Փաստ ինֆո

Երեկ Բաղրամյան պողոտայում տեղի ունեցած բախումների ժամանակ ձերբակալվել է նաև «Սիսական» ջոկատի հրամանատար Աշոտ Մինասյանը՝ «Աշոտ Երկաթը»։ Այս մասին «Փաստինֆո»-ի հետ զրույցում հայտնեց փաստաբան Սերգեյ Հարությունյանը։

Ինչպես արդեն հայտնել ենք, ընդհանուր առմամբ 30 անձ է ձերբակալված՝ ՔԿ-ում նախաձեռնված քրեական վարույթի շրջանակներում։ Նրանք ձերբակալվել են 72 ժամյա ռեժիմով։ Ձերբակալվածների թվում է նաև Աշոտ Մինասյանը, ինչպես նաև՝ Հաղարծինի վանահայր Սամվել վարդապետ Մխիթարյանը, ում նաև նկատմամբ նաև բռնություն է եղել, ինչի հետևանքով նրա կապան՝ հոգևորական զգեստը, պատառոտվել է։

«Այս պահին տեսանյութերն են ուսումնասիրում, փորձում են հասկանալ՝ արդյոք որևէ մեկը որևէ գործողություն կատարել է, թե՝ ոչ։ Ես ինքս այդ 30 անձանցից 18-ին տեսել եմ Կենտրոնի և Էրեբունիի բաժիններում։ Կան բազմաթիվ անձինք, որոնք ծեծված էին, վնասվածքներ ունեին, մեծ մասը բռնության էին ենթարկվել արդեն վահաններով անձանց հետնամասում»,- նշեց փաստաբանը՝ հավելելով, որ տեսանյութերն ուսումնասիրում են, հույս ունի և կարծում է, որ որևէ մեկի հետ կապված ոչինչ չեն գտնի։ Փաստաբանը հիշեցնում է, որ կալանքի միջնորդություն ներկայացնելու համար 60 ժամ է նախատեսված, եթե այդ ընթացքում կալանքի միջնորդություն չներկայացնեն, ապա կարծում է 72 ժամը լրանալուց հետո քաղաքացիներն ազատ կարձակվեն։

Նա նաև հայտնեց, որ վնասվածքներ ստացած սարկավագներ կան՝ բեկորային վնասվածքներով։ Անդրադառնալով քաղաքացիների նկատմամբ բռնությունների վերաբերյալ հաղորդումներ ներկայացնելուն՝ փաստաբանը նշեց, որ «Հինգ իրավապաշտպաններով» դա մարտավարական տեսանկյունից դիտարկում են, սակայն թերհավատորեն են մոտենում, քանի որ նախկինում բազմաթիվ նման հաղորդումներ են ներկայացվել, որոնց պատշաճ ընթացք չի տրվել, ֆիկտիվ քրեական վարույթներ են նախաձեռնվել, բայց անգործության են մատնված։

Հիշեցնենք, որ երեկ Բաղրամյան պողոտայում՝ ԱԺ շենքի մոտ, բախումներ են տեղի ունեցել, որի ընթացքում ոստիկանությունն անհամաչափ ուժ, ասել է թե՝ բռնություն է կիրառել խաղաղ հավաքի մասնակիցների նկատմամբ, ինչի հետևանքով շուրջ 101 անձ ստացել է տարբեր մարմնական վնասվածքներ, այդ թվում՝ քաղաքացիներից մեկը կիրառված հատուկ միջոցների հետևանքով կորցրել է դաստակը։ Տուժել են նաև շուրջ մեկ տասնյակ լրագրողներ և օպերատորներ, վնասվել է ԶԼՄ-ին պատկանող գույքը։

Կատարված բռնություններն անմիջապես պաշտպանել է Նիկոլ Փաշինյանը՝ ԱԺ ամբիոնից հայտարարելով, որ իրավապահ մարմինները ուժ կիրառելու իրավունք ունեն եւ նրանք դրա համար չեն կարող պատասխանատվության ենթարկվել, ինչից քիչ անց արդեն ՀՀ քննչական կոմիտեն, թերեւս ԱԺ ամբիոնից հնչեցրածը հիմք ընդունելով, շտապեց հաղորդագրություն տարածել՝ տեղի ունեցած բախումների մեջ, փաստացի, մեղադրելով քաղաքացիներին։

« 2024թ. հունիսի 12-ին` ժամը 19:30-ի սահմաններում, Երևան քաղաքի Բաղրամյան և Դեմիրճյան փողոցների հատման խաչմերուկում անցկացվող բողոքի ակցիայի ընթացքում հավաքի մասնակիցները, չենթարկվելով տեղում ծառայություն իրականացնող և հասարակական կարգը պաշտպանող ոստիկանության ծառայողների օրինական պահանջներին, սկսել են հասարակական անվտանգությանն սպառնացող զանգվածային անկարգություններ, որոնք զուգորդվել են ծառայություն իրականացնող ոստիկանության աշխատակիցների նկատմամբ բռնության գործադրմամբ՝ ոտքերով և ձեռքերով հարվածներ հասցնելով և նրանց ուղղությամբ տարբեր առարկաներ նետելով։ Դեպքի առթիվ ՀՀ քննչական կոմիտեում նախաձեռնվել է քրեական վարույթ՝ ՀՀ քրեական օրենսգրքի 327-րդ հոդվածի 1-ին մասի հատկանիշներով։Հաղորդագրության մեջ իրավիճակի լարման պատճառը ներկայացված էր մեղադրական կոնտեքստով՝ ուղղված հավաքի մասնակիցներին, հաղորդագրության մեջ խոսք չկար ոստիկանական ուժերի պահվածքի մասին, չնայած նաև նշված էր, որ ուսումնասիրվում են դեպքի վայրում իրականացվող տեսանկարահանումների տեսագրությունները»։
Նկատենք, որ նույն տեսագրություններում բազմաթիվ կադրեր կան, երբ ոստիկանները խուլիգանների նման ծեծում են քաղաքացիներին՝ ոտքերով հարվածելով նրանց ընկած վիճակում։

Հեղինակ՝ Իզաբել Սահակյան

Աղբյուր` Փաստինֆո