Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է ՀՀԿ փոխնախագահ Արմեն Աշոտյանի և մյուսների գործով դատական նիստը։

«Փաստինֆո»-ի հաղորդմամբ՝ այսօրվա նիստում հանրային մեղադրողները շարունակեցին հրապարակել մեղադրանքը, ինչի առնչությամբ պաշտպան Մարգար Սողոմոնյանը, թեև այս փուլում չցանկացավ դետալներին անդրադառնալ, արձանագրեց, որ այս մեղադրանքն աբսուրդ է, այն որևէ իրավական և փաստական հիմք չունի։

«Որքան ընթանում է այս դատավարությունը, այնքան շատ ենք համոզվում, որ այս գործում ինչին կպնում ենք՝ փլվում է։ Որևէ կերպ այս մեղադրանքն օրինական համարվել չի կարող։ Օբյեկտիվ իրականությունում փաստեր կան, որոնք չեն եղել, բայց արձանագրված է մեղադրանքում, ձևակերպումներ կան, որոնցով առհասարակ որևէ հիմնավորում ենք փորձում գտնել, բայց չենք գտնում»,- ասաց փաստաբանը՝ նշելով, որ Աշոտյանը չի ընդունում մեղադրանքը, անհամաձայնությունն ակնհայտ է և հետագա փուլերում հիմնավորումները կներկայացվեն, որ այս մեղադրանքներն անհիմն են։

Պաշտպան Ռուբեն Մելիքյանն էլ արձանագրեց, որ Աշոտյանին երեք մեղադրանք է ներկայացվել, որոնցից որևէ մեկը հիմնավոր չէ։

Դատական նիստում հայտարարությամբ հանդես եկավ նաև Արմեն Աշոտյանը՝ նշելով, որ բազմիցս նշվել է, որ քաղաքացի Կարեն Հակոբյանի գաղտնալսումները և արտաքին-ներքին դիտումները հիմք են հանդիսանում իրեն մեկ տարի տևող ազատազրկման, այսպես ասած, հիմնավորում տալու համար։ Աշոտյանը հայտնեց, որ Կարեն Հակոբյանին արտաքին և ներքին դիտում են արել երկու ամսով՝ երեք անգամ, ըստ այդմ, միջնորդել էին, որ ամբողջ նյութերը տրամադրվեն իրենց, քանի որ դրանից՝ կոնտեքստից կտրված նյութերը դրվել են կալանքի հիմքում, մինչդեռ, դրանցում կարող էին լինել նյութեր, որոնք կարող են խոսել հակառակի մասին։ Դատարանը որոշումը բավարարել էր՝ նշելով, որ պետք է տրամադրվի բոլոր նյութերը։

«Դուք որոշման մեջ չեք ասել 6 ամիս, ասել եք՝ ամբողջական։ Եթե սկավառակի վրա մեկ ամիս է, ապա հինգ ամիսն ու՞ր է, ինչու՞ չեն տվել, ինչ է այդ նյութերում, որ չեն տվել»,- ասաց Աշոտյանը։

Դատարանը որոշեց Աշոտյանին տրամադրել այն արտաքին և ներքին դիտման նյութերը, որոնց հիման վրա Աշոտյանն առ այս պահը կալանքի տակ է գտնվում։ Դատական նիստը հետաձգվեց։ Դատական հաջորդ նիստին կհարցաքննվեն վկաները։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո