Փաստ ինֆո

Հունիսի 12-ն այն ջրբաժանն էր ու մտորումների առիթը, որ առաջին հերթին այսօրվա՝ այլևս ոչ մի լեգիտիմություն չունեցող իշխանությունն արյունատենչ, արյունի ձգտող, միայն իր փողի և աթոռի իշխանությունը պահպանելու կոչված փոքրիկ խումբ է, որը պատրաստ է գնալ ամեն ինչի, ինչի վկայություն է հունիսի 12-ը։ Այս մասին հրավիրված մամուլի ասուլիսում հայտարարեց Բագրատ արքեպիսկոպոս Գալստանյանը։

«Հունիսի 12-ի արձանագրումով պայքարի վերադասավորման փուլ է մտել։ Անդրադառնալով պետք է ասեմ, որ ավելի նեռարական և ընդգրկուն է դառնալու։ Այս պայքարը ծնվել է ապօրինի, հանցագործ իրականությունից։ Դա Տավուշի շրջանում՝ Կիրանցի, Ոսկեպարի և Բաղանիսի հարձակումն է, որի արդյունքում տեղի է ունեցել բոլոր օրենքներին հակառակ, հակասահմանադրական, միջազգային իրավունքի սկզբունքներին հակառակ և երաշխավորների բացակայության պայմաններում։ Ըստ էության՝ դա ո՛չ սահմանագծում է եղել, ո՛չ սահմանազատում, այլ՝ հայրենիքի հանձնում՝ հարկադրանքի և ճնշումների ներքո, որի հետևանքները մինչև այսօր մեր տարածաշրջանի ժողովուրդը կրում է»,- հայտարարեց Սրբազանը՝ նշելով, որ շարժումը որպես այդպիսին սկսել է սահմանազատումից, բայց դա տեղական խնդիր չի եղել երբեք։

Սրբազանը նշեց, որ այսօր էլ շարունակվում են հալածանքները, մարդկանց տներից հանելով, վախեցնելով, սարսափեցնելով զուտ նրա համար, որ ճշմարտության համար պայքարի են դուրս եկել. «Նաև գործարարների վրա կան ճնշումներ: Բոլոր միջոցներով փորձում են վախեցնել մարդկնց, բայց ոչ ոք ոչ նահանջելու, ոչ ընկճվելու, ոչ պայքարի հրաժարվելու միտում ունի: Այս ամենի պատասխանատուն մեկ մարդ է՝ կառավարության ղեկին նստող ստախոսն է եւ ոստիկանության գլխին գտնվող այն մարդիկ, որոնք այդ հրամանները իրագործել են կամ տվել են: Մենք բոլոր փաստերով հաղորդումներ կներկայացնենք; Այս ընթացքում բերման են ենթարկվել, ձերբակալվել ու կալանքի են ենթարկվել միայն քաղաքացիները, ոչ մի ոստիկանի նկատմամբ վարույթ չկա»,- ընդգծեց Բագրատ Սրբազանը:

Աղբյուր` Փաստինֆո