կերպ խոսել և խնդրել է կանչել իր քրոջը, սակայն ամուսինը գնացել է ննջասենյակ և քնել։

Մոտ մեկ ժամ անց արթնանալով` տեսել է, որ կնոջ վիճակը ավելի է վատացել. նա չի կարողացել շարժվել և անընդհատ տնքացել է։ Առավոտյան, երբ կրկին արթնացել է, տեսել է, որ կինն արդեն մահացել է: